YOWAANA 3:8-33

⁸Ngelaw fu ko neex lay jublu. Yaa ngi koy dégg waaye xamuloo fu mu jóge, xamuloo fu mu jëm. Noonu la mel it ci képp ku juddoo ci Xelum Yàlla.»

⁹Ci baat yooyu Nikodem ne ko: «Nu loolu mana ame?»

¹⁰Yeesu ne ko: «Yaw yaay jàngal bànni Israyil te xamuloo mbir yii?

¹¹Ci dëgg-dëgg maa ngi la koy wax, noo ngi wax li nu xam, di nettali li nu gis, waaye nanguwuleena gëm li nu seede.

¹²Gannaaw gëmuleen li ma leen di wax ci mbiri àddina, naka ngeen mana gëme, bu ma leen waxee ci mbiri asamaan?

¹³Kenn masula yéeg ci asamaan su dul ki fa jóge, muy Doomu nit ki.

¹⁴Te itam na Musaa sampe woon ab bant ca diggu màndiŋ ma, takk ca jaan, ja mu defare woon xànjar, fàww ñu yékkatee noonu Doomu nit ki,

¹⁵ngir képp ku ko gëm am ci moom dund gu dul jeex.»

¹⁶Ndaxte Yàlla dafa bëgg àddina, ba joxe jenn Doomam ji mu am kepp, ngir képp ku ko gëm am dund gu dul jeex te doo sànku mukk.

¹⁷Yàlla yónniwul Doomam ci àddina ngir mu daan nit ñi, waaye ngir musal leen.

¹⁸Képp ku ko gëm deesu la daan, waaye ku ko gëmul daan nañu la ba noppi, ndaxte gëmuloo ci turu Doom ji Yàlla am kepp.

¹⁹Ci nii la àtte bi ame: leer gi ñëw na ci àddina, waaye nit lëndëm gi lañu taamu ndax seeni jëf yu bon.

²⁰Képp kuy def lu bon day bañ leer gi te du ci ñëw, ndax ragal ay jëfam di feeñ bëccëg ndarakàmm.

²¹Waaye ku def lu jub day ñëw ci leer gi, ngir ñu xam ne def na ay jëfam ci kanam Yàlla.

²²Gannaaw loolu Yeesu ànd ak ay taalibeem, dem ca biir diiwaanu Yude, toog fa ak ñoom ab diir, di sóob nit ñi ci ndox.

²³Yaxya moom itam doon na sóobe ci ndox ci dëkku Aynon, ca wetu dëkku Salim, ndaxte diiwaan booba bare woon na ndox. Nit ñi daan nañu ñëw ci moom, mu di leen sóob.

²⁴Booba tëjaguñu Yaxya ci kaso.

²⁵Foofa ay taalibey Yaxya tàmbalee werante ak benn Yawut ci mbirum sangu set.

²⁶Ci kaw loolu ñu dem ca Yaxya ne ko: «Kilifa gi, ndax fàttaliku nga kooka nga seede woon te mu nekkoon ak yaw ca gannaaw dexu Yurdan? Moom de, ma ngay sóobe ci ndox léegi te ñépp a ngay dem ca moom!»

²⁷Yaxya ne leen: «Kenn manula am dara lu ko Yàlla joxul.

²⁸Yéen ci seen bopp man ngeena seede ne waxoon naa ne duma Almasi bi waaye dañu maa yónni ma jiitusi ko.

²⁹Kiy céetal moo moom séetam. Waaye xaritu kiy céetal dafay taxaw di ko déglu, tey bég, bu déggee baatam. Mbég moomu moo di sama bos tey, te fi mu nekk mat na sëkk.

³⁰Li war moo di moom, mu gëna màgg te man, ma gëna féete suuf.»

³¹Ki jóge ci kaw moo féete kaw ñépp; ki jóge ci suuf nag, ci suuf rekk la mana bokk, te ni niti àddina lay waxe. Ki jóge asamaan

³²day wax li mu gis ak li mu dégg, waaye kenn nanguwul li mu seede.

³³Képp ku nangu seedeem nangu nga ne Yàlla, dëgg lay wax.