Yontu 33:10-18

¹⁰Tɑcɑɑ n wɑkələɣɩ təmɑ nnɑ piitimnɑɑ sɩɩwɑ sɩ pɑ lɑkɩ tɔɣɔ, nɑ ń hɛtəɣɩ nti pɑ hɔkəɣɩ tɔ.

¹¹Amɑ təmɑ nnɑ Tɑcɑɑ n sɩɩwɑ nɑ ń təŋəɣɩ nɑ ń lɑkɩ tɔ ɑ wɛ tɑm kɛ́. Nɑ ń hɔkɑ nti təlɛ tə wɛɛ ḿpʋɣʋ pɩɩsɩ pɩɩsɩ.

¹²Leleŋ nɩɩlɑɑ ntɛ́ piitim mpi pə nyənəɣɩ Tɑcɑɑ kɛ pə Ɩsɔ tɔ. Nɑ yəlɑɑ mpɑ n ləsɑɑ sɩ nyɑ́ nyə́mɑ tɔ.

¹³Tuu ɩsɔtɑɑ kɛ́ Tɑcɑɑ n wɛɛ nɑ ń nyənəɣɩ nɑ ń nɑɑkɩ yəlɑɑ tənɑ.

¹⁴Nyɑ́ təcɑɣɑlɛ tɑɑ kɛ́ n wɛɛ nɑ ń keŋnɑ ɑtɛ nyə́mɑ tənɑ tɔɔ.

¹⁵Nyɑ́ ŋmɑnɑ pɑ tənɑ nɑ ń tʋ-wɛɣɛ cɛkənɑʋ ləmɑɣɑsɛɛ nɑ pʋlʋ lɑpʋ yɑɑ pə kisuɣu ləmɑɣɑsəlɛ. Nɑ pɑ́ feŋiɣi pɑ təmɑ.

¹⁶Pə tɑɣɑ yoolɑɑ tuutuumɑ kɛ wulɑʋ tɔkənɑ yoou. Pəcɔ tomiŋ nɑɑ wɑɑsəɣɩ yoolu.

¹⁷Pə tɑɣɑ yoou kpɑɣɑnʋ tomɑ yɑɑ ɩ ɑlɑɑfəyɑ yɑkənɑ ɩ cɑɣɑlʋ.

¹⁸Amɑ Tɑcɑɑ nyɑ́ ɩsəlɛ nɑ́ wɛ mpɑ pɑ nyɑŋnɑ-ŋ nɑ pɑ́ tɛɛləɣɩ nyɑ́ kʋpɑntʋ tɔ pɑ tɔɔ kɛ́.