Yontu 22:2-20

²Hɑɩ, mɑ Ɩsɔ yoou, pepe tɔɔ kɛ́ n lɔ-m? N hɑtələnɑ-m suwe, nɑ nn nɩɩkɩ mɑ wulɑ sɩ ń wɑɑsɩ-m?

³Hɑɩ, Ɩsɔ, mɑ wiikinɑ-ŋ ilim ilim nn cɔɔkɩ, nɑ ɑhoo ɑhoo mɑɑ hikiɣi tom.

⁴Pɑɑ nɑ mpʋ nyɑɣɑlɛ Ɩsɔ Nɑŋŋtʋ wei Ɩsɛɣɛlɩ nyə́mɑ sɑŋ tɔ.

⁵Nyɑɣɑ tɑ́ cɔsɔnɑɑ tʋwɑ nɑɑni ɩlɛnɑ ń yɑ-wɛ.

⁶Pɑ wiinɑ-ŋ nɑ ń yɑ-wɛ, pɑ pɛtɑ-ŋ pɑ tɩ tɔ fɛɛlɛ tɑ tɔɣɔ-wɛ.

⁷Amɑ mɑ pəsɑ kɛ́ ɩsɩɩ ɑtɑntɑɑlʋ pə tɑɣɑ yʋlʋ, nɑ yəlɑɑ tənɑ tʋʋkɩ-m nɑ pɑ footiɣi-m.

⁸Pɑ tənɑ mpɑ pɑ nɑɑkɩ-m tɔ pɑ tuluɣu-m ntompee nɑ pɑ́ hooki-m ɩsɛ nɑ pɑ́ footiɣi-m sɩ:

⁹Ntɔŋ Tɑcɑɑ kɛ n pɛtɑ nyɑ́ tɩ yɑɑ, Tɑcɑɑ ɩ́ ləsɩ-ŋ pə tɑɑ. Ntɔŋ Tɑcɑɑ sɔɔlɑ-ŋ yɑɑ, Tɑcɑɑ ɩ́ wɑɑsɩ-ŋ.

¹⁰Tɑcɑɑ, nyɑ́ ləsənɑ-m mɑ too tɑɑ, nɑ ń pɑpəsɩ-m ɩ həlɑ tɔɔ nɑ nɑɑni.

¹¹Hɑtoo mɑ hɔɔʋ tɛɛ nyɑ́ tɔɔ kɛ́ mɑ wɛɛ, nɑ n kɛ́ mɑ Ɩsɔ.

¹²Tɑɑ hɑtələnɑ-m mɑ wɑhɑlɑnɑɑ wɑɑtʋ, nyɑɣɑlɛ mɑ sənlʋ nɔɣɔlʋ fɛɩ.

¹³Mɑ kolontunɑɑ tɑmɑ-m kɛ́ ɩsɩɩ lɑtəcɛnɑɑ, pɑ tʋ-m hɛkʋ kɛ́ ɩsɩɩ tɑɑlɛ nɑɑŋ keesɑsɩ.

¹⁴Pɑ hɑɑkɩ nɔɔsɩ nɑ mɑ tɔɔ kɛ́ ɩsɩɩ tɔɣɔlɑɣɑ cəlʋɣʋ kɑ tɔɣɔnɑɣɑ nɑ kɑ́ nyɩɩsəɣɩ tɔ.

¹⁵Mɑ tomɑ tɛmɑɣɑ ɩsɩɩ lʋm kpeŋuɣu ɑtɛ tɔ, nɑ mɑ tətɑntɛnɑɑ tɑɑ cɛ́. Ɩlɛnɑ mɑ ɑpɑlʋtʋ hoo mɑ tɑɑ ɩsɩɩ keetu.

¹⁶Mɑ luɣu tɛɛ wʋlɑɑ kɛ́ təpuɣupuɣu, nɑ mɑ nsəmlɛ mɑtənɑ mɑ tɑntɑhɑɑʋ. N sɩɩ-m mʋsʋɣʋ tɑɑ kɛ́ ɩsɩɩ mɑ tɛmɑ səpʋ.

¹⁷Asɑɣɑɑ kpekəle tɑmɑ-m kɛ́. Hɑsɩ nsɩ sɩ tʋ-m hɛkʋ. Pɑ tʋlɑ mɑ niŋ nɑ mɑ nɔntɑɑləŋ kɛ pɔɔŋ.

¹⁸Mɑ wʋlɑɑ kɛ́ nɑ mɑ́ yele mʋwɑ tike nɑ mɑ kolontunɑɑ nyənəɣɩ-m təcooo.

¹⁹Pɑ tɑlɑ mɑ wontu. Ɩlɛnɑ pɑ́ tɔ tɛtɛ kɛ́ mɑ kpɑɩ tɔɔ.

²⁰Hɑɩ, Tɑcɑɑ, tɑɑ hɑtələnɑ-m. Nyɑɣɑlɛ mɑ toŋ. Kɔɔ mɑ wɑɑsʋɣʋ kɛ lɔŋ.