Yontu Tɑɑ Yontu 4:2-14

²Nyɑ́ kelɑ hʋlʋmɑɑ kɛ́ ɩsɩɩ heeŋ kʋhʋlʋmǝŋ kɑlǝkʋ ŋku kʋ hʋntʋ pɑ kɔwɑ nɑ kʋ́ lɩɩnɑ lʋm tǝnyɔɔlɛ tɔ. Pɑɑ heu wei nɑ ɩ tompiyɑ, nɔɣɔlʋ tɑ lɑŋ.

³Nyɑ́ ntompee wɛ ɩsɩɩ kpoŋkpontuɣu kʋsɛɛmʋɣʋ. Nyɑ́ lukpuɣutu nɑɑkɩ nyɑ́ tɛkɛntɛ tɛɛ ɩsɩɩ pɑ fɑɣɑ tʋɣʋ nɑkʋlɩ kʋ pǝle kʋsɛɛmlɛ. Nɑ nyɑ́ yɔɣɔtɑɣɑ nɑ leleŋ.

⁴Nyɑ́ luɣu wɛ kɛ́ ɩsɩɩ Tɑfiiti kutuluɣu kʋkʋlʋɣʋ ŋku pɑ ŋmɑwɑ sɩ pɑ sɩɩkɩ yoou wontu tɔ. Kʋ tɑɑ kɛ́ pɑ pusɑ kpɑlǝŋ iyɑɣɑ (1000). Yoolɑɑ tɑɑ yoolɑɑ kpɑlǝŋ kɛ́.

⁵Nyɑ́ hǝlɑ nɑɑlɛ wɛ kɛ́ ɩsɩɩ nɑsɛm tompiyɑ nɑɑlɛ tɔkʋɣʋ yɑɑyenɑɑ hɛkʋ tɔ.

⁶Mɑɑ polo tulɑɑlʋ miili pʋɣʋ tɔɔ, nɑ tulɑɑlʋ kʋwɔpʋ pulɑɣɑ tɔɔ. Nɑ pǝ́cɔ́ pǝ nyɑɑlɩ nɑ sǝkpɛtʋɣʋ yɑ́.

⁷Mɑ kʋsɔɔlɑɣɑ nyɑ́, n tewɑɣɑ tǝkpɑpɑ. Nyɑ tiili tɑ́ pǝntɩ pɑɑ pǝcɔ.

⁸Mɑ tɑŋiyɑɣɑ nyɑ́, kɔɔ. Kɔɔ nɑ tǝ́ lɩɩ Lipɑŋ pʋɣʋ tɑɑ. Hɑtoo Amɑnɑ, nɑ Senii, nɑ Hɛɛmɔŋ pǝ pɔ́ɔ́ŋ nyɔɔŋ tɑɑ kɛ́ n kɑ́ nyǝnɩ tɛtɛkǝlɛ. Tɔɣɔlɑsɩ lonɑ wɛ tǝnɑɣɑ. Nɑ kpooŋ tǝcɑɣɑlɛ.

⁹Mɑ newɑɣɑ, mɑ tɑŋiyɑ nyɑ́, n hɛɛsǝɣɩ mɑ lɑŋlɛ kɛ́. Ye n nyǝnɑ-m tɔm kʋlʋm pǝ lɑkɩ-m teu kɛ́. Ye mɑ nɑwɑ nyɑ́ lɩɩlʋɣʋ pile kʋlʋmtǝlɛ pǝ lɑkɩ-m leleŋ.

¹⁰Mɑ newɑɣɑ, mɑ tɑŋiyɑ nyɑ́, Nyɑ́ sɔɔlʋɣʋ wɛ teu kɛ́. Nyɑ́ sɔɔlʋɣʋ kǝlɑ-m sʋlʋm tǝcɑɣɑcɑɣɑ. Nyɑ́ tulɑɑlʋ sɔɔsʋŋ tɛɛwɑ lɛmpɑ tǝnɑ.

¹¹Mɑ tɑŋiyɑ nyɑ́, tɩɩŋ nim kpeŋ nyɑ́ ntompee tɔɔ kɛ́. Nyɑ́ nsǝmlɛ tɔɔ wɛ ɩsɩɩ nɑɑlǝm nɑ tɩɩŋ nim. Nɑ nyɑ́ wontu sɔɔsʋŋ nɑ́ɑ́ wɛ ɩsɩɩ Lipɑŋ tɛtʋ hɔtʋɣʋ hɛtʋ.

¹²Mɑ newɑɣɑ, mɑ tɑŋiyɑ nyɑ́. N wɛ kɛ́ ɩsɩɩ hɑlǝm mpi pɑ lɔpɑ kɑlɑɑ tɔ. Yɑɑ hite nte tǝ tɔɔ pɑ sulɑɑ tɔ, yɑɑ sɛɛlʋ wei ɩ tɔɔ pɑ tɑɑlɑɑ tɔ.

¹³Nyɑ́ lɔɔŋ lʋm niɣitiɣinɑ tɩɩŋ tɑɑlɛ nte tǝ pee wɛ leleŋ kɛ teu tɔ. Tulɑɑlʋnɑɑ kʋpɑmɑ tɩɩŋ nyɔɔkɩ

¹⁴tǝnɑɣɑ wɑɑnɩ wɑɑnɩ kɛ́, nɑ pǝ kpɛnnɑ kʋsɑɣɑlɑɑ kʋpɑmɑ.