Yowane 7:3-21

³ede Yesu kana kahao se hededelau unai se wane, “Kowa taba ku lau Yudeya, na temenai laulau gigigigibwalidi kabo ku ginaulidi na yom hekahekatao se kitadi.

⁴Ena tamowai hesau ye henuwa bena tamowai maudoidi iya kabina se kata, meta saha ye ginaginaulidi ne taba nige ye ginauli wadawadamyena. Ena kowa laulau gigigigibwalidi ku ginaginaulidi, bena ku hemasalahaꞌuyoigo na tamowai maudoidi se kitago.”

⁵Na iya kana kahao meta siya nige se kawamamohoiyei.

⁶Na Yesu ye hededelau udiyedi ye wane, “Yau yogu huya sola nige ye lage bena taba ya lau. Na huya maudoina udiyedi meta komiu gonowana kwa lau.

⁷Tanoubu ta tamowaidiyao taba nige gonowana se subugomiu, na yau meta se subugau, matawuwuna laulau saha se ginaulidi wa ya hededehemasalahadi meta laulau ta se yababa.

⁸Komiu kwa lau gwauyala ne unai, na yau taba nige ya laowa, matawuwuna yogu huya dudulaina sola nige ye lage.”

⁹Teina hedehedede ta mulidiwai ede Yesu ye miyamiya teha Galili unai.

¹⁰Iyamo huyana kana kahao wa se laoko gwauyala ne hesabana, kabo iya hinage ye lau, na yona lau ne unai meta tamowai nige kabina se kata.

¹¹Na gwauyala ne unai Dius tauwoyaidi Yesu se wasewasenei na se henahenamai se wane, “Tamowai wa, iya ede haedi?”

¹²Boda maudoidi iya se hetahetalagadigadiguguyei. Hekadi se wane, “Iya tamowai namwanamwana.” Na hekadi se wane, “Nigele! Iya boda taulupolupoidi.”

¹³Na iyamo nige tamowai hesau Yesu ye hededehemasalaha boda kalidiwai, matawuwuna ede siya Dius tauwoyaidi wa se matausiyedi.

¹⁴Gwauyala mayadaidi duwaduwalina unai na kabo Yesu ye mwalaesae numa tabuna bakubakuna unai na ye hetubu ye lauhekata.

¹⁵Ede Dius tauwoyaidi se siliyata na se wane, “Teina tamowai ta kulikuli tabudi nige se hekata. Na idohagi to kabidi ye katakalili?”

¹⁶Yesu ye hededelau udiyedi ye wane, “Yogu lauhekata ta nige yau ya bom yogu nuwatu, na tauhetamaligauma yona nuwatu.

¹⁷Ena tamowai hesau ye henuwa bena Yaubada yona nuwatu ye miyawatani, kabo gonowana yogu hedehedede ta ye nuwatulobaidi meta ya bom yogu lauhekata o Yaubada yona lauhekata.

¹⁸Ena tamowai hesau ye bom yona nuwanuwatu unai ye hedehedede, meta ye henuwa bena taba tamowai iya se hededetausaei. Na yau yogu nuwatu ede bena tauhetamaligauma wa tamowai se hededetausaei. Unai ya hedehededemamohoi, na nige ya kaikailupolupo.

¹⁹Mose laugagayo ye leyawa, na nige tamowai hesau luwamiuyena laugagayo ta maudoidi ye miyawatanidi. Na ye saha to kwa henuwa bena kwa unuigau?”

²⁰Boda wa se hededebui se wane, “Yaluwa yabayababana ye luwuigo. Kaiteya ye henuwa bena ye unuigo?”

²¹Yesu ye hededelau udiyedi ye wane, “Laulau gigigigibwalina kesega ya ginauli Sabati mayadaina unai na maudoimiu kwa siliyata.