Yontu 69:4-13

⁴Mɑ kiisɑɑ nɑ mɑ luɣu tɛɛ wʋlɩ, nɑ mɑ́ kɑ́. Mɑ tekɑ mɑ Ɩsɔ nɑ mɑ ɩsɛ cɑŋ ɑ pɔɣɔlʋŋ tɑɑ.

⁵Mpɑ pɑ tɑɑ kpɑɑnɑ-m mʋsʋŋ tɔ pɑ kəlɑ mɑ nyʋɣʋ tɑɑ nyɔɔsɩ kɛ pɑɣɑlɛ. Mpɑ pɑ cɑɑ sɩ mɑ́ lɑ yem tɔ pɑ kɛ́ toŋtʋnɑɑ kɛ́, mɑ kolontunɑɑ mpɛ pɑ fɛɩnɑ tɑmpɑnɑ. Mpi mɑ tɑ kpɑɣɑ tɔ mpəɣɩ pə wɛɛ sɩ mɑ́ məŋnɑ.

⁶Hɑɩ, Ɩsɔ, n nyəmɑ́ mɑ kʋmɛlɛntʋ, nɑ mɑ kʋlɑpəlɛ ɩsɑɣɑlɛ fɛɩ-ŋ ŋmɛsɑɣɑ.

⁷Mɑ tɔm ɩ́ tɑɑ kpɑ mpɑ pɑ tʋ-ŋ nɑɑni tɔɣɔ fɛɛlɛ. Hɑɩ, Ɩsɛɣɛlɩ nyə́mɑ Ɩsɔ Tɑcɑɑ, mɑ tɔm ɩ́ tɑɑ liɣiti mpɑ pɑ pɛɛkəɣɩ-ŋ tɔ.

⁸Mpi tɔ, nyɑ́ tɔɔ kɛ́ pɑ tʋʋkɩ-m, nɑ fɛɛlɛ wɛ mɑ ɩsɛntɑɑ.

⁹Mɑ pəsɑ ɩsɩɩ mʋʋlʋ kɛ mɑ newɑɑ, yɑɑ kpɑɩtʋ kɛ mɑ təyɑɣɑ nyə́mɑ.

¹⁰Mpi tɔ, mɑ ɩsəlɛ sɛɛnɑ nyɑ́ təyɑɣɑ təmlɛ kɛ́ ɩsɩɩ yem nɑ kpɛtɛ. Nɑ nyɑ́ kʋtʋɣʋ pəsɩ mɑ nyəŋkʋ.

¹¹Mɑ ɩsəlʋm lukiɣi yem kɛ́ nɑ mɑ́ hɔkəɣɩ nɔɣɔ, pɑɑ nɑ mpʋ kʋtʋɣʋ kɛ pə kɔŋnɑ-m.

¹²Pɑɑ mɑ suu ləyɑɣɑ wontu, mɑ pəsɑ wei pɑ tuliɣi ntompee tɔɣɔ.

¹³Mɑ tɔm kɛ pɑ yɔɣɔtəɣɩ kʋyɛɛŋ tɑɑ, nɑ sʋlʋnyɔɔlɑɑ nɑ́ɑ́ yooki-təɣɩ yontu.