YOWAANA 9:27-41

²⁷Mu ne leen: «Wax naa leen ko ba noppi, waaye dégluwuleen ma. Lu ngeen bëgg ci ma di ko wax, di waxaat? Xanaa dangeena bëgga nekk yéen itam ay taalibeem?»

²⁸Ci kaw loolu ñu daldi ko saaga ne ko: «Yaw yaay taalibeem. Nun, taalibey Musaa lanu.

²⁹Xam nanu ne Yàlla wax na ak Musaa; waaye kii, xamunu sax fu mu jóge.»

³⁰Waa ja ne leen: «Loolu de, doy na waar! Xamuleen fu mu jóge, te moo ubbi samay bët!

³¹Xam nanu ne Yàlla du déglu boroom bàkkaar. Waaye nag, dina déglu ki koy ragal tey def coobareem.

³²Bi àddina sosoo ba tey, masuñoo dégg nit ku ubbi bëti gumbag judduwaale.

³³Kon nit kookee nag, bu jógewul woon ca Yàlla, du mana def dara.»

³⁴Ñu ne ko: «Yaw, ci biir bàkkaar nga juddoo, ba noppi di nu jàngal?» Noonu ñu dàq ko ca jàngu ba.

³⁵Yeesu daldi yég ne dàq nañu nit ka. Bi mu dajeek moom, mu ne ko: «Ndax gëm nga Doomu nit ki?»

³⁶Waa ja ne ko: «Wax ma mooy kan, Sang bi, ba ma man koo gëm.»

³⁷Yeesu ne ko: «Gis nga ko ba noppi, te mooy kiy wax ak yaw.»

³⁸Waa ja ne: «Boroom bi, gëm naa la.» Noonu mu jaamu Yeesu.

³⁹Yeesu ne ko: «Àttee ma taxa ñëw àddina, ngir ñi gumba gis, ñiy gis gumba.»

⁴⁰Bi Farisen ya nekkoon ak moom déggee loolu, ñu ne ko: «Xanaa kon nun it danoo gumba?»

⁴¹Yeesu ne leen: «Bu ngeen gumba woon, dungeen am bàkkaar, waaye fi ak yéena ngi naan: “Nu ngi gis,” ci bàkkaar ngeen di dëkk.