Yontu 69:11-35

¹¹Mɑ ɩsəlʋm lukiɣi yem kɛ́ nɑ mɑ́ hɔkəɣɩ nɔɣɔ, pɑɑ nɑ mpʋ kʋtʋɣʋ kɛ pə kɔŋnɑ-m.

¹²Pɑɑ mɑ suu ləyɑɣɑ wontu, mɑ pəsɑ wei pɑ tuliɣi ntompee tɔɣɔ.

¹³Mɑ tɔm kɛ pɑ yɔɣɔtəɣɩ kʋyɛɛŋ tɑɑ, nɑ sʋlʋnyɔɔlɑɑ nɑ́ɑ́ yooki-təɣɩ yontu.

¹⁴Hɑɩ, Tɑcɑɑ, nyɑɣɑ mɑ tekiɣi mɑ sələmʋɣʋ tɑɑ, hʋlʋ-m suulu nɑ ń mʋ. Cɔ-m nyɑ́ kʋpɑntʋ tɔɔ, nɑ ń yɑ mɑ nyʋɣʋ. Mpi tɔ, nyɑ́ nyʋɣʋ yɑpʋ wɛ nɑɑni kɛ́.

¹⁵Kpɛɛ-m ɑfəlɑ tɑɑ, ɑ́ tɑɑ tɑsɑ-m lipu. Yɑ-m lʋm lumɑŋ sɔsɔɔŋ nɑ mɑ kolontunɑɑ mpɑ pɑɑ cɑɑ-m tɔ pɑ niŋ tɑɑ.

¹⁶Lʋm holɑ ɩ́ tɑɑ tɛɛnɑ-m, pə́cɔ lʋhəyɑɣɑ ɩ́ tɑɑ li-m. Tɑɑ yele nɑ pəlɑɑʋ suli mɑ tɔɔ.

¹⁷Tɑcɑɑ, cɔ-m, mpi tɔ, nyɑ́ kʋpɑntʋ tɔɔwɑ sɔsɔm kɛ́. Kɛɛsɩ nyɑ́ ɩsɛ nɑ mɑ tɔɔ kɛ́ nyɑ́ suulu sɔsɔ tɔɔ.

¹⁸Tɑɑ kisi nyənʋɣʋ nɑ nyɑ́ təmlɛ tʋ mɑ́ mɑ tɔɔ. Hɑɩ, cɔ-m lɔŋ, mɑ wɛ lɑŋwɑkəllɛ tɑɑ kɛ́.

¹⁹Kpətənɑ-m, wɑɑsɩ-m, yɑ-m mɑ kolontunɑɑ tɔɔ.

²⁰N nyəmɑ́ mɑ fɛɛlɛ nɑ ɩsənɑ pə pɑsɑ-m tɔ. N nɑɑkɩ mɑ kolontunɑɑ tənɑɣɑ.

²¹Kʋtʋɣʋ wɑkəlɑ mɑ lɑŋlɛ kɛ́ nɑ pə́ tʋ-m kʋtɔŋ. Mɑ tɑŋɑɑ sɩ pɑ́ nyənɩ mɑ pətɔɔtəlɛ yɑɑ pɑ́ puɣusi-m mɑ tɑ nɑ.

²²Pɑ sitiɣi sɔtʋ kɛ mɑ tɔɣɔnɑɣɑ tɑɑ. Nɑ pɑ́ hɑɑkɩ-m lʋm kʋnyəŋəm sɩ mɑ́ nyɔɔ nɑ mɑ lʋkɔtʋ sɩ́.

²³Pɑ ɑcimɑ nɑ pɑ kɔtɑsɩ tɔɣɔnɑɣɑ ɩ́ pəsɩ-wɛɣɛ kɑtɔkɑ ŋkɑ kɑɑ kpɑ-wɛ tɔ.

²⁴Pɑ ɩsɛntɔɔ ɩ́ nyɑlɑ təkpɑm nɑ pɑ́ tɑɑ tɑsɑ nɑʋ, pɑ sɑləməɣənɑ wɑhɑlɑ kɛ tɑm.

²⁵Mʋ-wɛ nɑ nyɑ́ pɑ́ɑ́nɑ́ sɔsɔɔnɑ nɑ ɑ kɔkɔ tɑlɑ-wɛ.

²⁶Pə́ kpiisi pɑ təcɑɣɑlɛ. Nɔɣɔlʋ ɩ́ tɑɑ wɛɛ pɑ tɛɛsɩ tɑɑ.

²⁷Wei ɩ ŋkpɑŋʋɣʋ n hɔmɑ tɔɣɔ mpɛ pɑ tʋ kʋnyɔŋ, nɑ pɑ́ yɔɣɔtəɣɩ mpɑ Ɩsɔ nyɑ́ n kɑ tʋwɑ kʋnyɔŋ tɔ pɑ wɑhɑlɑ tɔm.

²⁸Lɛɛtɩ-wɛɣɛ pɑ ɩsɑɣɑtʋ, tɑɑ hʋlɩ-wɛɣɛ nyɑ́ suulu.

²⁹Pə́ hɩɩsɩ pɑ həlɑ kɛ weesuɣu tɑkəlɑɣɑ tɑɑ, pɑ́ tɑɑ ŋmɑɑ pɑ həlɑ kɛ siɣisilɑɑ nyənɑ tɑɑ.

³⁰Mɑ kɛ́ kʋnyɔntʋ kɛ́ nɑ mɑ́ tɔkɩ wɑhɑlɑ. Hɑɩ, Ɩsɔ nyɑ́ yɑpʋ kɑ́ kenti mɑ tɔɔ.

³¹Hɑɩ, Ɩsɔ, mɑɑ sɑ nyɑ́ hətɛ nɑ yontu, nɑ mɑ́ pʋɣʋlɩ nyɑ́ sɔsɔɔntʋ kɛ mɑ sɑmtʋ tɑɑ.

³²Tɑcɑɑ pəlɛ pə kəlɑ-ŋ teu kɛ mɑ hɑ-ŋ nɑʋ, yɑɑ lɑtəcɛ ɑlɑɑfəyɑ nyəŋ.

³³Mpɑ pɑ pɑsəɣɩ pɑ tɩ tɔ, pɑɑ nɑ́ mɑ yɑpʋ nɑ pɑ lɑŋɑ hʋlʋmɩ. Ɩsɔ wɑɑsʋɣʋ pɛɛkəlɑɑ mɛ, mə weesuɣu ɩ́ tɑɣɑlɩ.

³⁴Mpi tɔ, Tɑcɑɑ nɩɩkɩ kʋnyɔntʋnɑɑ nɔɔsɩ kɛ́. Ɩɩ lɑkɩ ɑwusɑ kɛ ɩ yəlɑɑ kʋpɑmɑ mpɑ pɑ wɛ sɑləkɑ tɑɑ tɔ.

³⁵Ɩsɔtɑɑ nɑ ɑtɛ ɩ́ sɑmɩ-ɩ, nɑ teŋkunɑɑ nɑ pə tɑɑ nyəmnɑɑ pʋɣʋlɩ-ɩ.