Yontu Tɑɑ Yontu 5:1-13

¹Mɑ newɑɣɑ, mɑ tɑŋiyɑ nyɑ́. Mɑ sʋʋkɩ mɑ hɑlǝm tɑɑ nɑ mɑ́ cɑɑ mɑ tulɑɑlʋ miili nɑ tulɑɑlʋnɑɑ lɛlɑɑ. Mɑɑ tɔɣɔ mɑ tɩɩŋ sɛtɑɣɑ. Nɑ mɑ́ nyɔɔ mɑ sʋlʋm nɑ mɑ nɑɑlǝm. Mɑ tɑɑpɑlɑɑ mɛ ɩ́ tɔɣɔ nɑ ɩ́ nyɔɔ. Sɔɔlʋɣʋ ɩ́ kʋ-mɛ ɩsɩɩ sʋlʋm.

²Mɑ tookɑɣɑ yɑɑ, pɑɑ nɑ mpʋ mɑ́ nɑ mɑ ɩsɛ. Ḿpʋ́ɣʋ́ mɑ nɩɩwɑ mɑ kʋsɔɔlʋ nɔɣɔ nɑ ɩ́ lɑkɩ kɑɑfɑlɑ nɑ ɩ́ tɔŋ sɩ: Tʋlʋ-m, mɑ newɑɣɑ, mɑ kʋsɔɔlɑɣɑ. N wɛ-m teu kɛ́ ɩsɩɩ ɑlukuku, nyɑɣɑlɛ mɑ kʋpɑŋkɑ. Mpi tɔ, ɑhoo cɔlɔʋ kpɑ-m kɛ́ nɑ mɑ nyɔɔsɩ tɔɔ nɑ lʋm.

³Mɑ tɛmɑ mɑ wontu wɔɣɔsʋɣʋ. Ɩsǝnɑɣɑlɛ mɑɑ tɑɣɑnɩ-tǝɣɩ suuu? Pǝ́cɔ́ mɑ kɔwɑ mɑ nɔɔhɛɛ. Ɩlɛ ɩsǝnɑɣɑ mɑɑ tɑɣɑnɩ-yɛɣɛ pilisuɣu tɔtɔ?

⁴Ḿpʋ́ɣʋ́ mɑ kʋsɔɔlʋ sʋsɑ ɩ niŋ nɑ pɔɣɔtɛ. Nɑ mɑ lɑŋlɛ tɑɑ lɑ tǝnyɑɩɩ.

⁵Ɩlɛnɑ mɑ́ kʋlɩ sɩ mɑ tʋlǝɣɩ mɑ kʋsɔɔlʋ, nɑ mɑ ntɑntɑkʋ nɑ mɑ mpee tɔɔ tulɑɑlʋ tɑɑnɑ kɑmpʋ tǝtɔkǝlɛ.

⁶Ḿpʋ́ɣʋ́ mɑ tʋlɑ mɑ kʋsɔɔlʋ, ɩlɛ ɩ tɛmɑ tɛɛʋ. Amɑ ɩ kʋyɔɣɔtʋtʋ wɑkǝlɑ mɑ lɑŋlɛ. Ɩlɛnɑ mɑ pɛɛkɩ-ɩ mɑ tɑ nɑ-ɩ. Nɑ mɑ́ yɑɑ-ɩ ɩ tɑ cɔ.

⁷Ḿpʋ́ɣʋ́ mɑ sulɑ tɑŋlɑɑ mpɑ pɑ cɔɔkɩ ɩcɑtɛ tɔ. Nɑ pɑ́ mɑ-m nɑ pǝ́ kʋ-m, nɑ pɑ́ lɛɛkɩ mɑ tɛkɛntɛ.

⁸Hɑɩ, Yosɑlɛm pɛɛlɑɑ mɛ, mɑ wiinɑ-mɛ. Ye ɩ́ sulɑ mɑ kʋsɔɔlʋ, ɩ́ heeli-ɩ sɩ sɔɔlʋɣʋ kʋtɔŋ kpɑ-m.

⁹Hɑɩ, ɑlɑɑ tɑɑ telu nyɑ́, weɣe nyɑ́ kʋsɔɔlʋ nɑ́ tɛɛwɑ, nɑ ń wiikinɑ-tʋɣʋ mpʋ?

¹⁰Mɑ kʋsɔɔlʋ nyɑ́ n sɛɛwɑɣɑ tǝkpɑŋkpɑŋ. Pɑɑ n wɛ yǝlɑɑ iyisi nɑɑnʋwɑ (10000) tɑɑ, pɑ nyǝŋɩ-ŋ kpɑkpɑɑ kɛ́.

¹¹Nyɑ́ ɩsɛntɑɑ tewɑɣɑ ɩsɩɩ wʋlɑ mɑɣɑmɑɣɑ. Nɑ nyɑ́ nyɔɔsɩ nɑ́ɑ́ yɑwɑ tǝpolopolo ɩsɩɩ pɑ́ɑ́ʋ hɛtʋ, nɑ sɩ pilɑ kilikili ɩsɩɩ kɑtǝkɑtʋɣʋ.

¹²Nyɑ́ ɩsǝpee wɛɛ kɛ́ ɩsɩɩ ɑlukukunɑɑ kɛ lʋm kʋkpemim nɔɣɔ. Nɑ pɑ́ yɑɑkɩ nɑɑlǝm tɑɑ nɑ pɑ́ hɛɛsǝɣɩ timpi pǝ tɔɔlǝnɑ-wɛ tɔ.

¹³Nyɑ́ lukpuɣutu tewɑɣɑ ɩsɩɩ tulɑɑlʋnɑɑ tɩɩŋ tɑɑlɛ. Nɑ nyɑ́ ntompee wɛ ɩsɩɩ yɑɑyenɑɑ mpɑ pɑ tɔɔ tulɑɑlʋ miili kpeŋ tɔ.