Yontu 31:1-23

¹Tɑfiiti yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ.

²Tɑcɑɑ nyɑɣɑ mɑ tʋɣɩ kpʋlʋɣʋ, tɑɑ yele-m nɑ fɛɛlɛ tɔɣɔ-m. Wɑɑsɩ-m nyɑ́ tɑmpɑnɑ təŋʋɣʋ tɔɔ.

³Ke ŋkpɑŋʋɣʋ nɑ ń wɑɑsɩ-m lɔŋ. Pəsɩ mɑ kʋkentuɣu toŋ nyəŋkʋ nɑ mɑ́ nɑ́ nyʋɣʋ.

⁴Mpi tɔ, nyɑ́ kentiɣinɑ-m nɑ ń wɛ ɩsɩɩ mɑ koluŋɑ ɩcɑtɛ. N kɑ́ tiiki-m nɑ ń pɑɑsənɑ-m nyɑ́ hətɛ tɔɔ.

⁵Fiti-m puluɣu ŋku pɑ nyəpɑ-m tɔ kʋ tɑɑ. Mpi tɔ, nyɑɣɑlɛ mɑ kentilu.

⁶Nyɑ́ niŋ tɑɑ kɛ́ mɑ pɛtəɣɩ mɑ tɩ təkpɑtɑɑ. Nyɑɣɑlɛ Ɩsɔ Tɑcɑɑ tɑmpɑnɑ tʋ, n kɑ́ wɑɑsɩ-m.

⁷Mɑ tɑɑ kpɑɑkənɑ mpɑ pɑ mɑtənɑ tɩɩŋ kpɑɩ nyəŋ ɩnɩ tɔɣɔ. Amɑ nyɑɣɑ mɑ pɛtɑ mɑ tɩ.

⁸Nyɑ́ kʋpɑntʋ tɔɔ kɛ́ mɑ wɛ lɑŋhʋlʋmlɛ nɑ ɑŋmɑɑlɑ pə tɑɑ. Mpi tɔ, n nɑwɑ mɑ wɑhɑlɑ nɑ ń nyɩ mɑ nəɣəsɛɛ tɔɔ.

⁹N kɑɑ pɛtɩ-m kolontu niŋ tɑɑ. N kɑ́ cɛ-m kɛ́ nɑ ń yele nɑ mɑ́ səŋ mɑ nɔɔhɛɛ tɔɔ.

¹⁰Wulɑ nɩɩ mɑ ɩsɛ nɑ mɑ́ tɑlɑ mɑ tənɑɣɑ. Hɑɩ, Tɑcɑɑ, nyənɩ mɑ pətɔɔtəlɛ, mɑ wɛ lɑŋwɑkəllɛ tɑɑ kɛ́.

¹¹Nəɣəsɛɛ tɔkɑ mɑ weesuɣu nɑ mɑ pɩɩsɩ kɛ́. Mɑ ɩsɑɣɑtʋ tɛŋnɑ mɑ tomɑ nɑ pə cɑɑməɣɩ-m.

¹²Mɑ kolontunɑɑ nɑ pə́ kpɛŋnɑ mɑ ɑsəmɑɑ pəsɑ-m woŋɑ pʋlʋpʋɣʋ. Nɑ mɑ tɔm wɛ mɑ tɑɑpɑlɑɑ kɛ sɔɣɔntʋ. Nɑ pɑ́ nɑ-m ɑwɑlɩ pɑ seeki-m.

¹³Mɑ pəsɑ kɛ́ ɩsɩɩ nyənɑɣɑ kʋyɔkɑɣɑ. Nɑ pɑ́ sɔɔ mɑ tɔɔ ɩsɩɩ sətʋ.

¹⁴Mɑ nɩɩwɑ nti yəlɑɑ yɔɣɔtəɣɩ mɑ tɔɔ tɔ. Sɔɣɔntʋ tɑmɑ-m kotɑɣɑ kɛ́. Pɑ cɑkɩ mɑ tɔɔ sɩ pɑ́ ləsɩ mɑ weesuɣu.

¹⁵Amɑ Tɑcɑɑ, nyɑɣɑ mɑ pɛtɑ mɑ tɩ. Nyɑɣɑlɛ mɑ Ɩsɔ.

¹⁶Nyɑ́ niŋ tɑɑ kɛ́ mpi mɑɑ tɛɛsənɑ tɔ pə wɛɛ. Fiti-m mɑ kolontunɑɑ nɑ mɑ kʋnyɔntʋlɑɑ.

¹⁷Nyɑ́ ɩsɛntɑɑ ɩ́ hɛtənɑ nyɑ́ təmlɛ tʋ mɑɣɑ teu nɑ ń yɑ-m nyɑ́ kʋpɑntʋ tɔɔ.

¹⁸Tɑcɑɑ tɑɑ tʋ-m fɛɛlɛ kɛ wɑɑtʋ wei mɑ yɑɑkɩ-ŋ tɔ. Amɑ mɑ kolontunɑɑ kɑ tɔɣɔnɑ-tɛ. Pə wɛɛ sɩ pə́ tisi-wɛɣɛ ɑtɛtəlɛ tɑɑ nɑ pə́ nyɑlɑ pɑ nɔɔsɩ.

¹⁹Yele nɑ footilɑɑ pɔpɔtʋnɑɑ mpɛ pɑ́ pəsɩ kɑmumusi. Mpi tɔ, tɑmpɑnɑ təŋlɑɑ kɛ pɑ holiɣinɑ nɑ kɑlɑmpɑɑnɩ.

²⁰Pɔpɔtʋ fɛɩ leleŋ, kʋpɑntʋ sɔsɔɔntʋ kɛ n sɩɩ mpɑ pɑ nyɑŋnɑ-ŋ tɔ. Yəlɑɑ tənɑ nɑɑkɩ sɩ, mpɑ pɑ tʋɣʋ-ŋ kpʋlʋɣʋ tɔɣɔ n hɑɑkɩ-tɩ.

²¹Pɑ cɔɔsəɣɩ nyɑ́ kiŋ kɛ mpʋ ɩlɛnɑ ń kenti pɑ tɔɔ sɩ, kolontunɑɑ ɩ́ tɑɑ tʋ-wɛɣɛ kʋnyɔŋ.

²²Tɑcɑɑ mɑ sɛɛ-ŋ. Pɩɩ tɑmɑ-m kɛ́ ɩsɩɩ ɩcɑtɛ. Ɩlɛnɑ ń hʋlɩ-m nyɑ́ kʋpɑntʋ nɑ ń lɑ-m piti təmlɛ.

²³Mɑ lɑŋlɛ kɑ wɑkəlɑɑ kɛ́, hɑlɩ mɑ mɑɣɑsɑɣɑ sɩ pə ləsɑ-m nyɑ́ kiŋ. Ɩlɛnɑ ń nɩɩ mɑ wiinɑʋ.