Yontu Tɑɑ Yontu 1:1-15

¹Sɑlʋmɔŋ yontu tɑɑ yontu ntɔ.

²Wɑɣɑlɩ-m wɑɣɑlɩ-m, nyɑ́ sɔɔlʋɣʋ kǝlɑ-m sʋlʋm.

³Nyɑ́ tulɑɑlʋ sɔɔsʋŋ kɛ́ kʋpɑŋ kɛ́. Nɑ nyɑ́ hǝtɛ nɑ́ɑ́ wɛ ɩsɩɩ nim sɔɔsʋŋ nɩɩkʋɣʋ tɔ. Pǝ tɔɔ kɛ́ pɛɛlɑɑ sɔɔlǝɣɩ-ŋ.

⁴Tɔkɩ mɑ niŋ tɑɑ, kpɑɣɑnɑ-m ɑsewɑ. Wulɑʋ sʋsɑ-m ɩ kutuluŋ tɑɑ kɛ́. Tɩɩ wɛɛnɑ lɑŋhʋlʋmlɛ nɑ tǝ́ ŋmɑɑlɩ nyɑ́ tɔɔ. Tɩɩ yɔɔlǝnɑ nyɑ́ sɔɔlʋɣʋ nɑ pǝ́ kǝlɩ sʋlʋm. Pɑ sɔɔlǝɣɩ-ŋ tɔ pɑ wɛnɑ tɑmpɑnɑ kɛ́.

⁵Yosɑlɛm pɛɛlɑɑ mɛ, pɑɑ mɑ pilɑɑ tɔ, mɑ tewɑɣɑ ɩsɩɩ Ketɑɑ cokɑ, yɑɑ ɩsɩɩ Sɑlʋmɔŋ cokɑ pɔɔŋ.

⁶Ɩ́ tɑɑ nyɑnɑ-m sɩ mɑ kǝlɑ piliŋ. Ilim piisinɑ-m mpʋ. Mɑ tɑɑlʋnɑɑ mʋ-m nɑ pɑ́ɑ́nɑ́ kɛ́, pɑ tʋ-m sɩ mɑ tɑŋ lɛsɛŋ tɩɩŋ tɑwɑ. Ɩlɛ mɑ tɑ tɑŋ mɑ mɑɣɑmɑɣɑ mɑ nyǝntɛ.

⁷Nyɑ́ wei mɑ lǝsɑɣɑ sʋʋwɑ tɔ. Heeli-m timpi n tiikiɣi nyɑ́ kɑlǝkʋ tɔ. Kɛɛsɩ-m timpi n kɑ hɛɛsɩ ilim sikuɣu tɔ. Mɑ tɑɑ cɔɔ yem kɛ́ nyɑ́ tɑɑpɑlɑɑ kɑlǝkǝŋ cɔlɔ.

⁸Alɑɑ telɑɑ tɑɑ telu nyɑ́. Ye n tɑ nyɩ ɩlɛ n tǝŋ heeŋ kɑlǝkʋ nɔɔhɛɛ. Tiiki nyɑ́ pinɑsɩ kɛ tiikilɑɑ cokɑ kiŋ.

⁹Mɑ kʋsɔɔlɑɣɑ nyɑ́, nyɑ́ teu nǝɣǝsǝnɑ kɛ́ ɩsɩɩ pɑ kpɛɛlʋɣʋ Icipiti wulɑʋ kpɑɣɑnʋ ɑlʋnyǝŋ kɛɛkɛ nɑ kɑcɔkɑ tɔ.

¹⁰Nyɑ́ lukpuɣutu tewɑ nyɑ́ ŋkpɑŋyɑpǝlɑsɩ hɛkʋ kɛ́. Nɑ nyɑ́ luɣu nɑ́ɑ́ sǝŋɑ teu kɛ lɩɩtʋ hɛkʋ tɑɑ.

¹¹Tɩɩ lu-ŋ wʋlɑ kɛ kɑcɔkɑ wontu nɑ pɑ́ mɑtɩ tǝ tɔɔ kɛ́ liɣitee nyǝɣǝtʋ.

¹²Wulɑʋ nɑ ɩ cɔlɔ nyǝ́mɑ pɑ cɑɣɑɑ tɔ nɑ mɑ tɔɔ tulɑɑlʋ sɔɔsʋŋ nyɑlɑɑ kɛ́.

¹³Mɑ kʋsɔɔlʋ nyɑ́, n wɛ-m kɛ́ ɩsɩɩ tulɑɑlʋ miili kɛ pɑ sɩɩ mɑ hǝlɑ hɛkʋ.

¹⁴N wɛ-m kɛ́ ɩsɩɩ lɑɑlinɑɑ kʋpɑmɑ tɩɩŋ kɛ Aŋ-Ketii lɛsɛŋ tɑwɑ tɑɑ.

¹⁵Mɑ kʋsɔɔlɑɣɑ nyɑ́, ɑmɑ n tewɑ yoo! Nyɑ́ ɩsǝpee tewɑ ɩsɩɩ ɑlukukunɑɑ.