Yontu 37:5-23

⁵Pɛtɩ-ɩ nyɑ́ weesuɣu nɑ ń nyənəɣɩ ɩ tike ɩlɛ ɩ kɑ́ lɑ mpi pə wɛ lɑpʋ tɔ.

⁶Ɩ kɑ́ yele nɑ nyɑ́ siɣisuɣu nɑ́ ɩsɩɩ nyɑɑləm nɑ nyɑ́ tɑmpɑnɑ nɑ́ ɩsɩɩ ilim kɛ pə sikuɣu wɑɑtʋ.

⁷Cɑɣɑ təpɑmm nɑ ń tɛɛləɣɩ Tɑcɑɑ nɑ suulu. Tɑɑ mʋ pɑ́ɑ́nɑ́ nɑ mpɑ pɑ wɑɑkɩ pɑ ɩsɑɣɑtʋ tɑɑ tɔ.

⁸Lɔ-yɛ, nɑ ń yele tɑɑ hɑŋɑɣɑ. Tɑɑ kʋntɩ, ɩsɑɣɑtʋ kɛ pə lʋləɣɩ.

⁹Pɩɩ kpiisi ɩsɑɣɑlɑtɑɑ kɛ́, ɩlɛnɑ Tɑcɑɑ tɛɛllɑɑ nɑ́ɑ́ tɔɣɔ tɛtʋ.

¹⁰Pəcɔɣɔ pə kɑɑsɑɑ nɑ ɩsɑɣɑʋ sɑɑlɩ yem. N kɔŋ n nyənɩ ɩ lonte tɑɑ, n kɑɑ nɑ ɩ ɩkpɑtɛ.

¹¹Amɑ təpɑsəlɑɑ kɑ́ tɔɣɔnɑ tɛtʋ nɑ pɑ́ cɑɣɑnɑ pɑ tɩ təpɛlɛkɛtɛɛ.

¹²Ɩsɑɣɑʋ cɑkɩ siɣisilu ɑcɑɣɑ kɛ́, nɑ ɩ nyɑsəɣɩ ɩ təɣɩ kelɑ.

¹³Amɑ Tɑcɑɑ nɑ́ woŋiɣi-ɩ kɛ́. Mpi tɔ, ɩ nyəmɑ́ sɩ hʋʋlɛ kʋyɑkʋ kɑ́ kɔɔ.

¹⁴Asɑɣɑɑ nɑ́ kpɛɛkɩ pɑ lɑɣɑlɛɛ kɛ́ nɑ pɑ́ pɑŋ pɑ tɔɔŋ sɩ pɑ kʋɣɩ kʋnyɔntʋnɑɑ nɑ wɑhɑlɑ nyə́mɑ mpɑ pɑ təŋəɣɩ mpɑɑʋ kʋsiɣisuɣu tɔ.

¹⁵Amɑ pɑ mɑɣɑmɑɣɑ kɛ pɑ lɑɣɑlɛɛ kɑ́ sɔ nɑ pɑ tɔɔŋ pɛlɩ.

¹⁶Siɣisilu wɛnɑʋ pəciimɑɣɑ kəlɑ teu kɛ ɑsɑɣɑɑ pɑɣɑlɛ nyəŋkʋ tuutuumɑ.

¹⁷Mpi tɔ, Tɑcɑɑ n pɛləɣɩ pɑ niŋ kɛ́ ɩlɛnɑ ń pɑɑsəɣənɑ siɣisilɑɑ.

¹⁸N nyəmɑ́ mpɑ pɑ tɔŋ ɩsɩɩ Ɩsɔ sɔɔlɑɑ tɔ pɑ tɔɔ kɛ́ nɑ mpi n kɑ́ hɑ-wɛ tɔ, pɩɩ pəsɩ pɑ nyəm kɛ tɑm tɔɔ.

¹⁹Fɛɛlɛ kɑɑ tɔɣɔ-wɛɣɛ wɑhɑlɑ wɑɑtʋ tɑɑ. N kɑ́ hɑ-wɛɣɛ hɑɣɑnɑɣɑ kɛ nyɔɣɔsɩ wɑɑtʋ.

²⁰Asɑɣɑɑ kɔŋ lepu kɛ́. Tɑcɑɑ kolontunɑɑ kɑ́ sɑɑlɩ kɛ́ ɩsɩɩ nyɩɩtʋ hɛtʋ yɑɑ kɔkɔ nyɔɔsɩ.

²¹Ɩsɑɣɑʋ kəntəɣɩ kɛ́ ɩɩ fɛləɣɩ. Amɑ siɣisilu nɑ́ hɑɑkənɑ luɣu kʋlʋmʋɣʋ.

²²Mpɑ Tɑcɑɑ kooliɣi kʋpɑntʋ tɔ mpɛ pɑ tənnɑ tɛtʋ. Ɩlɛnɑ pə́ kpiisiɣi mpɑ ɩ təŋsəɣɩ mpusi tɔ.

²³Ye ɩ lɑŋlɛ hɛɛnɑ yʋlʋ tɔntɛ, ɩ hɑsəɣɩ ɩ nɔɔhɛɛ tɛɛ kɛ́.