Yontu 68:3-30

³Yele nɑ ɑsɑɣɑɑ mpɛ pɑ́ sɑɑlɩ yem kɛ Ɩsɔ ɩsɛntɑɑ, ɩsɩɩ nyɔɔsɩ sɑlʋɣʋ tɔ, yɑɑ ɩsɩɩ keetu hookuɣu kɔkɔ tɑɑ tɔ.

⁴Ɩlɛnɑ siɣisilɑɑ lɑŋɑ nɑ́ɑ́ hʋlʋmɩ nɑ pɑ́ ŋmɑɑlɩ.

⁵Ɩ́ yoo Ɩsɔ kɛ́ yontu nɑ ɩ́ sɑ ɩ hətɛ, ɩ́ hɛɛ-ɩ mpɑɑʋ, ɩnɩ ɩ fɑɣɑnɑ tɛtɛkɑ tɑɑ nɑ ɩ́ kɔŋ. Ɩ hətɛ ntɛ́ Tɑcɑɑ, ɩ́ yɔɔlɩ ɩ ɩsɛntɑɑ.

⁶Ɩnəɣəlɛ suluwɑɑ cɑɑ, nɑ leelɑɑ pɑɑsənlʋ. Ḿpʋɣʋ Ɩsɔ wɛ ɩ təcɑɣɑlɛ nɑŋŋ nyəntɛ tɑɑ tənɑ.

⁷Ɩ hɑɑkɩ kɑtɑyəlɑsɩ kɛ tɛɛsɩ, nɑ ɩ́ yeki nɑ sɑləkɑtʋnɑɑ hɛɛsəɣɩ. Asɑɣɑɑ tike kɛ ɩ yeki wʋlɑɣɑ tɑɑ.

⁸Hɑɩ, Ɩsɔ, wɑɑtʋ wei n lɩɩ nyɑ́ yəlɑɑ nɔɣɔ tɔɔ tɔ, wɑɑtʋ wei n tɛɛ pɑ lɔlɔ kɛ wʋlɑɣɑ tɛtʋ tɑɑ tɔ,

⁹tɛtʋ selɑɑ kɛ́, nɑ ɩsɔtɔnʋɣʋ pəsɩ lʋm. Sinɑyi pʋɣʋ selɑ Ɩsɛɣɛlɩ Ɩsɔ nyɑ́, nyɑ́ ɩsɛntɑɑ.

¹⁰Hɑɩ, Ɩsɔ, n yelɑɑ nɑ tɛʋ kʋpɑŋkʋ nɩɩ, nɑ ń məŋnɑ nyɑ́ kpɑncoou ŋku kɩɩ tɛmɑ tɔ.

¹¹Hɑɩ, Ɩsɔ, nyɑ́ yəlɑɑ lɑpɑ pɑ təcɑɣɑlɛ kɛ tɛtʋ tɑɑ. Lonte ntɛɣɛ n tɑɣɑnɑ wɑhɑlɑ nyə́mɑ kɛ nyɑ́ kʋpɑntʋ tɔɔ.

¹²Tɔmʋɣʋ kɛ Tɑcɑɑ yɔɣɔtɑɑ. Tɔm kʋpɑntʋ kɔntɑɑ nɑ́ kɛ́ kpekəle sɔsɔɔlɛ.

¹³Kolontunɑɑ ɑwulɑɑ kpekəle tʋ cɑsəlɛ. Ɩlɛnɑ ɑlɑɑ mpɑ pɑ wɛ təyɑɣɑ tɔ pɑ́ tɑlɑ wontu kukukuutu.

¹⁴Ɩ́ kɑ́ həntɩ mə cɑcɑkəŋ tɛɛ nɑ ɩ́ hɛɛsəɣɩ, nɑ liɣitee wɑɑsɑ ɑlukuku keŋ tɔɔ, nɑ wʋlɑ kʋpɑŋ wɑɑsɑ ɩ hʋntʋ tɔɔ*fɑ*?

¹⁵Wɑɑtʋ wei Tomɑ tənɑ tʋ yɑsɑ ɑwulɑɑ kɛ tɛtʋ tɑɑ tɔ, tɛtʋ hʋlʋmɑɑ kɛ ɩsɩɩ kponkpontu.

¹⁶Hɑɩ, Pɑsɑŋ pʋɣʋ kɛ́ Ɩsɔ nyəŋkʋ kɛ́, nɑ kʋ hɛlɑ tɔm pɑɣɑlɛ.

¹⁷Pepe tɔɔ kɛ́ pʋɣʋ kʋhɛlʋɣʋ lɑkɩ ɩsɛsɛɛmlɛ, kɛ ŋku Ɩsɔ ləsɑɑ sɩ ɩ kɑ cɑɣɑ tɑm tɔɔ tɔ? Tənɑɣɑ Tɑcɑɑ kɑ́ cɑɣɑ hɑlənɑ tənɑɣɑ.

¹⁸Ɩsɔ wɛnɑ yoou kɛɛkɛnɑɑ kɛ iyisi iyisi kɛ́, Tɑcɑɑ wɛ pɑ hɛkʋ, nɑ Sinɑyi nɑ́ɑ́ wɛ Ɩsɔ təsɛɛlɛ tɑɑ.

¹⁹N kpɛŋnɑ yəlɑɑ mpɑ pɑ kpɑwɑ tɔ nɑ ń kpɑɑnɑ, yəlɑɑ kɛ pɑ lɑpɑ-ŋ kʋcɔɔʋ*fɑ*. Tɔɔ kʋllɑɑ mɑɣɑmɑɣɑ kɑ́ cɑɣɑ nyɑ́ kiŋ.

²⁰Tɑcɑɑ kɛlɛ sɔsɔ kɛ pɑɑ kʋyɑkʋ ŋku, ɩnɩ ɩ pɑɑsəɣənɑnɑ tʋ nɑ ɩ́ wɑɑsəɣɩ-tʋɣʋ sɑɑ wei pɑ ŋmɑkələɣɩ-tʋ tɔ.

²¹Ɩsɔ kɛ́ wei ɩ wɑɑsəɣɩ-tʋ tɔɣɔ. Tɑcɑɑ Ɩsɔ ɩnɩ ɩ wɛnnɑ tomɑ sɩ ɩ́ fiti-tʋɣʋ səm tɑɑ.

²²Amɑ Tɑcɑɑ kɑ́ yɔkɩ ɩ kolontunɑɑ nyɔɔŋ, ɩ kɑ́ yɔkɩ mpɑ pɑ wɛ ɩsɑɣɑtʋ tɑɑ tɔ pɑ nyʋmpɔɣɔlɑsɩ.

²³Tɑcɑɑ yɔɣɔtɑɑ sɩ: Mɑɑ ləsɩ mɑ kolontunɑɑ kɛ Pɑsɑŋ pʋɣʋ tɑɑ nɑ mɑ́ kɔnɑ. Mɑɑ ləsɩ-wɛɣɛ teŋku lʋm tɛɛ nɑ mɑ́ kɔnɑ.

²⁴Nɑ ń fɛlɩ pɑ cɑləm tɑɑ kɛ́ nɔɔhɛɛ, nɑ nyɑ́ hɑsɩ tɔɣɔ-wɛ.

²⁵Hɑɩ, mɑ Ɩsɔ, mɑ wulɑʋ, pɑ nɑwɑ nyɑ́ cɑŋɑ kɛ nyɑ́ təyɑɣɑ tɑɑ.

²⁶Yonyoolɑɑ ntɛ́ nɔɣɔ tɔɔ, pɑ wɑɑləɣɩ wontu mɑtɑɑ, hɛkʋ tɑɑ kɛ́ ɑlʋpiyɑ mpɑ pɑ mɑkɩ ɑkilimisi tɔ.

²⁷Ɩ sɑ Ɩsɔ kɛ́ təkotilenɑɑ tɑɑ. Ɩsɛɣɛlɩ lʋlʋŋ nyə́mɑ mɛ ɩ́ sɑ Tɑcɑɑ.

²⁸Mə tənʋɣʋ Pɛncɑmɛɛ kpekəle ntɛ́ mə nɔɣɔ tʋ, nɑ pə́ kɑɑsɩ Yutɑ nɑ Sɑpulɔŋ nɑ Nɛfətɑli pə ɑwulumpiyɑ.

²⁹Mə Ɩsɔ cɑɑ kɛ́ sɩ ɩ́ wɛɛ toŋ. Hɑɩ, Ɩsɔ, sɔɔsɩ toŋ kɛ mpi n lɑpɑ-tʋ tɔ.

³⁰Nyɑ́ təsɛɛlɛ tɑɑ kɛ́ n wɛɛ, nɑ ń tɔkɩ kɑwulɑɣɑ kɛ Yosɑlɛm tɔɔ. Awulɑɑ kɑ́ kɔnɑ-ŋ kʋcɔɔŋ.