Yontu 35:5-14

⁵Pə́ yɑsɩ-wɛ ɩsɩɩ heelim kpɑɣɑ nyɩɩlʋɣʋ kɛ wɑɑtʋ wei Tɑcɑɑ ɩsɔtɑɑ tillu tɔɣɔnəɣɩ-wɛ tɔ.

⁶Nɑ səkpɛtʋɣʋ nɑ sotu wɛɛ pɑ mpɑɑʋ tɑɑ kɛ wɑɑtʋ wei Tɑcɑɑ ɩsɔtɑɑ tillu wɛ pɑ wɑɑlɩ tɔ.

⁷Mpi tɔ, mʋsʋŋ kɛ pɑ nyəpɑ-m kɑtɔkɑ, nɑ pɑ́ huli mɑ mpɑɑʋ tɑɑ kɛ́ pʋʋɣʋ sɩ mɑ́ hoti.

⁸Wɑkəlʋɣʋ ɩ́ tuti-wɛ nɑ pɑ mɑɣɑmɑɣɑ pɑ kɑtɔkɑ kpɑ-wɛ, nɑ pɑ́ hoti pɑ pʋʋɣʋ tɑɑ nɑ pɑ́ lɑ́ ɑsɑɑlɑ.

⁹Amɑ mɑ lɑŋlɛ kɑ́ hʋləmənɑ Tɑcɑɑ nɑ mɑ́ yɔɔlənɑ nyɑ́ wɑɑsʋɣʋ.

¹⁰Ɩlɛnɑ mɑ́ yɔɣɔtɩ mɑ tɑɑ sɩ, Tɑcɑɑ fɛɩnɑ sɑɑlɑ. N wɑɑsəɣɩ kʋnyɔntɔɣɔlʋ kɛ toŋ tʋ niŋ tɑɑ. Nɑ ń wɑɑsɩ wɑhɑlɑ tʋ nɑ kʋnyɔntʋ kɛ wei ɩ tɔkɩ pɑ ɩsɛ tɔ ɩ niŋ tɑɑ.

¹¹Pɔpɔtʋ ɑseetɑ nyə́mɑ pɔɔsəɣɩ-m ɩsɑɣɑtʋ nti mɑ tɑ nyɩ tɔ.

¹²Nɑ pɑ́ lɔɔkɩ-m. Mɑ pəsɑ kʋcɔɔʋ fɛləɣɩ nyɑŋ kɛ́.

¹³Pəyele sɑɑ wei pə wɩɩkɑɣɑ mpɛ tɔ mɑ suukɑɣɑ ləyɑɣɑ wontu kɛ́ nɑ mɑ́ hɔkəɣɩ nɔɣɔ, nɑ mɑ́ sələməɣɩ Ɩsɔ nɑ nyʋɣʋ kɑmɑ sɩ pə́ wɑɑ-wɛ.

¹⁴Mɑ nyənɑɣɑ-wɛɣɛ mɑ newɑɑ yɑɑ mɑ tɑɑpɑlɑɑ kɛ́, nɑ pɑ tɔm wɑkələɣɩ mɑ lɑŋlɛ. Nɑ mɑ́ tɔŋ nɔɔhəlɛ nɔɔhəlɛ. Nɑ ɩsɛ kɑmɑ ɑtɛ ɩsɩɩ mɑ too kʋlʋlʋ səpənɑ.