Yontu Tɑɑ Yontu 8:3-13

³Te mɑ nyʋɣʋ nɑ nyɑ́ niŋ mpǝtǝŋ, Kpɛkǝnɑ-m nɑ nyɑ́ ntɔɣɔŋ.

⁴Hɑɩ, Yosɑlɛm pɛɛlɑɑ mɛ, mɑ tuukinɑ-mɛ. Ɩ́ tɑɑ pɑɑtɩ tɑ́ sɔɔlʋɣʋ nɑ pǝ wɑɑtʋ tɑ tɑtɑ.

⁵Pɛɛlɔ wei ɩ kɔŋnɑ ntɛ́ nɑ wʋlɑɣɑ tɛtʋ tɔɔ, nɑ ɩ́ nyǝkɑ ɩ kʋsɔɔlʋ tɔɔ? Tʋɣʋ tɛɛ kɛ́ mɑ feesɑ-ŋ. Tǝnɑɣɑ nyɑ́ too wei ɩ lʋlɑ-ŋ tɔ ɩ kpɑɣɑ nyɑ́ hɔɣɔ.

⁶Sɩɩ-m nyɑ́ lɑŋlɛ nɑ nyɑ́ ŋkpɑlǝŋɑ tɔɔ ɩsɩɩ kʋyʋsʋɣʋ. Mpi tɔ, Sɔɔlʋɣʋ wɛ toŋ kɛ́ ɩsɩɩ sǝm. Nɑ ɩsǝsɛɛmlɛ nɑ́ɑ́ wɛ tomɑ ɩsɩɩ ɑtɛtǝlɛ. Sɔɔlʋɣʋ nyǝmɑ́ kɛ kɔkɔ nyǝnɑ kɛ́. Kʋ kɛ́ Tɑcɑɑ kɔkɔ kɛ́.

⁷Lʋm sɔsɔɔm ɩɩ pǝsǝɣɩ nɑ pǝ́ teesi kʋ kɔkɔ. Pǝyele pusi sɔsɔɔnsɩ kɑɑ li-kʋ. Ye yʋlʋ cɛlɑ ɩ tǝyɑɣɑ wɛnɑʋ tǝnɑ sɩ ɩ lɑɣɑsǝɣǝnɑ sɔɔlʋɣʋ, ɩsɩɩ pɑ tʋʋ-ɩ.

⁸Tǝ wɛnɑ newɑɣɑ ɑlʋnyǝŋkɑ ŋkɑ kɑ tɑ lɩɩtɑ hǝlɑ tɔ. Ɩsǝnɑɣɑ tɩɩ lɑ kʋyɑkʋ ŋku pɑɑ yɔɣɔtɩ kɑ́ ɑsɑsɑɑlɛ tɔm tɔ?

⁹Ye kɑ tɔkɑ kɑ tɩ nɑ kɑ́ kisi yɛlɛyɛlɛ, tɩɩ yɔɔlǝnɑ-kɛ nɑ kɑcɔkɑ wontu. Amɑ ye kɑ pǝsɑ ɩsɩɩ yǝlɑɑ tǝnɑ nɔnɔɣɔ, tɩɩ tǝkɩ-kɛ nɑ kpeŋkpelɑsɩ toŋ nyǝnsɩ.

¹⁰Mɑ tɔkɑ mɑ tǝɣɩ, mɑ fɛɩ yɛlɛyɛlɛ tɑɑ. Mɑ hǝlɑ sǝŋɑɑ kɛ́ ɩsɩɩ ɑkelenɑɑ. Mpʋ tɔ, mɑ kʋsɔɔlʋ nyǝnǝɣɩ-m wei ɩ kɔŋnɑ hɛɛsʋɣʋ tɔɣɔ.

¹¹Ḿpʋ́ɣʋ́ Sɑlʋmɔŋ tɔmɑ sɩ: Mɑ wɛnɑ tɩɩŋ wei pɑ yɑɑ sɩ lɛsɛŋ tɔ ɩ tɑɑlɛ kɛ timpi pɑ yɑɑ sɩ Pɑɑlɩ-Hɑmɔŋ tɔɣɔ. Mɑ yelinɑ-tɛɣɛ tɑŋlɑɑ, pɑɑ wei ɩ kɔŋnɑ-m tǝ kʋlʋlʋm kɛ liɣitee nyǝɣǝtʋ iyɑɣɑ (1000).

¹²Mɑ tɩɩŋ tɑɑlɛ wɛ mɑ kiŋ kɛ́. Sɑlʋmɔŋ nyɑɑ kpɑɣɑ liɣitee nyǝɣǝtʋ iyɑɣɑ (1000). Lǝsɩ tǝ tɑɑ kɛ́ nyǝɣǝtʋ ŋmʋnʋɣʋ (200) nɑ ń cɛlɑ tɑŋlɑɑ.

¹³Nyɑ́ wei n wɛ hɑlǝm tɑɑ tɔ, nyɑ́ tɑɑpɑlɑɑ kemɑ ŋkpɑŋŋ sɩ pɑ nɩɩkɩ nyɑ́ nɔɣɔ. Ɩlɛ yele nɑ mɑ́ nɩɩ-kɛ.