Yowane 1:9-45

⁹Na mala mamohoina kabo ye laoma tanoubu ta unai, na Yaubada kana kao mamohoina ye hededehemasalaha tamowai maudoidi udiyedi.

¹⁰Iya Yaubada maiyana tanoubu se hetubu, yo ye miya tanoubu ta unai, na iyamo tanoubu ta tamowaidiyao nige se kitalobai.

¹¹Ye laoma yona tanoubu ye ginauliꞌusei wa unai, na iyamo yona tamowai wa nige se hailobai.

¹²Na kaiteyadi iya se hailobai yo hesana se sunumai, meta dudulai ye mosedi se hemala Yaubada natunao.

¹³Na nige labalaba unai, o tamowai yodi gadosisi wai o maitawasola loheya yona nuwatu wai, na Yaubada yona hineli unai se hemala Yaubada natunao.

¹⁴Hedehedede wa ye hemala tamowai, na maiyamai ka miya. Yo kana kao saesaena mamohoina ka kitayako, iya ede Yaubada natukesekesegana mo kana kao saesaena mamohoina. Natu ta meta tamana Yaubada unai ye laoma yo kalinawai kabinamwa yo mamohoina se mwayau.

¹⁵Yowane ma kalina lakilakina ye hededehemasalaha ye wane, “Tamowaina ede teina lahinaidi ya hededehemasalahayako wa, ‘Iya ede dagelagu ne unai kabo ye laoma, iya meta ye saekalili na kabo yau, matawuwuna iya ye tububaguna.’”

¹⁶Iya kalinawai kabinamwa ye mwayau. Na kita maudoida iya unai kabinamwa ta haidi na sola ta haihaiꞌuyoidi.

¹⁷Mose unai laugagayo wa se laoma, na Yesu Keliso unai kabinamwa yo mamohoina se laoma.

¹⁸Sola nige tamowai hesau Yaubada ye kita, na natukesekesegana ye bom mo. Iya meta Yaubada, yo Tamana maiyana se kawakeha, yo iya Tamana ye hemasalahayako kalidawai.

¹⁹Dius tauwoyaidi Yelusalema unai taumiyamiya wa, taukaitalasam yo Lewi tamowaidiyao se hetamalidi se lau Yowane unai na se henamaiyei iya meta kaiteya. Teina ta meta Yowane yona hededehemasalaha.

²⁰Iya nige ye uhala na ye hededehemasalahaꞌuyoi ye wane, “Yau nige Keliso.”

²¹Na se henamaiyei, “Ena kowa nige Keliso, meta kowa kaiteya? Kowa Eliya?” Ede ye wane, “Yau nige.” “Nuwana kowa peloweta ka nayanayaiꞌusei wa?” Na ye wane, “Nige.”

²²Na kabo se wane, “Na kowa kaiteya? Yoma henamai ta buina ku leyama, na kabo ka uyo tauhetamaligai wa yodi ka hedehedede. Taba ku bom ku hededehemasalahaꞌuyoigo meta kowa kaiteya.”

²³Ede Aisaiya peloweta yona hedehedede unai Yowane ye hededebui ye wane, “Yau tamowaina ede tauyogayoga balabala ne unai ya wane, ‘Guiyau yona keda kwa kabinonohai.’”

²⁴Kabo Paliseya tamowaidiyao hekadi se hetamalidima wa

²⁵Yowane se henamaiyei se wane, “Ena kowa nige Keliso, nige Eliya, yo nige tenem peloweta ne, matawuwuna saha to ku hebahebabatiso?”

²⁶Yowane ye wane, “Waila unai ya hebahebabatiso. Na tamowai hesau meta nige kabina kwa kata ye totolo luwamiu ne unai.

²⁷Iya ede muligu ne unai kabo ye laoma, na yau nige ya namwakalili kabo gonowagu kana buti mainadi ya yailidi.”

²⁸Teina laulau maudoidi ta se tubu Yowane yona kabahebahebabatiso Betaniya, Yolidani hali tanakawasina unai.

²⁹Na mayadai hesauna unai Yowane Yesu ye kitalaei ye laolaoma hesabana ede ye wane, “Kwa kitalau, Yaubada yona mamoe natuna ye laolaoma. Iya tanoubu yona baꞌaya tauhaigabaeina.

³⁰Teina iya ede lahinaidi ya hedehededei wa ya wane, ‘Tamowai hesau yau dagelagu unai kabo ye laoma meta ye saekalili na kabo yau, matawuwuna iya ye tububaguna.’

³¹Yau nige ya kitalobai meta iya Keliso. Na ya laoma ya hebabatisoigomiu waila unai meta bena iya ya hemasalaha Isalaela tamowaidiyao kalimiuwai.”

³²Kabo Yowane ye hededehemasalaha ye wane, “Yaluwa Tabuna ya kita doha bunebune galewa ne unai ye dobima, na ye talu iya kewana ne unai.

³³Iyamo iya meta nige ya kitalobai, na Yaubada ye hetamaligauma waila unai ya hebahebabatiso na ye hededelaoma kaliguwai ye wane, ‘Tamowai hesau kabo ku kita Yaluwa kabo ye dobima na kalinawai ye talu meta iya Yaluwa Tabuna unai kabo ye hebahebabatiso.’

³⁴Ya kitayako yo ya hemamohoiyei meta iya Yaubada natuna.”

³⁵Mayadai hesauna unai Yowane maiyana hekahekatao labui se totolo Yowane yona kabahebahebabatiso magaina wa unai.

³⁶Na Yowane ye kaikaikewalau Yesu ye kita ye laulau ede ye wane, “Kwa kita, tenem meta Yaubada yona mamoe natuna!”

³⁷Yona hekahekatao labui wa yona hedehedede se lapui ede Yesu se hemuliwatani.

³⁸Na Yesu ye kaikewabui ye kitadi se hemuhemuliwatani, ede ye henamaiyedi ye wane, “Saha kwa henuwa?” Se hededelau unai se wane, “Labi” (kalina Hebelu unai kaniyona ede Taulauhekata), “haedi ku miyamiya?”

³⁹Kabo ye hededelau udiyedi ye wane, “Kwa laoma na kabo kwa kita!” Unai se lau yona kabamiya wa se kita. Na yodi huyalau ne meta meimeilahi mahanana 4 kiloki unai. Na tenem mayadaina ne unai iya maiyadi se miya.

⁴⁰Simona Petelo kana kaha Andeleya, iya Yowane yona hekahekatao labui wa hesauna, na Yowane yona hedehedede wa ye lapui ede Yesu ye hemuliwatani.

⁴¹Na kabo Andeleya ye lau kana kaha Simona ye lobai na yona ye hedehedede ye wane, “Mesaiya wa ka lobaiyako.” (Mesaiya Giliki kalinadi unai kaniyona ede Keliso.)

⁴²Ede ye woyaiyama Yesu unai. Yesu ye kitalau iya unai na ye wane, “Kowa Simona, Yowane natuna. Kabo hesam se katai Kipasi.” (Na kalina Giliki unai se wane Petelo.)

⁴³Mayadai hesauna unai Yesu nuwana ye hineli bena kabo ye lau Galili. Na Pilipo ye lobai ede ye hededelau unai ye wane, “Ku laoma ku hemuliwatanigau.”

⁴⁴Pilipo meta Betesaida unai ye miyamiya doha hinage Andeleya yo Petelo.

⁴⁵Pilipo ye lau Natanaela ye lobai na yona ye hedehedede ye wane, “Kulikuli tabuna unai Mose yo peloweta tamowai se hetahetalaꞌusei wa ka lobaiyako. Hesana ede Yesu, Nasaleta tamowaina, iya Yosepa natuna.”