Yowan 5:21-41

²¹Le nen, Tamana in ipamadit di tooltool yo timmata koot nga le timaur mulu, inbe ikaua yepongo dook mata pang di. Ngan nanga, Natunu ole iyei nen lapau a ikaua yepongo dook mata yo taukan motingi in pang di tooltool ye ya taunu lono.

²²Inbe so san mulu in nen, Tamana in ole ikarata betanga ke tool sa tiap, bong urata tani ke karatanga betanga ke di tooltool i, in isuku la Natunu baene,

²³a be nen ngan di tooltool le imot ole tiraua pang Natunu dawa ben tina yo tiraua pang Tamana nga. Kumata le sei tool be iraua pang Natunu tiap nga, ngan iraua pang Tamana yo iwanga a isi i, in tiap lapau.”

²⁴“Awete pang moolmool nen, sei tool ilongo betanga kiau, inbe itara lono medana pang tool yo iwangau a asi i, in ikaua yepongo dook mata yo taukan motingi i. Inbe tool tani in o ke be tipaposi ye urata dook tiap ki yo iyei ngan sa, a be nen ngan Maro iyemenai ye, ngan tiap, yesoo iyege dada ke matenge inbe iyepe ye yepongo dook mata yo taukan motingi in oo.

²⁵Awete pang moolmool nen, lal yo be pombe i, in nookoot nga pombe oo. Le di tooltool yo tiyepe ben timmata koot nga, ngan ye kene yo be tilongo Maro Natunu kalngana a be titoo nga, ngan ole tikaua yepongo dook mata yo taukan motingi i.

²⁶Ngan Tamana in yepongo dook mata tani in ipa ye. Le gaongo leu ikaua gurana tani in pang Natunu le yepongo dook mata tani in ipa ye lapau.

²⁷Inbe Tamana ikaua gurana mai panga be ikarata betanga ke di tooltool ye dada le urata kidi yo tiyei nga, yesoo ya in Tool Moolmool ke Maro.

²⁸“Kin katakrai ye betanga yo awete nga be. Yesoo, lal yo be pombe i, in ole di tooltool le imot yo timmata a tikenen agoro lono kidi ke matenge nga, ngan tilongo kalngana,

²⁹ngan ole timadit a tisi tana. Lo ngan be di tooltool yo tiyei dada dook mata nga, ngan ole timadit a timaur mulu inbe tiyepe ye yepongo dook mata yo taukan motingi i. Inbe di tooltool yo tiyei dada dook tiap nga, ngan ole timadit a timaur mulu, lo ngan be tipapos di ye urata dook tiap kidi yo tiyei nga, a be nen ngan tiyemenai di ye.

³⁰Au i ke be ayeie so sa ye au tauk lok tiap. Au i alongo Tamak koonoo le atoo betanga ki, inbe akarata betanga ke di tooltool ye dada kidi yo tiyei nga. Ngan nen le urata kiau ke karatanga betanga tani, in ipa tarantatu dook mata, yesoo atoo au tauk lok tiap, bong atoo Tamak yo iwangau a asi i, in lono.”

³¹Motong la Yesu iwete mulu nen, “Kumata be au tauk awetewete pang ye urata le dada kiau au tauk nga, ngan ole kawete be betanga kiau nga moolmool tiap.

³²Bong tool san la be ikaua nek a iwetewete, inbe ipaposau ye urata le dada kiau yo ayei nga. Le lok galanga nen, betanga ki yo be iwetewete yau nga, ngan moolmool le imot.

³³Muku ngan kawanga di tooltool a tila ye Yowan be la titor yau nga, ngan le iwete betanga moolmool pang di yau lapau.

³⁴Moolmool, au i asere tool ke tana i sa be iwetewete yau tiap, bong awete nen pang nga, ngan be nen a nen ngan Maro ikau ang a ipamulang ye so dook tiap yo be igarungang i.

³⁵Yowan in iyei ben sul loloana le ilolo a ilangarai di tooltool. Ngan le lomim ponana ye sul ki ye manga modono kasin.

³⁶“Bong so san mulu yo ipaposau le illos betanga ke Yowan yo iwetewete yau i, in nen. Urata yo Tamak itar la baek be ayei porai nga, ngan la ayei le ipaposau pang di tooltool be au i Tamak la iwangau a asi i.

³⁷Ngan Tamak yo iwangau a asi i, in ya taunu la iwetewete yau a ipaposau i. Bong ang nga kalongo touo kalngana, inbe kakamata touo matana pitiao.

³⁸Inbe kaparama betanga ki sa a iken lomim tiap, yesoo ang nga katara lomim medana pang tool yo iwanga a isi i, in tiap.

³⁹Kanakana ngan ang nga kasootoo kinkatingi betanga ke Maro yo iken ye rau ki nga, yesoo lomim tar nen, betanga tina ngan la be ikaua yepongo dook mata yo taukan motingi in pang i. Bong awete pang nen, betanga tina yo iken ye Rau ke Maro nga, ngan la iwetewete yau a ipaposau nga.

⁴⁰Bong ang nga lomim be kaman pang yau, a be nen ngan man kakaua yepongo dook mata yo taukan motingi i, in tiap.

⁴¹“Au i asere tool ke tana i sa be iyitmaka ek, in tiap,