Yontu 9:1-20

¹Tɑfiiti yontu nti pɑ yookinɑ nɔɣɔ səkpelɑɣɑ nɑ tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ.

²Hɑɩ, Tɑcɑɑ mɑɑ sɑ-ŋ nɑ mɑ lotu tənɑ, nɑ mɑ́ yɔɣɔtɩ nyɑ́ təmɑ kʋpɑmpɑnɑ tənɑ tɔm.

³Nyɑɣɑ mɑɑ yɔɔlənɑ nɑ lɑŋhʋlʋmlɛ nɑ mɑ́ wiliti, nɑ mɑ́ yoo ɩsɔtɑɑ Ɩsɔ Sɔsɔ nyɑɣɑ yontu.

⁴Mɑ kolontunɑɑ tulɑ tɑpəŋ nɑ pɑ́ seliɣi nyɑ́ ɩsɛntɑɑ nɑ pɑ́ hotiɣi.

⁵N tɑɣɑnɑ mɑ tɔm nɑ ń hɑ-m tɑmpɑnɑ. Siɣisuɣu kɛ n təŋəɣɩ nɑ ń hʋʋkənɑ nyɑ́ kumte tɔɔ.

⁶N hɔŋ piitimnɑɑ mɑ tɑ nyɩ ɩsɔnɑɑ mpɛ pɑ ŋkpɑŋŋ kɛ́, nɑ ń wɑkələɣɩ ɑsɑɣɑɑ mpɛ, nɑ ń hɩɩsəɣɩ pɑ həlɑ kɛ tɑm tɔɔ.

⁷Pə kpiisɑ-wɛ nɑ pɑ́ lɑ́ yem kɛ́ tɑm tɔɔ, nɑ pɑ ɑcɑlɛɛ pəsɩ kpɛntəlɑsɩ, nɔɣɔlʋ ɩɩ tɔɔsəɣɩ ɑ tɔɔ.

⁸Amɑ Tɑcɑɑ kɑ tɔɣɔnɑ kɑwulɑɣɑ kɛ tɑm tɔɔ. Ɩ sɩɩwɑ ɩ hʋʋlɛ kumte.

⁹Ɩnɩ ɩ hʋʋkənɑ ɑntulinyɑ yəlɑɑ nɑ siɣisuɣu, nɑ ɩ́ təŋəɣɩ tɑmpɑnɑ ɩɩ fɑɣɑsəɣɩ piitimnɑɑ.

¹⁰Tɑcɑɑ kentiɣinɑ mpɑ lɛlɑɑ muɣuliɣi tɔ nɑ pɑ́ cɔɔsəɣɩ ɩ kiŋ kɛ pɑ lɑŋwɑkəllɛ wɑɑtʋnɑɑ.

¹¹Hɑɩ Tɑcɑɑ, mpɑ pɑ nyəmɑ́ nyɑ́ hətɛ tɔ, pɑ tʋɣʋ-ŋ nɑɑni kɛ́. Mpi tɔ, nn lɔɔkɩ mpɑ pɑ pɛɛkəɣɩ-ŋ tɔ.

¹²Ɩ́ yoo Tɑcɑɑ wei ɩ kumte wɛ Siyɔŋ tɔɣɔ yontu, ɩ́ kpɑɑlɩ ɩ kookɑlənɑɑ tɔm kɛ piitimnɑɑ tɑɑ.

¹³Mpi tɔ, ɩ kɑ́ lɛɛtɩ yʋlʋkʋlɑɑ, nɑ ɩ́ tɔɔsɩ wɑhɑlɑ nyə́mɑ tɔɔ, ɩɩ sɔɔkɩ pɑ wiinɑʋ tɔm.

¹⁴Hɑɩ Tɑcɑɑ, nyənɩ mɑ pətɔɔtəlɛ, nɑ ń nɑ wɑhɑlɑ wei mɑ kolontunɑɑ tʋɣʋ-m tɔ. Ləsɩ-m səm nɔɣɔ tɑɑ.

¹⁵Wɑɑtʋ ɩnəɣɩ mɑɑ yoo nyɑ́ sɑmtʋ tənɑɣɑ Siyɔŋ nyə́mɑ tɑɑ. Nɑ mɑ́ yɔɔlənɑ nyɑ́ wɑɑsʋɣʋ tɔm.

¹⁶Piitimnɑɑ hotɑ pʋʋɣʋ ŋku pɑ hulɑɑ tɔ kʋ tɑɑ kɛ́. Pɑ puluɣu ŋku pɑ mɑɣɑmɑɣɑ pɑ nyəpɑ tɔ ŋkʋ kʋ kpɑnɑ-wɛ.

¹⁷Tɑcɑɑ hʋlɑ ɩ tɩ nɑ ɩ́ təŋəɣɩ tɑmpɑnɑ nɑ ɩ́ hʋʋkənɑ. Yʋlʋ ɩsɑɣɑʋ kpɑ ɩ təɣɩ ɩ mɑɣɑmɑɣɑ ɩ kɑtɔkɑ tɑɑ.

¹⁸Asɑɣɑɑ nɑ piitimnɑɑ mpɑ pɑ tənɑ pɑ sɔɔ Ɩsɔ tɔɔ tɔ, pɑɑ məlɩ ɑtɛtəlɛ tɑɑ.

¹⁹Amɑ Ɩsɔ nɑ́ kɑɑ sɔɔ wɑhɑlɑ nyə́mɑ tɔɔ. Kʋnyɔntʋnɑɑ tɛɛlʋɣʋ nɑ́ kɑɑ sɑɑlɩ pɑɑ pəlee.

²⁰Hɑɩ, Tɑcɑɑ kʋlɩ, yʋlʋ ɩ tɑɑ tɔɣɔ nyɑ́ tɔɔ. Kɔnɑ mpɑ pɑ tɑ nyɩ-ŋ tɔɣɔ nyɑ́ ɩsɛntɑɑ nɑ ń hʋʋnɑ-wɛ.