Yontu 7:2-14

²Tɑcɑɑ, nyɑɣɑlɛ mɑ kentulu. Yɑ-m, wɑɑsɩ-m mɑ kʋnyɔntʋlɑɑ niŋ tɑɑ.

³Pɑ́ tɑɑ cəlɩ-m ɩsɩɩ tɔɣɔlɑsɩ. Nɔɣɔlʋ kɑɑ lɛɛkɩ-m pɑ niŋ tɑɑ nɑ ɩ́ yɑ-m.

⁴Hɑɩ, mɑ Ɩsɔ Tɑcɑɑ, ye mɑ niŋ tɑɑ wɛ ɩsɑɣɑtʋ,

⁵ye mɑ lɑpɑ mɑ tɑɑpɑlʋ nɔɣɔlʋɣʋ ɩsɑɣɑtʋ, yɑɑ mɑ lɛɛtɑ wei ɩ ŋmɑkələɣɩ-m mʋsʋŋ tɔ.

⁶Ɩlɛ mɑ kolontu ɩ́ tɔɣɔnɩ-m nɑ ɩ́ kpɑ-m nɑ ɩ́ fɛlɩ-m ɑtɛ nɑ ɩ́ kʋ-m nɑ mɑ teeli sɩ.

⁷Hɑɩ Tɑcɑɑ, mʋ mɑ kolontunɑɑ nɑ pɑ́ɑ́nɑ́. Kʋlɩ pɑ tɔɔ nɑ ń wɑɑsɩ-m. Nyɑ́ hɑɑnɑ tɑmpɑnɑ, feŋ mɑ tɔɔ.

⁸Piitimnɑɑ ɩ́ cɑɣɑ nɑ pɑ́ cɔɔnɑ-ŋ nɑ nyɑɑ kpɑ nyɑ́ kumte tɔɔ nɑ ń ŋmɑkəlɩ-wɛ.

⁹Hɑɩ Tɑcɑɑ, nyɑ́ wei n hʋʋkənɑ piitimnɑɑ tɔ, kɛɛsənɑ mɑ siɣisuɣu nɑ ń hɑ-m tɑmpɑnɑ.

¹⁰Səŋsɩ ɑsɑɣɑɑ kɑwɑlɑɣɑ nɑ ń sɔɔsɩ siɣisilɑɑ kɛ toŋ. Nyɑ́ nyəmnɑ yəlɑɑ lotunɑɑ tɑɑ hʋwɛɛ tənɑ. Nyɑɣɑlɛ Ɩsɔ nɑ ń təŋəɣɩ tɑmpɑnɑ.

¹¹Nyɑɣɑlɛ mɑ kentulu, nɑ ń wɑɑsəɣɩ tɑmpɑnɑ təŋlɑɑ.

¹²N təŋəɣɩ tɑmpɑnɑ kɛ nyɑ́ hʋʋlɛ tɑɑ kɛ́ nɑ ń mʋɣɩ ɑsɑɣɑɑ nɑ pɑ́ɑ́nɑ́ kɛ tɑm.

¹³Ye pɑ kisɑ lɑɣɑsʋɣʋ, n sɑləɣɩ nyɑ́ lɑɣɑtɛ kɛ́ nɑ ń pɑ́ nyɑ́ tɔɔʋ nɑ ń tɔ-wɛɣɛ nyəmɑ́.

¹⁴Yoou wontu kʋkʋkʋtʋ kɛ n tɑɣɑnəɣɩ nɑ ń tɑntəɣɩ kɔkɔ nyəmɑ́.