Yowan 21:14-25

¹⁴Ngan kene yo Yesu imata, motong imadit mulu ye in nga, ngan le pombe pang ye di galiunu paru oo, e patol nanga la nookoot ngan pombe pang ye di nga.

¹⁵Ye kene tani in tikan so a imot, motong la Yesu iwete pang Simon Pita nen, “Simon, Yowan natunu, ong i lom pau mai san moolmool le kullos di diem nga, too?” Ngan se Pita iyei ne, “E, Tool Mai. Ong i, lom galanga yau nen, au i lok pong mai san.” Motong la Yesu iwete panga nen, “Kupakan di sipsip kiau.”

¹⁶Motong la Yesu iwete panga mulu nen, “Simon, Yowan natunu, ong i nga lom pau mai san moolmool, too?” Ngan se Pita iyei ne, “E, Tool Mai. Ong i, lom galanga yau nen, au i lok pong mai san.” Motong la Yesu iwete panga nen, “Matam kala di sipsip kiau.”

¹⁷Motong la Yesu iwete panga mulu nen le patol ki. Iyei ne, “Simon, Yowan natunu, ong i lom pau mai san, too?” Yesu itoru nen le patol, le nga Pita lon moo ye betanga yo iyei ne, “Ong i lom pau mai san, too?” Motong la iwete pang Yesu nen, “Tool Mai, ong in lom galanga ye so nga le imot. Le lom galanga nen, au i lok pong mai san.” Motong la Yesu iwete panga nen, “Kupakan di sipsip kiau.

¹⁸Awete pong moolmool nen, ye kene yo tinim paunu go nga, ngan ole ong taum kulonlon ye lonloningi kiong, inbe kupa pang ye ni yo lom be kula pang ye i. Bong ye kene yo be kuyei kolman ye in nga, ngan ole kuyitmaka baem pang ete, inbe tool san ilonlonong, lo ngan be irarong pang ye ni yo lom be kula pang ye tiap nga.”

¹⁹Ngan Yesu iwete pang Pita nen nga ikatte betanga ye soo dada yo be Pita imata ye i, a nen ngan iyeie Maro ene le ilo ete ke be di tooltool tipayiti ye i. Yesu iwete panga nen a imot, motong la iyei ne, “Kuman a man kutoo au.”

²⁰Yesu iwete pang Pita nen a yaru tila, motong la Pita be ilalele, ngan ikamata Yesu galiunu tani yo lono panga mai san i, in itoo di yaru. Ya in tool tani yo tigaua a tikan so nga, ngan irusu le la itadana Yesu, inbe itoru mos leu nen, “Tool Mai, nga ole sei tool be itarong la di koi kiong baedi i?”

²¹Ye kene in Pita ikamata le nga itoro Yesu nen, “Tool Mai, nga ole yelei ye tool i?”

²²Motong la Yesu iwete panga nen, “Kumata le lok be iyepe matana rerene nen le ilo ye lal yo be amulu a asi ye in nga, ngan ole yelei yong? Ong in kuman a kutoo au!”

²³Yesu iwete nen le betanga tani in imasak kataunu ye di diene kapala yo titara lodi medana panga nga, ngan be galiunu tani in o ke be imata tiap. Bong ngan Yesu iwete touo betanga sa be tool tani in ole imata tiap, ngan tiap. Bong ngan iwete leu nen, “Kumata le lok be iyepe matana rerene nen le ilo ye lal yo be amulu a asi ye in nga, ngan ole yelei yong?”

²⁴Le in Yesu galiunu tani yo iwetewete ye so tina yo ikamata nga, inbe iwodo betanga ki lo ye rau i. Le lod galanga nen, so yo iwetewete ye nga, ngan moolmool.

²⁵Ngan so alunu san la Yesu iyei lapau nga. Bong kumata be tiwodo betanga ke so tina ngan atu atu le imot ilo ye rau nga, ngan ole tana mai kiidi le imot i taukan manga yo be tatar rau tina ngan ye i.