YOWAANA 7:3-27

³Noonu rakki Yeesu yu góor ya ne ko: «Jóge fi te dem diiwaanu Yude, ngir say taalibe gis, ñoom itam, jaloore yi ngay def.

⁴Ku bëgga siiw, doo nëbb say jëf. Boo demee bay wone jaloore yu mel ni, fexeel ba ñépp gis la.»

⁵Rakkam yi dañu doon wax loolu, ndaxte ñoom itam gëmuñu ko woon.

⁶Yeesu ne leen: «Sama waxtu jotagul. Ci yéen nag, waxtu yépp a baax.

⁷Àddina du leen bañ waaye bañ na ma, man, ndaxte maa wax ne seeni jëf baaxul.

⁸Yéen nag demleen màggal ga. Demaguma màggal googu, ndaxte sama waxtu jotagul.»

⁹Bi mu leen waxee loolu ba noppi, moom mu des Galile.

¹⁰Bi rakkam ya demee ca màggal ga, Yeesu itam sooga dem te kenn yégu ko; siiwalul demam.

¹¹Fekk Yawut yaa nga ko doon seet ca màggal ga te naan: «Ana waa ji?»

¹²Ca biir mbooloo ma ñu ngi doon déeyante, di wax ci ay mbiram. Ñii naan: «Nit ku baax la.» Ñee naan: «Déedéet, day nax nit ñi.»

¹³Waaye kenn ñemewu koo tudd ca kaw, ndaxte dañoo ragaloon Yawut ya.

¹⁴Bi ñu demee ba ca diggu màggal ga, Yeesu dem di jàngle ca kër Yàlla ga.

¹⁵Yawut ya nag jaaxle, daldi ne: «Nu waa jii def ba xam lii lépp, moom mi jàngul?»

¹⁶Yeesu daldi leen wax ne: «Li may jàngle, jógewul ci man, waaye ci ki ma yónni la jóge.

¹⁷Ku fas yéenee wéy ci bëgg-bëggu Yàlla, dina xam ndax sama njàngle ci Yàlla la jóge, walla ci sama coobare.

¹⁸Nit kiy wax ci coobareem nag, day wuta màggal boppam, waaye kiy wuta màggal ki ko yónni, dëgg rekk lay wax te jubadiwul fenn.

¹⁹Xanaa du Musaa moo leen jox ndigali Yàlla yi? Waaye kenn ci yéen sàmmu ko! Lu tax ngeen bëgg maa rey?»

²⁰Mbooloo ma ne ko: «Xanaa dangaa am ay rab! Ku lay wuta rey?»

²¹Yeesu ne leen: «Benn jaloore rekk laa def, te yéen ñépp ngeen jaaxle!

²²Li leen Musaa jox ndigalu xarafal gone yi —jógewul kat ci Musaa; mi ngi tàmbalee ci seen maami cosaan— moo tax ba ngeen nangoo xarafal nit ci bésub noflaay bi.

²³Bu ngeen manee xarafal nit ci bésub noflaay bi, ngir baña wàcc yoonu Musaa, lu tax nag ngeen mere ma, ndax li ma ci wéral nitu lëmm?

²⁴Bàyyileen di àtte ci ni ngeen di gise, te di àtte dëgg.»

²⁵Am na ci waa Yerusalem ñu doon wax naan: «Xanaa du nit kii lañuy wuta rey?

²⁶Xool-leen, mi ngi waaraate ci biir nit ñi, te kenn du ko wax dara. Ndax sunu kilifa yi dañoo xam ne mooy Almasi bi?

²⁷Waaye waa ji, xam nanu fu mu jóge, te saa su Almasi bi dee dikk, kenn du xam fu mu bàyyikoo.»