Yontu 88:5-16

⁵Mɑ wɛ mpɑ pɑ tiiki pəlɑɑʋ tɑɑ tɔ pɑ looŋɑ tɑɑ kɛ́. Mɑ wɛ ɩsɩɩ yʋlʋ wei ɩ fɛɩnɑ toŋ tɔ.

⁶Sətɑɑ hɛkʋ kɛ mɑ həntɑɑ nɑ mɑ́ nəɣəsənɑ ɩsɩɩ mpɑ pɑ kʋwɑ nɑ pɑ́ hɩɩsɩ pəlɑɑʋ tɑɑ nɑ pə́ fɑɣɑ nyɑnɑ-wɛ, nɑ nn tɔɔsəɣɩ pɑ tɔm tɔ.

⁷Pʋʋɣʋ lumɑŋ nyəŋkʋ tɑɑ kɛ́ n pɛtɑ-m, səkpɛtʋɣʋ tɑɑ kɛ́ pʋʋɣʋ ɑnɑɑm tɑɑ.

⁸Nyɑ́ pɑ́ɑ́nɑ́ tii mɑ tɔɔ kɛ́ nɑ ɑ́ tɑ-m ɩsɩɩ lʋm holɑ.

⁹N hɑtələnɑ-m mɑ cewɑɑ nɑ ń pəsɩ-m ɩsɩɩ ɑcɑɑlətʋ pʋlʋ kɛ pɑ ɩsɛntɑɑ. Pə təkɑ-m pə fɛɩ lɩɩʋ.

¹⁰Wɑhɑlɑ nyəŋsɑ mɑ ɩsɛ kɛ́. Pɑɑ ɩfemle nteɣe mɑ yɑɑkɩ-ŋ Tɑcɑɑ, nɑ mɑ́ tɛkəɣɩ-ŋ niŋ.

¹¹Sətɑɑ kɛ n lɑkɩ piti təmɑ nɑ? Pɑɑ kʋlɩ nɑ pɑ́ sɑ-ŋ?

¹²Sətɑɑ yɔɣɔtəɣɩ nyɑ́ kʋpɑntʋ tɔm kɛ pɑ tɛɣɛ? Yɑɑ nyɑ́ teu tɔm kɛ pɑ yɔɣɔtəɣɩ ɑtɛtəlɛ tɑɑ?

¹³Nɔɣɔlʋ tɑ nyɩ nyɑ́ kɔkɔlɔ nyəmnɑɑ tɔm kɛ səkpɛtʋɣʋ tɑɑ. Pəyele pɑ tɑ nyɩ nyɑ́ siɣisuɣu tɔm kɛ tɛtʋ nti tə tɑɑ yəlɑɑ wɛnɑ ləsɔɔʋ tɔ.

¹⁴Hɑɩ, Tɑcɑɑ, nyɑɣɑ mɑ yɑɑkɩ sɩ ń wɑɑsɩ-m nɑ mɑ́ sələməɣɩ-ŋ pɑɑ tɑnɑŋ ŋku.

¹⁵Tɑcɑɑ, pepe tɔɔ kɛ́ n lɔ-m nɑ nn cɑɑkɩ sɩ ń nɑ-m?

¹⁶Mɑ kɛ́ kʋnyɔntʋ kɛ hɑtoo mɑ pəcɑɑtʋ kɛ́ nɑ mɑ́ wɛ səm nɔɣɔ tɑɑ, nɑ mɑ́ tɔkɩ sɔɣɔntʋ nti n tʋ-m tɔ tə wɑhɑlɑ. Pə pəsɑ mɑ lɑŋlɛ kɛ́.