Yontu 147:2-19

²Tɑcɑɑ tɑɣɑnəɣɩ Yosɑlɛm kɛ ŋmɑʋ. N kpeɣeliɣi Ɩsɛɣɛlɩ nyə́mɑ mpɑ pɑɑ kuuwɑ tɔ.

³Nyɑ hɛɛsəɣənɑ lɑŋwɑkəllɛ nyə́mɑ lɑŋɑ, nɑ ń hɔkəɣɩ pɑ hiŋnɑɑ.

⁴Nyɑ́ kɑləɣənɑ ɩsɔtʋlʋŋɑsɩ nyʋɣʋ, nɑ ń hɑ pɑɑ ŋkɑɣɑ kɑ hətɛ.

⁵Tɑ Ɩsɔ n kɛ́ sɔsɔ kɛ́, nyɑ́ tomɑ fɛɩ tənɑɣɑ, pə́cɔ nyɑ́ nyəm fɛɩ kɛɛsʋɣʋ.

⁶Tɑcɑɑ n kʋsəɣɩ mpɑ pɑ pɑsəɣɩ pɑ tɩ tɔɣɔ. Amɑ n tisiɣi ɑsɑɣɑɑ kɛ ɑtɛ.

⁷Ɩ́ sɛɛ Tɑcɑɑ kɛ nyɑ́ nɑ təmlɛ nɑ Yontu. Ɩ́ sɑ tɑ Ɩsɔ nɑ cəmʋɣʋ.

⁸N wɑɑsəɣɩ ɩsɔŋmʋntʋ kɛ ɩsɔtɔnʋɣʋ tɔɔ. N tɑɣɑnəɣɩ tɛʋ sɩ kʋ nɩɩ tɛtʋ tɔɔ. Nɑ ń lɑkɩ nɑ nyɩɩtʋ nyɔɔkɩ pɔɔŋ tɔɔ.

⁹N hɑɑkɩ hʋntʋ wontu kɛ tə tɔɣɔnɑɣɑ, nɑ ń cɑləɣɩ kɑtəkɑtəŋ piyɑ kɛ sɑɑ wei sɩ wiiki tɔ.

¹⁰Tɑcɑɑ nn yɔɔləɣənɑ kpɑɣɑnəŋ kpelekpekɑ nyəŋ, pə́cɔ yoolu tomɑ tɑ kɛ-ŋ pʋlʋ.

¹¹Amɑ mpɑ Tɑcɑɑ cɑɑkɩ tɔɣɔlɛ mpɑ pɑ nyɑŋnɑ-ŋ nɑ pɑ́ tɛɛləɣɩ nyɑ́ kʋpɑntʋ tɔ.

¹²Yosɑlɛm nyə́mɑ mɛ ɩ́ sɑ Tɑcɑɑ. Siyɔŋ nyə́mɑ ɩ́ sɑ mə Ɩsɔ.

¹³Mpi tɔ, Ɩsɔ nyɔɔsəɣənɑ mə kɑmpʋnɑɑ kʋkɑləsəŋ nɑ ɩ́ kooliɣi-mɛɣɛ kʋpɑntʋ kɛ mə ɩcɑtɛ tɑɑ.

¹⁴Ɩsɔ hɑɑnɑ mə tɛtʋ kɛ hɛɛsʋɣʋ, nɑ ɩ́ hɑɑkɩ-mɛɣɛ tɔɣɔnɑɣɑ kʋpɑŋkɑ.

¹⁵Ɩsɔ yɔɣɔtəɣənɑ nti ɩ cɑɑkɩ tɔɣɔ tɛtʋ tɔɔ, nɑ ɩ tɔm tɔŋ lɔŋlɔŋ.

¹⁶Ɩsɔ yeki nɑ tɛʋ tɔmpɛɛ kpɑɑkpɑɑcɑʋ hotiɣi, nɑ ɑ́ hʋlʋmɑɑ ɩsɩɩ heeŋ hʋntʋ, nɑ tɛʋ lʋm kiiki ɑtɛ nɑ pə́ hʋlʋmɑɑ ɩsɩɩ tɔlʋmɑ.

¹⁷Nɑ Ɩsɔ pɛtəɣɩ tɛʋ tɔmpɩɩŋ kɛ ɑtɛ nɑ ɑ wɑtʋ kpɑ. Nɔɣɔlʋ ɩɩ pəsəɣɩ nɑ ɩ səŋ ɑ nikɑɣɑ tɑɑ.

¹⁸Ɩsɔ yɔɣɔtəɣɩ ɩlɛnɑ tɔmpɩɩŋ ɩnɩ ɩ́ hoo. Ɩ lɑkɩ nɑ heelim mɑ, ɩlɛnɑ lʋm kpe.

¹⁹Ɩsɔ heelɑ ɩ yəlɑɑ kɛ ɩ tɔm. Ɩ sɩɩ ɩ kiiŋ nɑ kʋsəsɩɩtʋ kɛ Ɩsɛɣɛlɩ nyə́mɑ.