Yowan 3:2-14

²Ngan bong, motong la iman pang ye Yesu man iwete panga nen, “Pannoongoo, am nga lomam galanga yong nen, ong i Maro iwangong a kusi be si kuyei ben pannoongoo. Yesoo, kumata le be Maro iyepe ye tool tiap nga, ngan o ke be iyei mos yo ben ong kuyei, ngan tiap.”

³Motong la Yesu iraua betanga ki nen, “Awete pong moolmool nen, kumata tool sa be iportaka lono le iyei ben tool paunu mulu tiap nga, ngan o ke be lo igaua ye di tooltool yo Maro be matan kala di nga, ngan tiap.”

⁴Motong la Nikodimas itoru mulu nen, “Ngan yelei ye tool yo iyei kolman koot i, in ole iyei belei a be iyei tool paunu mulu nga? Tool tani in ke be imulu a ilo tinana kapono lono, lo ngan be tinana ipasuiu mulu, ngan tiap.”

⁵Motong la Yesu iraua betanga ki nen, “Awete pong moolmool nen, kumata tool sa be iportaka lono le iyei ben tool paunu mulu ye ran, inbe ye Maro Amunu Silene, tiap nga, ngan o ke be lo igaua ye di tooltool yo Maro be matan kala di nga, ngan tiap.

⁶Ngan so yo di tooltool ke tana tiyeii a pombe i, in so ke tana, bong so yo Maro Amunu Silene iyeii a pombe i, in so ke Maro Amunu.

⁷Le kin kutakrai ye betanga yo aweta pong be kuportaka lom le kuyei ben tool paunu mulu, ngan be.

⁸Awete pong nen, muru i be ipa nga, ngan ole ipa pang ye ni yo be ipa pang ye i. Ngan ole kulongo mununu, bong o ke be lom galanga ye ni yo ipa ye a iman i, too ye ni yo be ila pang ye i, in tiap. Ngan dada gaongo leu, ye urata yo Maro Amunu Silene iyeii ye di tooltool a be iportaka lodi le tiyei ben di tooltool paunu mulu nga.”

⁹Ngan tina Yesu iwete nen nga, le nga Nikodimas itoru. Iyei ne, “Ai, so yo kuwetewete ye nga, ngan ole pombe belei?”

¹⁰Motong la Yesu iraua betanga ki nen, “Ong i pannoongoo, inbe em mai ye di pannoongoo kapala yo ke di Isrel nga. E nga yelei a lom galanga ye so nga tiap nga?

¹¹Awete pong moolmool nen, am nga amwetewete ye soo so yo lomam galanga ye nga, inbe ampapos soo so yo amkamata nga. Bong ang nga lomim be kakap betanga kiam yo amwetewete pang ye, ngan tiap.

¹²Au i awete pang ye so yo ke tana i nga, bong ngan katara lomim medana ye tiap. Ngan nanga, kumata le be awete pang ye so yo ke malala ke Maro nga, ngan ole katara lomim medana ye belei?

¹³Ngan ni tool sa yo ilo koot ye malala ke Maro, ngan siap. Bong Tool Moolmool ke Maro ya taleu in la ipa ye malala ke Maro a isi i.

¹⁴Muku ngan Mose ikarata tomonaia moto kanningana ye pat sallinene, motong la itaru lo ye kai inbe ipatakode le ikodo ye ni sorrakene, a be nen ngan di tooltool tikamata ngan timmata be. Ngan dada gaongo leu ole pombe ye Tool Moolmool ke Maro. Ya in ole titaru lo ye kai inbe tipatakode le lo ikodo,