Yontu 55:5-22

⁵Mɑ lɑŋlɛ wɑkəlɑ sɔsɔm kɛ́, nɑ səm sɔɣɔntʋ pɩɩ-m.

⁶Sɔɣɔntʋ sɔsɔɔntʋ kpɑ-m kɛ́, nɑ mɑ́ seliɣi.

⁷Mɑ nyɩɩlɑɣɑ ɩsɩɩ ye mɑɑ wɛnɑ keŋ ɩsɩɩ ɑlukuku, mɑɑ kʋlɑ hʋntʋ nɑ mɑ́ hɛɛsɩ.

⁸Mɑɑ sewɑ nɑ mɑ́ polo pooluŋ nɑ mɑ́ cɑɣɑ timpi nɔɣɔlʋ fɛɩ tɔ.

⁹Mɑɑ sewɑ lɔŋ kɛ kɑcuculɑɣɑ nɑ heelim sɔsɔɔm nɑ mɑ́ cɔɔsɩ.

¹⁰Tɑcɑɑ, líɣítí mɑ kolontunɑɑ, pɑ́ tɑɑ nɩɩnɑ təmɑ. Mpi tɔ, mʋsʋŋ nɑ ɩyoosile tike kɛ mɑ nɑɑkɩ ɩcɑtɛ tɑɑ.

¹¹Yoou cɔɔkənɑ tə koloosi kɛ ilim nɑ ɑhoo. Kʋpəntəŋ nɑ ɑcilɑɣɑtʋ sunɑ tə tɑɑ.

¹²Yʋlʋkʋlɛ wɛ tə tɑɑ kɛ́. Pəyele ŋmɩɩləm nɑ tʋsʋɣʋ nɑ́ɑ́ lɑŋəɣɩ.

¹³Ye pɩɩ kɛ́ kolontu tʋʋkənɑ-m pə tɑɑ lɑ-m pʋlʋ. Yɑɑ ye mɑ pɑtɑ kɑ kʋlɑɣɑnɑ mɑ tɔɔ mɑɑ ŋmɛlɑ-ɩ.

¹⁴Amɑ mɑ nɑ wei tə kɑɑwɑ nɑ mɑ tʋɣʋnɑ-ɩ tɔɣɔ, ɩ kɛ́ mɑ tɑɑpɑlʋ nɑ mɑ ceu kɛ́.

¹⁵Mɑ nɑ-ɩ tɩɩ wɛ təmɑ nɑ leleŋ kɛ́, nɑ tɑ́ nɑ sɑmɑɑ tə puki Ɩsɔ təsɛɛlɛ tɑɑ.

¹⁶Səm ɩ́ tuti mɑ kolontunɑɑ, nɑ pɑ́ tii ɑtɛtəlɛ tɑɑ nɑ pɑ ɩsɛ. Mpi tɔ, ɩsɑɣɑtʋ sunɑ pɑ tɑɑ.

¹⁷Ɩsɔ kɛ́ mɑɑ wiinɑ, nɑ ɩnɩ ɩ kɑ́ wɑɑsənɑ-m.

¹⁸Tɑnɑŋ nɑ ilim tɑɑ nɑ tɑɑnɑɣɑ kɛ mɑ wiiki nɑ ɩ́ nɩɩkɩ mɑ nɔɣɔ.

¹⁹Ɩnɩ ɩ kɑ́ yɑnɑ-m nɑ ɩ́ yele nɑ mɑ́ hɛɛsɩ. Mpi tɔ, mpɑ pɑ kʋləɣɩ mɑ tɔɔ tɔ pɑ wɛ pɑɣɑlɛ kɛ́.

²⁰Ɩsɔ wei ɩnɩ ɩ kɛ́ wulɑʋ kɛ too tɑm tɔɔ tɔ, ɩ́ nɩɩ nɑ ɩ́ pɑsɑ-wɛ. Yəlɑɑ mpɛ́ pɑɑ lɑɣɑsəɣɩ, pə́cɔ pɑɑ nyɑŋnɑ Ɩsɔ.

²¹Ɩ tʋ ɩ tɑɑpɑlɑɑ mpɑ ɩ́ nɑ-wɛ pɑ wɛ leleŋ tɔɣɔ niŋ. Nɑ ɩ́ wɑkəlɩ nɔɣɔ ŋkɑ ɩ kɑ pɛɛlɑɑ tɔ.

²²Ɩ nɔɣɔ nɑ leleŋ kɛ́ ɩsɩɩ tɩɩŋ nɑ ɩ tɑɑ nɑ kɔkɔ, nɑ ɩ fɑɑcinɑɑ tewɑ, ɩlɛnɑ ɩ tɑɑ nɑ sɑpəlɑsɩ.