Yowan 6:29-59

²⁹Motong la Yesu iraua betanga kidi nen, “Urata ke Maro in nen, be katara lomim medana pang tool yo Maro iwanga a isi i.”

³⁰Iwete pang di nen, motong la titoru. Tiyei ne, “Ole kuyeie soo mos a nen ngan iyei ben tarkilanga kiong pam be amkamata, ngan amtara lomam medana yong i?

³¹Muku ngan di sasa kiam tikana porong yo ene mana in ye ni sorrakene, ben betanga tina yo tiwodo lo ye Rau ke Maro nga. Ngan betanga tina ngan iwete nen, ‘Ya in ikap porong yo ipa ye malala ke Maro, ngan pang di tooltool be tikan.’  ”

³²Motong la Yesu iwete pang di nen, “Mose la ikap porong yo ipa ye malala ke Maro ngan pang di tooltool be tikan, in tiap, bong Tamak la ikap pang di i. Inbe ya la ikaua porong moolmool yo ipa ye malala ke Maro, in pang i.

³³Ngan porong moolmool ke Maro i, in tool yo ipa ye malala ke Maro a isi be si ikaua yepongo dook mata yo taukan motingi i, in pang di tooltool ke tana i.”

³⁴Yesu iwete nen, motong la tiwete panga. Tiyei ne, “Tool mai, be nen nga, ngan kanakana ngan kouo porong tani in pam.”

³⁵Motong la Yesu iwete pang di nen, “Au tauk i la porong tani yo ke yepongo dook mata i. Ngan nen le sei tool be iman yau nga, ngan o ke be pitola mulu tiap. Inbe sei tool be itara lono medana pau nga, ngan o ke be moorooku mulu tiap lapau.

³⁶Bong dawa ben awete pang koot nga, ang nga kakamata gurana kiau oo, bong lomim be katara lomim medana pau tiap.

³⁷Di tooltool le imot yo Tamak ikap di pau nga, ngan ole timan pang yau. Inbe sei tool be iman pang yau nga, ngan o ke be anganga tiap lapau.

³⁸Yesoo, au i apa ye malala ke Maro a asi nga, ngan be si atoo au tauk lok tiap, bong be si atoo Tool yo iwangau a asi, in lono.

³⁹Inbe Tool yo iwangau a asi i, in lono nen, be kin ayege di tooltool yo ikap di pau nga, ngan sa le ilene be. Bong be apamadit di le imot ye lal yo itaru be ikarata betanga kidi tooltool ye i.

⁴⁰Ngan Tamak lono nen, be di tooltool le imot yo titar matadi pang Natunu a titara lodi medana panga nga, ngan ole tikaua yepongo dook mata yo taukan motingi i, inbe ole apamadit di ye lal yo itaru be ikarata betanga kidi tooltool ye i.”

⁴¹Di Yuda tilongo tina yo Yesu iwete be ya in porong moolmool yo ipa ye malala ke Maro a isi i, le nga katedi malmal a timadit tina le tipasa mur ye.

⁴²Tiyei ne, “Ona tiap! Tool i Yesu, inbe ya in tamana la Yosep i, too? Idi nga lod galanga ye tamana le tinana, e nga yelei be nookoot nga iwete be ya in ipa ye malala ke Maro a isi nga?”

⁴³Motong la Yesu iwete pang di nen, “Ai, katemim malmal a kapasa mur yau dookoot!

⁴⁴Tool sa ke be itoo ya taunu lono a iman pang yau, ngan tiap, bong be Tamak yo iwangau a asi i, in ipamaditi lono be iman, ngan la be iman pang yau nga. Inbe tool yo nen, in ole apamaditi mulu ye lal yo Maro itaru be ikarata betanga kidi tooltool ye i.

⁴⁵Le betanga yo Maro koonoo iwode a iken ye Rau ke Maro in nen, ‘Ole Maro ipatomonai di tooltool nga le imot.’ Ngan nen le di sema tooltool le imot yo tilongo betanga ke Tamak a lodi galanga ye nga, ngan ole timan pang yau.

⁴⁶Ngan tool sa yo ikamata Tamak koot, ngan tiap, bong tool ataleu yo iye Maro tiyepe motong isi i, in leu la ikamata Tamak i.

⁴⁷Le awete pang moolmool nen, sei tool itara lono medana pau nga, ngan ikaua yepongo dook mata yo taukan motingi in oo.

⁴⁸Au tauk i la porong ke yepongo dook mata tani i.

⁴⁹Di sasa kiang tikana porong yo ene mana, in ye ni sorrakene nga, ngan di le imot timmata.

⁵⁰Bong porong moolmool tani in ipa ye malala ke Maro a isi, le kumata be di tooltool tikani, ngan o ke be timmata tiap.

⁵¹Ngan au i la porong tani ke yepongo dook mata yo ipa ye malala ke Maro a isi. Le kumata sei tool be ikana porong tani in nga, ngan ole iyepe ye yepongo dook mata yo taukan motingi i. Ngan porong tani in au tauk medak yo be akauu pang di tooltool ke tana i le imot i, a be nen ngan tikaua yepongo dook mata tani.”

⁵²Yesu iwete nen, le nga di Yuda tina tilongo, le katedi malmal a di tapdi tiparsu inbe tiwetewete nen, “Nga ole tool i iyei belei be ikap medana a takan nga?”

⁵³Motong la Yesu ikatte betanga pang di nen, “Awete pang moolmool nen, kumata le be kakana Tool Moolmool ke Maro medana tiap, inbe kayini rara ki tiap lapau nga, ngan o ke be kakaua yepongo sa yo dook mata, ngan tiap.

⁵⁴Bong kumata sei tool be ikana medak, inbe iyin rara kiau nga, ngan ole ikaua yepongo dook mata yo taukan motingi i. Inbe ye lal yo Maro itaru be ikarata betanga kidi tooltool ye in nga, ngan ole apamaditi mulu ye ni ke matenge.

⁵⁵Yesoo, au i medak in kaningi moolmool, inbe rara kiau in la ran moolmool ke yinungu i.

⁵⁶Ngan nen le tool yo ikana medak be iyini rara kiau i, in ole iyepe yau, inbe au i ayepe ye.

⁵⁷Tamak yo yepongo dook mata ipa ye i, in ya la iwangau a asi i. Ngan ya in ikaua yepongo dook mata tani in pau. Ngan nen le ye dada gaongo leu ben yo ikaua yepongo dook mata pau nga, ngan la au i ole akaua yepongo dook mata pang di tooltool yo tikana medak nga.

⁵⁸Le porong moolmool tani yo ipa ye malala ke Maro a isi, in naii. Ngan porong i dawa ben yo muku ngan di sasa kiang tikani, motong timmata, in tiap. Bong sei tool be ikana porong moolmool i nga, ngan ole ikaua yepongo dook mata yo taukan motingi i.”

⁵⁹Ngan Yesu iwete betanga yo nga malala mai Kapenam, ye kene yo lo ipatomonai di tooltool ye rumu kidi Yuda ke gaongo in lono ye i.