Yowan 8:32-44

³²Inbe ole lomim galanga ye betanga moolmool, inbe betanga moolmool tani ole ipamulang ye so yo ikau ang a iparamang i.”

³³Yesu iwete nen, motong la di Yuda tina ngan tiwete panga. Tiyei ne, “Ai, am nga sasa kiam la Apram i, le tool sa ikau am a amyei poranga panga pitiap. E nga yelei kuwete pam be betanga moolmool tani be ipamulam ye so yo be ikau am a iparamam in nga?”

³⁴Motong la Yesu iwete pang di nen, “Awete pang moolmool nen, di tooltool yo tiyei noonoo nga, ngan tiyei ben poranga pang noonoo.

³⁵Ngan tool yo iyei poranga pang tool mai ki i, in ke be iyepe so ye tool mai ki, ngan tiap, bong tool mai tani in natunu leu la be iyepe so ye i.

³⁶Ngan nanga, kumata le be Natunu ipamulang ye so yo be ikau ang a iparamang in nga, ngan ole ipamulang moolmool le kayege so tani in.

³⁷Au i lok galanga yang be ang nga sasa kiang la Apram i. Bong lomim pang betanga kiau tiap, ngan nen le kakapye be karaumatau a amata.

³⁸Au i awetewete pang ye so yo Tamak ipatnai pau nga. E ang ngan kayei so le katoo dada yo tamamim iwete pang ye nga.”

³⁹Yesu iwete nen, motong la di Yuda tina ngan tiyei ne, “Am nga tamamam la Apram i.” Motong la Yesu iwete nen, “Kumata be ang nga Apram di natunu moolmool nga, ngan matin nga le dada kiang ngan gaongo ben ke Apram.

⁴⁰Ngan au i awete pang ye betanga moolmool yo alongo ye Maro nga. Bong ang nga kakapye be karaumatau a amata. Ngan Apram in iyei dada yo nen, ngan tiap.

⁴¹Le ang nga kayei dada ben yo ang tapmim tamamim iyei nga.” Yesu iwete pang di nen, ngan le tiraua betanga ki nen, “Am nga di tinamam tiyei bauk la le kapodi a tipasui am, nga tiap. Am nga Tamamam ataleu in la Maro i.”

⁴²Motong la Yesu iwete pang di nen, “Kumata le ang nga Tamamim moolmool la Maro in nga, ngan matin nga le lomim pau mai san, yesoo au i aye Maro amyepe, motong la asi nga. Inbe au i atoo au tauk lok la asi, nga tiap, bong ya la iwangau a asi i.

⁴³Bong nga yelei a lomim galanga ye betanga kiau yo awete ngan tiap nga? Ngan ye punu in nen, ang nga lomim be kalongo betanga kiau tina ngan kaparama, ngan tiap.

⁴⁴Le ang nga tamamim la tool kuto mai kidi so sadi i. Ngan nen le lomim mede be katoo dada yo ya lon dook mata ye nga. Ngan kulkulunu yege nga, ngan ya in tool ke raumatenge di tooltool. Inbe iparama betanga yo moolmool in tiap, yesoo betanga moolmool ngan sa iken ye tiap. Ngan ye kene yo be illung nga, ngan ole iwete betanga ki ke kaplungunu, yesoo ya in tool ke lungunu, inbe betanga yo ke kaplungunu nga, ngan tamana la ya in.