Yontu 50:1-22

¹Asɑfɩ yontu. Ɩsɔ Tomɑ tənɑ tʋ Tɑcɑɑ yɑɑkɩ tɛtʋ tənɑɣɑ pə kpɑɣɑʋ ilim təlɩɩlɛ nɑ pə tətʋlɛ tɔ.

²Siyɔŋ ɩcɑtɛ nte tə tewɑ təkpɑtɑɑ tɔ tə tɑɑ kɛ́ Ɩsɔ teeki kɔkɔ.

³Tɑ Ɩsɔ kɔŋ kɛ́, ɩlɛ pə tɑɣɑ təpɑmm. Kɔkɔ wɛ ɩ nɔɣɔ tɔɔ kɛ́ nɑ kɑ́ niisiɣi pə tənɑ. Heelim ɩsɑɣɑm cɔɔnɑ-ɩ kɛ́.

⁴Ɩsɔ hʋʋkənɑ ɩ yəlɑɑ nɑ ɩ́ yɑɑ ɩsɔtɔnʋɣʋ nɑ tɛtʋ kɛ ɑseetɑ.

⁵Ɩsɔ sɩ: Ɩ́ koti mɑ nyə́mɑ mpɑ mɑ nɑ-wɛ tə pɛɛlɑ nɔɣɔ sɩ pɑɑ nɩɩnɑ-m nɑ pɑ́ lɑ́ pə kɔtɑɣɑ tɔ.

⁶Ɩsɔtɔnʋɣʋ ɩ́ yɔɣɔtɩ sɩ Tɑcɑɑ mɑ́ mɑ siɣisɑɑ kɛ́. Mpi tɔ, mɑɣɑlɛ hʋʋnlʋ.

⁷Ɩsɔ sɩ: Mɑ yəlɑɑ Ɩsɛɣɛlɩ nyə́mɑ ɩ́ ke ŋkpɑŋŋ nɑ mɑ kɑlənɑ-mɛ, mɑ kɛ́ mə Ɩsɔ kɛ́.

⁸Mɑɑ kɑlənɑ-mɛɣɛ, ɩlɛ pə tɑɣɑ mɑ kɔtɑsɩ tɔɔ, ɩ́ tɑ́ tɩɩ hɛɛsɩ-m səlɛɣɛ lɑpʋ,

⁹mɑ kɑɑ mʋ, mɑɑ cɑɑ mə lɑtəcɛnɑɑ yɑɑ mə́ kpeeŋ tɛɛ pəŋtʋlʋŋ kpɑʋ.

¹⁰Mpi tɔ, mɑ́ tənnɑ hɔtʋ tɛɛ wontu tənɑ nɑ pulɑsɩ tɑɑ nyəntʋ tənɑɣɑ iyisi iyisi.

¹¹Nɑ pə sumɑsɩ tənɑ, ɑtɛ wontunɑɑ tənɑ kɛ́ mɑ nyəm kɛ́.

¹²Pɑɑ nyɔɣɔsɩ wɛ-m, mɑɑ pɔɔsəɣɩ. Mpi tɔ, ɑntulinyɑ nɑ ɩ nyəm tənɑ mɑ́ tənnɑ.

¹³Wulee mɑ tɔɣɔ lɑtəcɛnɑɑ nɑntʋ nɑ mɑ́ nyɔɔ pəŋtʋlʋŋ cɑləm nɑ?

¹⁴Pə tɑɣɑ tɔɣɔnɑɣɑ kʋhɑʋ kɛ mɑ cɑɑkɩ. Amɑ sɛɛtʋ kɛ mɑ pɔɔsəɣɩ. Ɩ́ təŋəɣɩ nɑ ɩ́ lɑkɩ ɩsənɑ ɩ́ kɑ sɩɩwɑ ɩsɔtɑɑ Ɩsɔ Sɔsɔ mɑɣɑ nɔɔsɩ tɔ.

¹⁵Nɑ ye ɩ́ wɛ lɑŋwɑkəllɛ tɑɑ ɩ́ yɑɑ-m nɑ mɑ́ wɑɑsɩ-mɛ nɑ ɩ́ tʋ-m teeli.

¹⁶Mɑɑ pɔɔsɩ ɑsɑɣɑɑ sɩ: Ɩ́ kɑləɣɩ mɑ kiiŋ nɑ mɑ́ nɑ-mɛ tɑ́ nɔɣɔ pɛɛlʋɣʋ tɔm wɛ mə nɔɔsɩ tɑɑ sɩ pə wɑɑsɩ-mɛɣɛ we?

¹⁷Ɩlɛnɑ mɑ́ sɛɣɛsəɣɩ-mɛ nɑ ɩɩ nɩɩkɩ nɑ Ɩ́ lɔɔkɩ mɑ tɔm.

¹⁸Ɩ́ tənəɣɩ ŋmɩɩlɑɑ tɔɔ kɛ́, nɑ ɩ́ sɔɔsəɣɩ wɑsɑŋkɑlənɑɑ tɔɔ.

¹⁹Ɩsɑɣɑtʋ kɛ mə nɔɔsɩ yɔɣɔtəɣɩ nɑ ɩɩ nyɑŋnɑ kɑloolɑɣɑ.

²⁰Nɑ ɩ́ cɑkɩ mə tɔɣɔntəlɛnɑɑ ɑcɑɣɑ, nɑ ɩ́ kpɛŋəɣənɑ mə mɑɣɑmɑɣɑ mə newɑɑ.

²¹Mpi ɩ́ lɑpɑ tɔɣɔlɛ, nɑ ɩ́ hʋʋkɩ sɩ mɑ́ su nɑ? Yɑɑ ɩ́ mɑɣɑsəɣɩ mə tɑɑ sɩ, mɑɑ təŋ mə ɩkpɑtɛ. Mɑɑ kʋlɩ mə tɔɔ kɛ́ nɑ mɑ́ kuli mə ɑcɑɑlətʋ tənɑ tɔɔ nɑ ɩ́ nɑ́.

²²Mə tənɑ mpɑ mɛ ɩ́ sɔɔkɩ mɑ tɔɔ tɔ ɩ́ ke ŋkpɑŋŋ. Pə tɑɑ kɔɔ nɑ mɑ́ cəlɩ-mɛ nɑ nɔɣɔlʋ kɑɑ wɑɑsɩ-mɛ.