Yowan 6:55-70

⁵⁵Yesoo, au i medak in kaningi moolmool, inbe rara kiau in la ran moolmool ke yinungu i.

⁵⁶Ngan nen le tool yo ikana medak be iyini rara kiau i, in ole iyepe yau, inbe au i ayepe ye.

⁵⁷Tamak yo yepongo dook mata ipa ye i, in ya la iwangau a asi i. Ngan ya in ikaua yepongo dook mata tani in pau. Ngan nen le ye dada gaongo leu ben yo ikaua yepongo dook mata pau nga, ngan la au i ole akaua yepongo dook mata pang di tooltool yo tikana medak nga.

⁵⁸Le porong moolmool tani yo ipa ye malala ke Maro a isi, in naii. Ngan porong i dawa ben yo muku ngan di sasa kiang tikani, motong timmata, in tiap. Bong sei tool be ikana porong moolmool i nga, ngan ole ikaua yepongo dook mata yo taukan motingi i.”

⁵⁹Ngan Yesu iwete betanga yo nga malala mai Kapenam, ye kene yo lo ipatomonai di tooltool ye rumu kidi Yuda ke gaongo in lono ye i.

⁶⁰Ye kene tani in Yesu di galiunu alunu la tilongo betanga ki tina yo iwetewete nga, le nga tiyei ne, “Atoo, betanga yo ipatomonai idi ye nga, ngan imoo san. Nga ole sei tool be ikap i?”

⁶¹Bong ngan Yesu lon galanga ye di yo tipasa mur ye betanga ki tina, ngan oo. Le nga iwete pang di nen, “Nga yelei, betanga yo awete nga igarung lomim, too?

⁶²Ngan le be kakamata Tool Moolmool ke Maro be imulu a ilo pang ete ye ni yo muku ngan iyepe ye in nga, ngan ole kawete belei?

⁶³Maro Amunu la be ikaua yepongo dook mata yo taukan motingi in pang di tooltool i. Bong di tooltool ke tana ngan taukadi gurana yo be tiyei nen ye i. Ngan nanga, betanga yo awete pang ngan ipa ye Maro Amunu, le betanga tina ngan la be ikaua yepongo dook mata yo taukan motingi in pang i.

⁶⁴Bong ang kapala nga katara lomim medana pau tiap.” Yesu iwete nen, yesoo ye kene yo imadit ye urata ki ye in nga, ngan lon galanga ye di tooltool yo be titara lodi medana panga tiap nga, inbe lon galanga ye tool yo be pang dama ni ngan ole itaru la di koi ki baedi, in lapau.

⁶⁵Motong la Yesu iwete mulu nen, “Ye punu in la le awete pang be tool sa ke be itoo ya taunu lono a iman pang yau, ngan tiap, bong be Tamak ipamede be iman, ngan la be iman pang yau nga.”

⁶⁶Ye kene tani in tilongo tina yo Yesu iwete nen nga, le nga di galiunu alunu la tiyege a timulumulu pang ni kidi le titoo mulu tiap nga.

⁶⁷Motong la Yesu itor di galiunu tina yo sangaul be ru ngan nen, “Nga yelei, ang nga lomim be kayegau a kala lapau, too?”

⁶⁸Motong la Simon Pita iraua betanga ki nen, “Tool Mai, sei tool be amla ye i? Ong i, betanga kiong nga ke be ikaua yepongo dook mata yo taukan motingi i, in pang di tooltool.

⁶⁹Le am nga lomam galanga yong, inbe amtara lomam medana nen, be ong i la Tool Tani Yo Maro Ipootoo Panga Ya Taunu I.”

⁷⁰Pita iwete nen, motong la Yesu iraua betanga ki nen, “Ang di galiuk yo sangaul be ru nga, ngan au tauk la apootang i. Bong emim atu in tool kuto mai kidi so sadi iyepe ye!”