Yontu 22:12-31

¹²Tɑɑ hɑtələnɑ-m mɑ wɑhɑlɑnɑɑ wɑɑtʋ, nyɑɣɑlɛ mɑ sənlʋ nɔɣɔlʋ fɛɩ.

¹³Mɑ kolontunɑɑ tɑmɑ-m kɛ́ ɩsɩɩ lɑtəcɛnɑɑ, pɑ tʋ-m hɛkʋ kɛ́ ɩsɩɩ tɑɑlɛ nɑɑŋ keesɑsɩ.

¹⁴Pɑ hɑɑkɩ nɔɔsɩ nɑ mɑ tɔɔ kɛ́ ɩsɩɩ tɔɣɔlɑɣɑ cəlʋɣʋ kɑ tɔɣɔnɑɣɑ nɑ kɑ́ nyɩɩsəɣɩ tɔ.

¹⁵Mɑ tomɑ tɛmɑɣɑ ɩsɩɩ lʋm kpeŋuɣu ɑtɛ tɔ, nɑ mɑ tətɑntɛnɑɑ tɑɑ cɛ́. Ɩlɛnɑ mɑ ɑpɑlʋtʋ hoo mɑ tɑɑ ɩsɩɩ keetu.

¹⁶Mɑ luɣu tɛɛ wʋlɑɑ kɛ́ təpuɣupuɣu, nɑ mɑ nsəmlɛ mɑtənɑ mɑ tɑntɑhɑɑʋ. N sɩɩ-m mʋsʋɣʋ tɑɑ kɛ́ ɩsɩɩ mɑ tɛmɑ səpʋ.

¹⁷Asɑɣɑɑ kpekəle tɑmɑ-m kɛ́. Hɑsɩ nsɩ sɩ tʋ-m hɛkʋ. Pɑ tʋlɑ mɑ niŋ nɑ mɑ nɔntɑɑləŋ kɛ pɔɔŋ.

¹⁸Mɑ wʋlɑɑ kɛ́ nɑ mɑ́ yele mʋwɑ tike nɑ mɑ kolontunɑɑ nyənəɣɩ-m təcooo.

¹⁹Pɑ tɑlɑ mɑ wontu. Ɩlɛnɑ pɑ́ tɔ tɛtɛ kɛ́ mɑ kpɑɩ tɔɔ.

²⁰Hɑɩ, Tɑcɑɑ, tɑɑ hɑtələnɑ-m. Nyɑɣɑlɛ mɑ toŋ. Kɔɔ mɑ wɑɑsʋɣʋ kɛ lɔŋ.

²¹Yɑ-m lɑɣɑtɛ nɔɣɔ tɑɑ. Ləsɩ-m hɑsɩ nsɩ sɩ kelɑ tɑɑ.

²²Wɑɑsɩ-m tɔɣɔlɑsɩ nsɩ sɩ nɔɣɔ tɑɑ, nɑ tɑɑlɛ nɑɑŋ ɩnɩ ɩ həŋ tɑɑ. Hɑɩ, nɩɩ mɑ kʋsələmətʋ.

²³Mɑɑ heeli nyɑ́ tɔm kɛ mɑ cɑmnɑnɑɑ, nɑ mɑ́ sɑ-ŋ sɑmɑɑ tɑɑ.

²⁴Tɑcɑɑ yəlɑɑ mɛ ɩ́ sɑmɩ-ɩ Yɑkɔpʋ lʋlʋɣʋ nyə́mɑ mɛ ɩ́ tʋ-ɩ teeli. Ɩsɛɣɛlɩ nyə́mɑ mɛ ɩ́ sɛɛ-ɩ.

²⁵Mpi tɔ, Tɑcɑɑ nn footiɣi wɑhɑlɑ tʋ nɔɣɔlʋ yɑɑ ń nyənɩ-ɩ səkpelu pə́cɔ nn hɑɑkɩ-ɩ siɣile. Amɑ ye wɑhɑlɑ tʋ wiinɑ-ŋ, n nɩɩkɩ kɛ́.

²⁶Tɑcɑɑ nyɑ́ kʋlɑpʋtʋ tike kɛ mɑ sɑŋ sɑmɑɑ tɑɑ. Ɩlɛnɑ mɑ lɑ-ŋ kɔtɑsɩ nsi mɑɑ sɩɩ nɔɣɔ tɔɣɔ nyɑ́ sɛɛlɑɑ ɩsɛntɑɑ.

²⁷Kʋnyɔntʋnɑɑ kɑ tɔɣɔ nɑ pɑ́ hɑɣɑ. Tɑcɑɑ nyɑ́ pɛɛkəlɑɑ ɩ́ sɑ-ŋ. Nɑ pə́ cɑɣɑnɑ-wɛɣɛ tɑm.

²⁸Tɛtʋ tənɑsɩ tənɑ yəlɑɑ kɑ hʋʋ Tɑcɑɑ nyɑ́ tɔm nɑ pɑɑ kɛɛsənɑ nyɑ́ tɔɔ. Nɑ ɑtɛ yəlɑɑ tənɑ luŋ nyɑ́ tɛɛ.

²⁹Mpi tɔ, Tɑcɑɑ nyɑɣɑlɛ wulɑʋ sɔsɔ. Nɑ ń tɔkɩ kɑwulɑɣɑ kɛ piitimnɑɑ tənɑ tɔɔ.

³⁰Tɛtʋ tɑɑ toŋtunɑɑ tənɑ kɑ́ tɔɣɔ nɑ pɑ́ həntɩ-ŋ ɑtɛ. Nɑ yəlɑɑ tənɑ mpɑ pɑɑ tɛ nɑ pɑ́ sɩ tɔ pɑɑ luŋɩ-ŋ ɑkulɑ.

³¹Pɑ lʋlʋŋ nyə́mɑ kɑ́ lɑ-ŋ təmlɛ nɑ pɑ́ heeli nyɑ́ tɔm kɛ pɑ wɑɑlɩ piyɑ.