Text copied!
CopyCompare
PIIPILI ƖSƆ TƆM TAKƎLAƔA - Yontu - Yontu 78

Yontu 78:3-71

Help us?
Click on verse(s) to share them!
3Nti tɑ́ cɑɑnɑɑ kɛɛsɑ-tʋ nɑ tə́ nɩɩ nɑ tə́ nyɩ-tɩ tɔ.
4Pə fɛɩ sɩ tə́ ŋmɛsɩ-təɣɩ tɑ́ piyɑ. Tɩɩ kɛɛsɩ tɑ́ piyɑ piyɑ kɛ Tɑcɑɑ sɑmtʋ tɔm. Nɑ ɩ tomɑ nɑ piti təmɑ wenɑ ɩ lɑpɑ tɔ pə tɔm.
5Ɩsɔ tʋwɑ kʋtʋtʋtʋ nɑ ɩ́ sɩɩ kiiu kɛ ɩ yəlɑɑ kɛ Ɩsɛɣɛlɩ tɑɑ. Nɑ kiiŋ ɩnɩ ɩ́ hʋlɩ tɑ́ cɔsɔnɑɑ sɩ pɛlɛ pɑ́ sɛɣɛsɩ-təɣɩ pɑ piyɑ.
6Ɩlɛnɑ pɛlɛ pɑ piyɑ nyɩ-tɩ, nɑ səlɛ sɩ tɔɔwɑ ɩlɛ sɩ sɛɣɛsɩ-təɣɩ sɩ piyɑ.
7Ɩlɛnɑ pɑ́ tʋ Ɩsɔ kɛ́ nɑɑni pɑ tɑɑ sɔɔ ɩ təmɑ tɔɔ, nɑ pɑ́ tɔkɩ ɩ kʋsəsɩɩtʋ.
8Ɩlɛ pɑ kɑɑ təŋ pɑ cɑɑnɑɑ ɩkpɑtɛ. Pɛlɛ pɑɑ kɛ́ kɑɑnɩɩtʋnɑɑ nɑ tɔɔ kʋllɑɑ piitim kɛ́. Pɑ fɛɩ nɑɑni, pə́cɔ pɑɑ təŋəɣɩ Ɩsɔ kɛ́ teu kɛ pɑ ləmɑɣɑsɛɛ tɑɑ.
9Ɩfəlɑyim lʋlʋɣʋ nyə́mɑ mpɑ pɑ kɛ́ tɔtɔlɑɑ tɔ, pɑ sewɑ yoou kɛ kʋ wule.
10Pɑ tɑ́ tɔkɩ pɑ́ nɑ Ɩsɔ pɑ nɔɣɔ pɛɛlʋɣʋ. Pɑ kisɑ ɩ kiiŋ tɑɑ tɔntɛ.
11Pɑ sɔɔwɑ Ɩsɔ kookɑlənɑɑ nɑ ɩ təmɑ sɔsɔɔnɑ wenɑ ɩ kɑ yelɑɑ nɑ pɑ́ nɑ́ tɔ.
12Ɩsɔ kɑ lɑpɑ kɔkɔlɔ nyəmnɑɑ kɛ Icipiti hɔɣɔlʋɣʋ ŋku pɑ yɑɑ sɩ Sowɑŋ tɔ kʋ tɑɑ kɛ́ pɑ cɔsɔnɑɑ ɩsɛntɑɑ kɛ́.
13Ɩsɔ fɑɣɑ lʋm nɑ pə́ yele-wɛɣɛ mpɑɑʋ nɑ pɑ́ tɛɛ nɑ ɩ́ kɑɑ-wəɣɩ huɣule ɩsɩɩ koluŋɑ.
14Ɩsɔŋmʋntʋɣʋ hʋlɑɣɑnɑ-wɛɣɛ mpɑɑʋ kɛ ilim tɑɑ, ɩlɛnɑ kʋ mʋɣɩ kɔkɔ kɛ pɑɑ ɑhoo nnɑ.
15Ɩsɔ fɑɣɑ kʋkpɑmʋɣʋ kɛ wʋlɑɣɑ tɛtʋ tɑɑ nɑ ɩ́ yele nɑ pɑ́ nyɔɔ tɛtʋ tɛɛ lʋm.
16Ɩsɔ lɑpɑ nɑ lʋm sɛɛlɑɑ lɩɩnɑ kʋkpɑmʋɣʋ tɑɑ nɑ pə́ kpe ɩsɩɩ pusi.
17Amɑ tɑ́ cɑɑnɑɑ tɔŋɑ ɩsɔtɑɑ Ɩsɔ sɔsɔ kɛ pəntənɑʋ nɑ pɑ́ kʋləɣɩ Ɩsɔ tɔɔ kɛ́ wʋlɑɣɑ tɛtʋ tɑɑ tənɑ.
18Tɑ́ cɑɑnɑɑ mɑɣɑsɑ Ɩsɔ kɛ́ pɑ tɑɑ sɩ pɑ nɑɑ ɩ wɑɑlɩ, kɛ timpi pɑ sələmɑ-ɩ tɔɣɔnɑɣɑ ɩsɩɩ pɑ sɔɔlɑɑ tɔ.
19Hɑlənɑ pɑ́ tʋʋ Ɩsɔ sɩ: Nn pəsəɣɩ nɑ ń cɑlɩ-tʋɣʋ tɔɣɔnɑɣɑ kɛ wʋlɑɣɑ tɛtʋ tɑɑ.
20Tɑmpɑnɑ n mɑpɑ kʋkpɑmʋɣʋ nɑ lʋm kpe, nɑ pə́ hɛɛ lɔɔŋ yɑɑ. Ɩlɛ n pəsəɣɩ nɑ ń hɑ nyɑ́ yəlɑɑ kɛ tɔɣɔnɑɣɑ nɑ nɑntʋ nɑ?
21Ḿpʋɣʋ Tɑcɑɑ n nɩɩwɑ nɑ pɑ́ɑ́nɑ́ kpɑ-ŋ nɑ nyɑ́ tɑɑ hɑŋnɑ Ɩsɛɣɛlɩ nyə́mɑ ɩsɩɩ kɔkɔ,
22kɛ timpi pɑ tɑ tɛ-ŋ nɑ pɑ tɑɑ tɔ. Pɑ tɑ lɑ nɑɑni kɛ́ nyɑ́ wɑɑsʋɣʋ tɔm.
23Ḿpʋɣʋ n yɔɣɔtənɑ ɩsɔŋmʋntʋ nɑ ń tʋlɩ ɩsɔtɔnʋɣʋ tɑɑ nɔnɔɔsɩ.
24Nɑ ń yele nɑ Mɑnnɑ*fɑ* hoti pɑ tɔɔ ɩsɩɩ tɛʋ sɩ pɑ tɔɣɔ. Ɩsɔtɑɑ tɔɣɔnɑɣɑ kɛ n hɑ nyɑ́ yəlɑɑ kɛ mpʋ.
25Ɩsɔtɑɑ tillɑɑ tɔɣɔnɑɣɑ kɛ n hɑ-wɛ, nɑ pɑ́ tɔɣɔ nɑ pɑ́ hɑɣɑ.
26Ḿpʋɣʋ Ɩsɔ n yelɑɑ nɑ ilim təlɩɩlɛ heelim mɑ́, nɑ ń kɔnɑ ilim mpətəŋ tɔɔ nyəm nɑ nyɑ́ toŋ.
27Nɑ ń lɑ́ nɑ nɑntʋ tii pɑ tɔɔ ɩsɩɩ mʋsʋɣʋ. Sumɑsɩ tuutuumɑ kɛ n kɔnɑ-wɛ ɩsɩɩ teŋkunɑɑ nɔɔsɩ kɑnyəŋɑ.
28N lɑpɑɣɑ nɑ sɩ hoti tɑ́ cɑɑnɑɑ təsikile nɑ sɩ cɔɔnɑ pɑ təcɑɣɑlɛ.
29Tɑcɑɑ hɑ-wɛɣɛ mpi pɑ nyɩɩlɑɣɑ tɔ. Ɩlɛnɑ pɑ́ tɔɣɔ nɑ pɑ́ hɑɣɑ kɑtɑtəlɑɣɑ.
30Tɑ́ cɑɑnɑɑ tɔɣɔnɑɣɑ kɑ wɛ pɑ nɔɔsɩ tɑɑ kɛ́, pɑ luluŋ tɑ tɩɩ sətɑ,
31ḿpʋɣʋ Ɩsɔ tɑ́ɑ́ huunɑ-wɛ nɑ ɩ́ kʋ Ɩsɛɣɛlɩ ɩfepiyɑ tɑɑ ɩfepiyɑ.
32Pɑɑ nɑ mpʋ tɔ, pɑ tɑ tʋnɑ nyɑ́ kɔkɔlɔ nyəmnɑɑ nɑ pɑ́ tɔŋɑ ɩsɑɣɑtʋnɑɑ kɛ lɑpʋ.
33Ḿpʋɣʋ n kpiisɑ-wɛ nɑ heelim, nɑ ń tisi wɑhɑlɑ kɛ́ pɑ tɔɔ kɛ kpɑkpɑɑ, nɑ ń sɩɩ pɑ weesiŋ tənɑɣɑ.
34Wɑɑtʋ wei səm kɔŋ tɑ́ cɑɑnɑɑ ɩlɛnɑ pɑ́ kɛɛsənɑ Ɩsɔ nyɑ́ tɔɔ nɑ pɑ́ pɛɛkəɣɩ sɩ ń kenti pɑ tɔɔ.
35Nɑ pɑ́ tɔɔsɩ sɩ n kɛ́ pɑ kʋkpɑmʋɣʋ. Ɩsɔtɑɑ Ɩsɔ Sɔsɔ kɛ́ pɑ wɑɑsʋlʋ.
36Amɑ pɑ ntompee kɛ pɑ puɣusɑɣɑnɑ-ŋ nɑ pɑ́ looliɣi-ŋ nɑ pɑ nsəmɑ.
37Pɑ tɑɑ tɛŋɩ-ŋ nɑ pɑ tɑɑ kɛ́ teu, pəyele pɑ tɑ tɔkɩ nyɑ́ nɑ-wɛ mə nɔɣɔ pɛɛlʋɣʋ.
38Pɑɑ nɑ mpʋ, nyɑ́ suulu tɔɔ, n wiiki ɩsɑɣɑlɑtɑɑ pətɔɔtəlɛ, nn wɑkələɣɩ-wɛ. N kpɑɑ nyɑ́ təɣɩ tɑm kɛ́, nn hɑɑkɩ nyɑ́ təɣɩ nyɑ́ pɑ́ɑ́nɑ́ tənɑ tɑɑ.
39Nɑ ń tɔɔsɩ sɩ tɑ cɑɑnɑɑ kɛ́ yəlɑɑ kɛ yem kɛ́. Pɑ kɛ́ heelim mpi pə tɛɛkɩ pə kɑɑ məlɩ tɔɣɔ.
40Tɑ́ cɑɑnɑɑ kʋlɑ nyɑ́ tɔɔ kɛ́ wʋlɑɣɑ tɛtʋ tɑɑ nɑ pɑ́ kpɑɑsəɣɩ nyɑ́ pɑ́ɑ́nɑ́ tɔ pə fɛɩ kɑlʋɣʋ.
41Pɑ tɑ hɛɛsɩ Ɩsɔ nyɑɣɑ mɑɣɑsʋɣʋ sɩ pɑ nɑɑkɩ nyɑ́ wɑɑlɩ, nɑ pɑ́ kpɑɑsəɣɩ Ɩsɛɣɛlɩ Ɩsɔ Nɑŋŋ tʋ nyɑ́ nyɑ́ pɑ́ɑ́nɑ́.
42Pɑ tɑ tɔɔsɩ Ɩsɔ nyɑ́ nyɑ́ toŋ tɔɔ nɑ ɩsənɑ n kɑ yɑpɑ-wɛɣɛ kolontu niŋ tɑɑ tɔ.
43Tɑ cɑɑnɑɑ sɔɔ piti təmɑ wenɑ n kɑ lɑpɑ Icipiti tɛtʋ tɑɑ nɑ kɔkɔlɔ nyəmnɑɑ mpɑ n lɑpɑ Sowɑŋ hɔɣɔlʋɣʋ tɑɑ tɔ.
44N pəsɑ Icipiti nyə́mɑ pusi lʋm kɛ cɑləm nɑ pɑ́ wɩɩ sɩ lʋm kɛ nyɔɔʋ.
45Nɑ ń kɔnɑ-wɛɣɛ kɑcɔsɩ sɔtʋ nyənsɩ nɑ sɩ́ nyɔɔ pɑ cɑləm. Nɑ sɑlɛɛ, nɑ ɑlɛ ɑ wɑkəlɩ-wɛ.
46Nɑ ń tʋ pɑ tɑwɑ nɑ pɑ hɑtəmʋtʋ kɛ kʋtoloŋ.
47Nɑ ń yele nɑ tɛʋ ɩsɑɣɑʋ nɑ tɔmpɛɛ wɑkəlɩ pɑ lɛsɛŋ tɩɩŋ nɑ tɩɩŋ kʋlʋlʋŋ lɛləŋ.
48Nɑ tɛʋ tɔmpɛɛ kʋ pɑ tɔlɑ nɑ kʋ nɑsɩ pɑ kɑləkəŋ.
49Ḿpʋɣʋ Ɩsɔ nyɑ́ n mʋ Icipiti nyə́mɑ nɑ pɑ́ɑ́nɑ́ sɔsɔɔnɑ nɑ nyɑ́ tɑɑ huunɑ-wɛ nɑ pɑ lɑŋɑ wɑkəlɩ, nɑ ń tilinɑ-wɛɣɛ ɩsɔtɑɑ tillɑɑ wɑkəllɑɑ kpekəle.
50N hɑɣɑ-wɛ nɑ nyɑ́ pɑ́ɑ́nɑ́ kɛ ḿpʋɣʋ, pə tɑɣɑ səm tike kɛ n tʋ-wɛ. Amɑ n sʋsɑ-wɛɣɛ wɑhɑlɑ tɑɑ nɑ pɑ ɩsɛ.
51Nɑ ń kʋ Icipiti nyə́mɑ ɑpɑlʋpiyɑ kɑncɑɑlɑɣɑ nyənsɩ tənɑ. Kɑm lʋlʋɣʋ nyə́mɑ ɩwɩɩlɛ kɑncɑɑlɑɣɑ nyəntɛ səpənɑ mpʋ.
52Ḿpʋɣʋ n tiikɑ nyɑ́ yəlɑɑ nɑ ń tɛɛnɑ-wɛ ɩsɩɩ pɑ ləsʋɣʋ heeŋ kɛ kɑləkʋ tɑɑ tɔ, nɑ ń tiiki-wɛɣɛ wʋlɑɣɑ tɛtʋ tɑɑ ɩsɩɩ tɔlɑ.
53N ponɑ-wɛɣɛ nɑ nɑɑni, sɔɣɔntʋ fɛɩ-wɛ, nɑ teŋku li pɑ kolontunɑɑ.
54Pə wɑɑlɩ kɛ́ n ponɑ-wɛɣɛ nyɑ́ tɛtʋ nɑŋŋ nyəntʋ tɑɑ kɛ́ pʋɣʋ ŋku n mʋwɑ tɔ kʋ tɔɔ.
55Nɑ n tɔɣɔnɩ Kɑnɑɑŋ piitimnɑɑ nɑ n tɑlɑ yəlɑɑ kɛ pɑ tɛtʋ nɑ ń sɩɩ Ɩsɛɣɛlɩ kpekɑ yəlɑɑ kɛ pɑ tɛɛsɩ tɑɑ.
56Pɑɑ nɑ mpʋ tɔ pɑ́ mɑɣɑsɑ ɩsɔtɑɑ Ɩsɔ Sɔsɔ nyɑ́ nɑ pɑ́ kʋlɩ nyɑ́ tɔɔ, pɑ tɑ tɔkɩ nyɑ́ kʋsəsɩɩtʋ.
57Pɑ hɑtələnɑ Tɑcɑɑ nyɑ́ nɑ pɑ́ pəsɩ tɛtɛlɑtɑɑ ɩsɩɩ pɑ cɑɑnɑɑ. Pɑ yɔɔləɣɩ ɑpɑlʋtʋ kɛ́ ɩsɩɩ tɔɔʋ ŋku kʋ hikɑ fitɑɑ tɔ.
58Tɑ́ cɑɑnɑɑ kʋsɑ Ɩsɔ nyɑ́ nyɑ́ pɑ́ɑ́nɑ́ nɑ pɑ təfɛɛnlɛnɑɑ nɑ pɑ́ kʋsɩ nyɑ́ ɩsɛsɛɛmlɛ nɑ pɑ tɩɩŋ.
59Ɩsɔ n nɩɩ mpʋ ɩlɛnɑ pə́ kʋsɩ nyɑ́ pɑ́ɑ́nɑ́ nɑ ń kpiisi Ɩsɛɣɛlɩ nyə́mɑ nɑ toŋ.
60Nɑ ń lɔ nyɑ́ təyɑɣɑ ŋkɑ kɑ tɑɑ n kɑ wɛ nyɑ́ yəlɑɑ hɛkʋ kɛ Silo tɔ.
61Nɑ ń yele nɑ kolontunɑɑ lɛɛkɩ nyɑ́ ɑtɑkɑɑ wei ɩ hʋləɣɩ nyɑ́ toŋ nɑ nyɑ́ teeli tɔ.
62Ɩlɛnɑ ń mʋ pɑ́ɑ́nɑ́ nɑ nyɑ́ yəlɑɑ, nɑ ń yele nɑ pɑ́ kʋ-wɛ.
63Yoou kʋwɑ tɑ cɑɑnɑɑ ɩfepiyɑ, pɑ pɛɛlɑɑ tɑ hiki mpɑ pɑɑ sɑɑ tɔ.
64Pɑ kʋwɑ pɑ kɔtəlɑɑ kɛ yoou tɑɑ, pɑ leelɑɑ tɑ wii-wɛ.
65Ḿpʋɣʋ Tɑcɑɑ n kʋlɑɑ ɩsɩɩ tomtoolu, yɑɑ sʋlʋm cɛkʋɣʋ yoolɑɑ tɑɑ yoolu ɩsɛntɔɔ tɔ.
66Nɑ ń kʋ nyɑ́ kolontunɑɑ nɑ pɑ́ tɔŋɑ sewɑ, nɑ ń tʋ-wɛɣɛ fɛɛlɛ kɛ tɑm tɔɔ.
67Pɑɑ nɑ mpʋ n lɔwɑ Yosɛɛfʋ təyɑɣɑ, n tɑ ləsɩ Ɩfəlɑyim kpekəle nyə́mɑ mpɛ.
68Amɑ Yutɑ kpekəle nɑ Siyɔŋ pʋɣʋ kɛ n sɔɔlɑɑ nɑ ń ləsɩ.
69Nɑ ń ŋmɑ nyɑ́ təsɛɛlɛ nɑ tə́ kʋlɩ sɔsɔm nɑ tə́ wɛɛ toŋ ɩsɩɩ tɛtʋ nti n sɩɩ tɑm tɔɔ tɔ.
70Nɑ n ləsɩ nyɑ́ təmlɛ tʋ Tɑfiiti. Ntiɣile tɑɑ kɛ́ n polɑɑ nɑ ń kpɑɣɑ-ɩ.
71Kɑləkʋ wɑɑlɩ kɛ́ n kpɑɣɑ-ɩ. Sɩ ɩ́ pəsɩ ɩ yəlɑɑ Ɩsɛɣɛlɩ nyə́mɑ mpɑ n sɔɔlɑ teu tɔ pɑ tiikulu.

Read Yontu 78Yontu 78
Compare Yontu 78:3-71Yontu 78:3-71