Yontu 66:2-19

²Ɩ́ yoo ɩ hətɛ sɑmtʋ yontu, nɑ ɩ́ tʋ-ɩ teeli nɑ mə́ sɑmtʋ.

³Ɩ́ heeli Ɩsɔ sɩ: Nyɑ́ təmɑ kɛ sɔsɔɔnɑ. Kolontunɑɑ nɑɑkɩ nyɑ́ toŋ sɔsɔɔŋ, ɩlɛnɑ pɑ́ yeki kɑlɑmpɑɑnɩ.

⁴Tɛtʋ yəlɑɑ tənɑ həntɑ nyɑ́ nɔɔhɛɛ tɛɛ kɛ́, nɑ pɑ́ yooki lɑŋhʋlʋmlɛ yontu nɑ pɑ́ sɑŋ nyɑ́ hətɛ.

⁵Ɩ́ kɔɔ nɑ ɩ́ nɑ́ Ɩsɔ təmɑ, ɩ lɑkɑsɩ kɛ sɔsɔɔnsɩ kɛ́. Yəlɑɑ tɑɣɑ ɩ lɑkɩ-sɩ.

⁶Ɩsɔ yelɑɑ nɑ teŋku lʋm nyɔɔ, nɑ pə́ yele tɛtʋ puɣulɑɣɑ nɑ yəlɑɑ tɔ nɔɔhɛɛ. Tənɑɣɑ tɑ́ lɑŋɑ hɛɛnɑ-ɩ.

⁷Ɩsɔ tomɑ kɛ ɩ ŋmɑkələnɑ tɑm tɔɔ. Nɑ ɩ́ feŋiɣi piitimnɑɑ nɑ ɩ ɩsɛ sɩ tɔɔ kʋllɑɑ ɩ́ tɑɑ tɑsɑ ɩ tɔɔ kɛ́ kʋlʋɣʋ.

⁸Yəlɑɑ mɛ́ ɩ́ sɑ tɑ́ Ɩsɔ, ɩ́ sɑmɩ-ɩ nɑ mə́ nɔɔsɩ nɩɩ.

⁹Ɩsɔ hɑɑnɑ-tʋɣʋ weesuɣu, nɑ ɩ́ kentiɣi tɑ́ tɔɔ sɩ pə́ tɑɑ co-tʋ.

¹⁰Hɑɩ, Ɩsɔ, nyɑ́ mɑɣɑsənɑ-tʋ nɑ ń tɑɣɑnɩ-tʋ, ɩsɩɩ pɑ wɔkʋɣʋ liɣitee nyəɣəlʋɣʋ sɩ kʋ té tɔ.

¹¹Ɩsɔ n yelɑɑ nɑ wɑhɑlɑ mɑɣɑnɑ-tʋ, nɑ ń yele nɑ lɑŋwɑkəllɛ kəlɩ-tʋ.

¹²Ɩsɔ yelɑɑ nɑ yəlɑɑ tɔɣɔ tɑ́ tɔɔ, tə tɔmɑ kɔkɔ nɑ lʋm pə tɑɑ. Ɩlɛnɑ Ɩsɔ ń ləsɩ-tʋ nɑ ń tɑnɑ-tʋɣʋ təpɑntɛ tɑɑ.

¹³Mɑɑ sʋʋnɑ nyɑ́ təyɑɣɑ kɛ kɔtɑsɩ nsi kɔkɔ lusɑ sɩ tənɑ tɔ, nɑ mɑ́ lɑ́ nɔɔsɩ nsi mɑɑ sɩɩ-ŋ tɔ.

¹⁴Nsi mɑɑ kulɑ nɔɣɔ kɛ mɑ wɑhɑlɑ wɑɑtʋ nɑ mɑ́ sɩɩ tɔ.

¹⁵Mɑɑ lɑ-ŋ kɔtɑɣɑ ŋkɑ kɔkɔ lusɑ kɑ tənɑ tɔɣɔ heeŋ nim nyəŋ, nɑ ɩwɑɑŋ, nɑ lɑtəcɛnɑɑ nɑ pəŋtʋlʋŋ.

¹⁶Mə tənɑ mpɑ mɛ ɩ́ nyɑŋnɑ Tɑcɑɑ tɔ, ɩ́ kɔɔ nɑ mɑ́ kɛɛsɩ-mɛɣɛ mpi Ɩsɔ lɑpɑ-m tɔ.

¹⁷Mɑ mɑpɑ kɑpukɑ nɑ Ɩsɔ tɔɔ nɑ mɑ nɔɣɔ, nɑ mɑ́ sɑmɩ-ɩ nɑ mɑ nsəmlɛ.

¹⁸Ye mɑ tɑɑ kɑ wɛ ɩsɑɣɑtʋ Ɩsɔ tɑɑ nɩɩnɑ-m.

¹⁹Amɑ Ɩsɔ nɩɩwɑ mɑ nɔɣɔ nɑ ɩ́ ké ŋkpɑŋŋ nɑ ɩ́ nɩɩ mɑ wiinɑʋ.