Yowane 19:15-19

¹⁵Na siya se yogalau unai se wane, “Ku laehesuwala! Ku laehesuwalayawa! Ku hesataulo.” Pilato ye henamaiyedi ye wane, “Kwa henuwa bena yomi wasawasa ne ya hesataulo?” Taukaitalasam tauwoyaidi se yogabui se wane, “Yoma wasawasa kesega ede Sisa! Kai nige yoma wasawasa hesau!”

¹⁶Na kabo Pilato Yesu ye moselaei tauꞌiyala tamowaidi kalidiwai bena se hesataulo. Ede Yesu se woyaei se laei.

¹⁷Na Yesu kana sataulo ye bom ye bahei na ye lau tupwa hesauna unai hesana ede Mwayalu Magaina unai. Kalina Alamaiki unai se wane, Golagota.

¹⁸Temenai Yesu yo tamowai labui maiyanao se hesataulodi. Yesu se heduwaduwali na teha tutuna unai hesau yo teha seuseulina unai hesau.

¹⁹Pilato hededehemasalaha kubwakubwana ye kuli na se tutuhepatu sataulo wa kewanawai, ye kuli ye wane, “Yesu Nasaleta Tamowaina, Dius Tamowaidi Yodi Wasawasa.”