Yontu 71:5-23

⁵Tɑcɑɑ Ɩsɔ, nyɑɣɑ mɑ tɛɛləɣɩ, nyɑɣɑ mɑ pɛtɑ mɑ təɣɩ hɑtoo mɑ pəcɑɑtʋ.

⁶Hɑtoo mɑ too lotu tɑɑ nyɑɣɑ mɑ tekiɣi, nyɑ́ ləsənɑ-m mɑ too tɑɑ, nyɑɣɑ mɑ sɑŋ tɑm.

⁷Mɑ kɛ́ kɔkɔlɔ nyəm kɛ yəlɑɑ pɑɣɑlɛ kɛ́. Nyɑɣɑlɛ mɑ kpʋlʋɣʋ tətʋlɛ toŋ nyəntɛ.

⁸Nyɑ́ sɑmtʋ yontu tike ɩ́ wɛɛ mɑ nɔɣɔ tɑɑ. Pə wɛɛ sɩ mɑ yɔɣɔtəɣɩ nyɑ́ teeli tɔm kɛ pɑɑ ɩfemle nte.

⁹Tɑɑ lɔ-m, nɔɔnɔɔ mɑ kpɑtəlɑɑ kɛ́. Wɑɑtʋ wei mɑ tomɑ pɑsəɣɩ tɔ tɑɑ lɔ-m.

¹⁰Mɑ kolontunɑɑ yɔɣɔtəɣɩ mɑ tɔm kɛ́. Mpɑ pɑ cɛŋəɣɩ mɑ weesuɣu tɔ pɑ lɑkɩ təmɑɣɑ sɑɑwɑlɑ sɩ:

¹¹Ɩsɔ lɔ-ŋ kɛ́, tə təŋɩ-ŋ nɑ tə kpɑ-ŋ. Mɑ fɛɩnɑ nɔɣɔlʋ sɩ ɩ́ lɛɛkɩ-m pɑ niŋ tɑɑ.

¹²Hɑɩ, Ɩsɔ, tɑɑ hɑtələnɑ-m. Mɑ Ɩsɔ kɔɔ lɔŋ nɑ ń wɑɑsɩ-m.

¹³Pɑ tənɑ mpɑ pɑ suuki-m tɔm tɔ, pə́ liɣiti-wɛ nɑ pɑ́ sɑɑlɩ yem, nɑ fɛɛlɛ tɔɣɔ mpɑ pɑ cɑɑ mɑ lepu tɔ.

¹⁴Ɩlɛ mɑɑ tɛɛləɣɩ tɑm, nɑ mɑ́ sɑŋɩ-ŋ nɑ mɑ́ lɛləɣɩ.

¹⁵Nɑ mɑ nɔɣɔ yɔɣɔtəɣɩ nyɑ́ siɣisuɣu nɑ nyɑ́ nyʋɣʋ yɑpʋ tɔm kɛ pɑɑ kʋyɑkʋ ŋku. Mpi tɔ, mɑ tɑ nyɩ pə tənɑsɩ.

¹⁶Mɑɑ yɔɣɔtɩ nyɑ́ təmɑ sɔsɔɔnɑ tɔm Tɑcɑɑ Ɩsɔ, nɑ mɑ́ tɔɔsɩ nyɑ́ siɣisuɣu tike tɔm.

¹⁷Hɑɩ, Ɩsɔ, hɑtoo mɑ pəcɑɑtʋ kɛ n sɛɣɛsɑ-m, hɑlənɑ sɑŋɑ nyɑ́ teu tɔm kɛ mɑ kpɑɑləɣɩ.

¹⁸Pɑɑ mɑ kpɑtəlɑɑ təkuŋkuŋku, mɑ Ɩsɔ tɑɑ lɔ-m. Ɩlɛ mɑɑ kpɑɑlɩ kʋfɑlɑŋ yəlɑɑ kɛ nyɑ́ tɔm nɑ mɑ́ heeli cele piyɑ kɛ nyɑ́ toŋ tɔm.

¹⁹Hɑɩ, Ɩsɔ, nyɑ́ siɣisuɣu fɛɩ tənɑɣɑ. Pə́cɔ n lɑpɑ kɔkɔlɔ nyəmnɑɑ, nɔɣɔlʋ tɑ nəɣəsənɑ-ŋ.

²⁰N yelɑɑ nɑ tə́ nɑ́ wɑhɑlɑnɑɑ nɑ lɑŋwɑkəllɛ kɛ kɑtɑtəlɑɣɑ, n kɑ́ yele nɑ mɑ́ wɛɛnɑ weesuɣu, nɑ ń ləsɩ-m pʋʋɣʋ sɔsɔɔʋ tɑɑ.

²¹Tɑɣɑnɩ mɑ nyʋɣʋ kɛ kʋsʋɣʋ, hɛɛsɩ mɑ lɑŋlɛ.

²²Ɩlɛ Ɩsɔ mɑɑ sɑ-ŋ nɑ cəmʋɣʋ nɑ mɑ́ yoo nyɑ́ teu tɔm kɛ yontu. Nɑ mɑ́ tɑlɑ Ɩsɛɣɛlɩ Nɑŋŋ tʋ nyɑ́ nɑ sɑŋkʋ.

²³Mɑɑ tɑlɑ-ŋ nɑ yontu, nɑ mɑ́ wiliti-ŋ nɑ mɑ nɔɣɔ sɩ n yɑpɑ mɑ nyʋɣʋ.