Yontu 94:3-23

³Hɑɩ, Tɑcɑɑ, ɑsɑɣɑɑ mpɛ pɑɑ wɛɛ mpʋɣʋlɛ? Mpɛ pɑɑ wɛɛkənɑ ntɛɣɛ ɑkɑnɑɑ kɛ mpʋ?

⁴Pɑ yɔɣɔtəɣɩ tɔm kɛ́ nɑ kɑlɑmpɑɑnɩ nɑ pɑ́ pɛɛkəɣɩ lɛlɑɑ wɑkəlʋɣʋ.

⁵Tɑcɑɑ, pɑ ŋmɑkələɣɩ nyɑ́ yəlɑɑ kɛ́, nɑ pɑ́ muɣuliɣi mpɑ pɑ kɛ́ nyɑ́ nyə́mɑ tɔ.

⁶Pɑ lɛntəɣɩ mʋsʋŋ kɛ leelɑɑ nɑ mʋʋlɑɑ nɑ pɑ́ kʋɣɩ suluwɑɑ.

⁷Nɑ pɑ́ tɔŋ sɩ Tɑcɑɑ ɩɩ nɑɑkɩ, Yɑkɔpʋ Ɩsɔ ɩɩ pɑɑsəɣənɑ.

⁸Kʋmɛlɛməŋ mɛ ɩ́ lɑ lɑɑkɑlɩ, ləmɑɣɑsɛɛ fɛɩnɑɑ mɛ, pəlee kɛ́ ɩ́ kɑ́ hii lɑɣɑtʋ?

⁹Tɑcɑɑ wei ɩ tʋ yəlɑɑ kɛ ŋkpɑŋŋ tɔ, ɩ nɩɩkɩ kɛ́. Ɩsənɑɣɑ ɩ kɑ́ tʋ ɩsəlɛ nɑ ɩɩ nɑɑkɩ?

¹⁰Ɩsənɑɣɑ ɩ nɑɑsəɣɩ piitimnɑɑ nɑ ɩ́ kɑɑ hɔ ɑsɑɣɑɑ ŋkpɑŋŋ? Ɩnɩ ɩ sɛɣɛsəɣənɑ yəlɑɑ, ɩlɛ ɩsənɑɣɑ ɩ kɑ́ lɑŋ nyəm?

¹¹Tɑcɑɑ nyəmɑ́ yʋlʋ hʋwɛɛ kɛ teu sɩ ɑ wɛ kpɛtɛ.

¹²Hɑɩ, Tɑcɑɑ, nyʋleleŋ tʋ ntɛ́ wei n sɛɣɛsəɣɩ nyɑ́ kiiu nɑ ń hɔŋ ɩ ŋkpɑŋʋɣʋ tɔ.

¹³Ɩ kɑ́ cɑɣɑ təpɑmm kɛ kʋyɛɛŋ ɩsɑɣɑŋ tɑɑ, hɑlənɑ pɑ́ huli ɑsɑɣɑɑ pɔɔŋ.

¹⁴Pə tɑɣɑ pʋlʋ, Tɑcɑɑ ɩɩ lɔɔkɩ ɩ yəlɑɑ. Ɩ kɑɑ yele mpɑ pɑ kɛ́ ɩ nyə́mɑ tɔ.

¹⁵Mpi tɔ, pɑɑ hʋʋnɑ kɛ́ nɑ pə́ kɛɛsənɑ tɑmpɑnɑ təŋʋɣʋ. Pɑ tənɑ mpɑ pɑ təŋəɣɩ tɑmpɑnɑ tɔ pɑ lɑŋɑ kɑ hɛɛnɑ-tɩ.

¹⁶Awe kɑ́ sɛɛnɑ mɑ tɔɔ kɛ́ ɑsɑɣɑɑ mpɛ pɑ tɔm tɑɑ? Awe kɑ́ sənɑ-m mpɑ pɑ lɑkɩ ɩsɑɣɑtʋ tɔ pɑ tɔm tɑɑ?

¹⁷Ye Tɑcɑɑ tɑɑ wɑɑsɩ-m, ɩsəntɔ mɑɑ tɛmɑ wɛɛʋ kɛ timpi pə sumɑ tətiɣitiɣi tɔ.

¹⁸Pɑɑ wɑɑtʋ wei kɛ mɑ tɔmɑ sɩ mɑ cɑɑ hotuɣu, Tɑcɑɑ nyɑ́ kʋpɑntʋ teŋi-m kɛ́.

¹⁹Sɑɑ wei nəɣəsɛɛ pɩɩ mɑ lotu tɔ, nyɑ́ hɛɛsənɑ mɑ lɑŋlɛ nɑ ń hʋləsɩ-tɛ.

²⁰Nyɑnɑ hʋʋlɑɑ ɑsɑɣɑɑ mpɑ pɑ wɑkələɣɩ kiiŋ nɑ pɑ́ kɔŋnɑ wɑhɑlɑ tɔ ɩ́ kɑɑwɑɣɑ?

²¹Siɣisilɑɑ kɛ pɑ wɑkələɣɩ nɑ pɑ́ kʋɣɩ mpɑ pɑ tɑ lɑ pʋlʋ tɔ pɑ tɔm.

²²Amɑ Tɑcɑɑ kɛlɛ kʋkpɑmʋɣʋ ŋku mɑ cɔɔsəɣənɑ tɔ.

²³Pɑ mɑɣɑmɑɣɑ pɑ ɩsɑɣɑtʋ kɛ ɩ kɑ́ məŋnɑ pɑ nyɔɔŋ tɑɑ, nɑ ɩ́ wɑkəlɩ-wɛ nɑ kʋlʋmtʋ ntɩ.