Yontu 44:8-26

⁸Mpi tɔ, nyɑ́ yɑkənɑ-tʋɣʋ tɑ́ kolontunɑɑ niŋ tɑɑ nɑ ń tʋɣɩ mpɑ pɑɑ cɑɑkɩ-tʋ tɔɣɔ fɛɛlɛ.

⁹Tɑcɑɑ tɩɩ tʋɣʋ-ŋ teeli kɛ pɑɑ kʋyɑkʋ ŋkuɣʋ. Tɩɩ sɛɛkɩ-ŋ tɑm kɛ́.

¹⁰Pɑɑ nɑ mpʋ n lɔ-tʋ nɑ ń tʋ-tʋɣʋ fɛɛlɛ, nɑ ń kisi tɑ́ yoolɑɑ wɑɑlɩ kɛ wɛɛʋ.

¹¹N yelɑɑ nɑ tə́ se tɑ́ kolontunɑɑ, nɑ pɛlɛ pɑ́ kuu tɑ́ wontu.

¹²N pɛtɑ-tʋɣʋ pɑ niŋ tɑɑ kɛ́ ɩsɩɩ tɔlɑ kɛ təkʋlɛ nɑ tə́ yɑ́ yem kɛ́ lɛlɑɑ tɛ́.

¹³N lɔ nyɑ́ piyɑ tɑɣɑ ɑləhɑ kɛ́ yem kɛ́ n tɑ wɑɑ tɑ́ tɔɔ kɛ́ pʋlʋ.

¹⁴N yelɑɑ nɑ tɑ́ cɔlɔ nyə́mɑ tʋʋkɩ-tʋ, nɑ pɑ́ pɑɑnɑ-tʋ nɑ pɑ́ woŋiɣi-tʋ.

¹⁵Tɑɣɑ piitimnɑɑ yookinɑ yontu, nɑ yəlɑɑ nɑ́ɑ́ tuliɣi-tʋɣʋ ntompee.

¹⁶Pɑɑ kʋyɑkʋ ŋkuɣu fɛɛlɛ kpɑɑkɩ-m nɑ pə́ lɑkɩ-m tokuɣu

¹⁷kɛ wɑɑtʋ wei mɑ nɩɩkɩ kolontu kʋtʋɣʋ nɑ ɩ sɑɣɑtʋɣʋ tɔ.

¹⁸Wɑhɑlɑnɑɑ pɑnɛ pɑ tənɑ pɑ mɑkənɑ-tʋɣʋ. Pəyele tə tɑ sɔɔ nyɑ́ tɔɔ. Pə́cɔ tə tɑ wɑkəlɩ tɑ́ nɑ-ŋ tɑ́ nɔɣɔ pɛɛlʋɣʋ.

¹⁹Anɩ tə tɑ lɔ-ŋ yɑɑ tə́ hɑtələnɑ nyɑ́ mpɑɑʋ.

²⁰Pɑɑ nɑ mpʋ n nɑŋtɑ-tʋɣʋ lonte nte pɑ lɔwɑ tɔ tə tɑɑ kɛ́ tɑɑlɛ hɑsɩ təcɑɣɑlɛ. Nɑ ń yele nɑ səm səkpɛtʋɣʋ nyɑlɑ tɑ́ tɔɔ.

²¹Ye tɩɩ sɔɔwɑ tɑ́ Ɩsɔ tɔɔ, yɑɑ tə sʋʋ tɩɩŋ kɛ lɑɑʋ,

²²n tɑɑ kpisi pə nyəm. Mpi tɔ, n nyəmɑ pə tənɑ mpi pə wɛ yʋlʋ lotu tɑɑ tɔɣɔ.

²³Nyɑ́ tɔɔ kɛ́ pɑ kʋɣɩ-tʋɣʋ pɑɑ kʋyɑkʋ ŋku, nɑ pɑ́ lɑkənɑ-tʋ ɩsɩɩ pɑ pukuɣunɑ heu kɛ təkʋlɛ tɔ.

²⁴Hɑɩ, Tɑcɑɑ n tooki suwe? Fe nɑ ń kʋlɩ, tɑɑ lɔ-tʋɣʋ tɑm tɔɔ.

²⁵Pepe tɔɔ kɛ́ n sɔɔ tɑ́ wɑhɑlɑ nɑ tɑ́ lɑŋwɑkəllɛ tɔɔ nɑ nn cɑɑkɩ tɑ́ nyənʋɣʋ?

²⁶Mpi tɔ tə hotɑ tɑ́ lotu tɔɔ kɛ́ mʋsʋɣʋ tɑɑ kɛ́. Hɑɩ, kʋlɩ nɑ ń wɑɑsɩ-tʋ.