Yontu 145:6-21

⁶Pɑɑ yɔɣɔtɩ nyɑ́ toŋ sɔsɔɔŋ tɔm, nɑ mɑ́ɑ́ kɛɛsɩ nyɑ́ sɔsɔɔntʋ tɔm.

⁷Pɑɑ tɔɔsɩ nyɑ́ kʋpɑntʋ sɔsɔɔntʋ tɔm, nɑ pɑ́ yɔɣɔtəɣɩ nyɑ́ siɣisuɣu tɔm nɑ kɑwilitɑɣɑ.

⁸Tɑcɑɑ n kɛ́ pɛɛlɛɛ tʋ kɛ́, nɑ pətɔɔtəlɛ tʋ. Nn mʋɣɩ pɑ́ɑ́nɑ́ kɛ lɔŋ, pə́cɔ nyɑ́ kʋpɑntʋ tɔɔwɑ.

⁹Tɑcɑɑ n lɑkɩ kʋpɑntʋ kɛ yəlɑɑ tənɑɣɑ, nɑ ń wɛnɑ nyɑ́ kʋŋmɑŋmɑm tənɑ pətɔɔtəlɛ.

¹⁰Hɑɩ, Tɑcɑɑ, nyɑ́ təmɑ tənɑ kɑ́ sɑ-ŋ kɛ́, nɑ nyɑ́ tɑmpɑnɑ təŋlɑɑ nɑ́ɑ́ sɛɛ-ŋ.

¹¹Pɑɑ yɔɣɔtɩ nyɑ́ kɑwulɑɣɑ teu tɔm, nɑ pɑ́ kpɑɑlɩ nyɑ́ toŋ tɔm.

¹²Nɑ pɑ́ hʋlənɑ yʋlʋ piyɑ kɛ nyɑ́ toŋ nɑ nyɑ́ kɑwulɑɣɑ teeli sɔsɔ tɔm.

¹³N tɔkɩ nyɑ́ kɑwulɑɣɑ kɛ tɑm tɔɔ kɛ́, nɑ nyɑ́ ŋmɑkəlʋɣʋ nɑ́ɑ́ wɛ pɑɑ pəlee. Tɑcɑɑ n tɔkəɣɩ nyɑ́ nɔɔsɩ sɩɩʋ kɛ teu kɛ́. Nyɑ́ kʋlɑpʋtʋ tɑɑ kɛ́ nyɑ́ kʋpɑntʋ nɑɑkənɑ.

¹⁴Tɑcɑɑ n teŋ hotilɑɑ kɛ́, nɑ ń siɣisiɣi mpɑ pɑ pɑmɑ tɔ.

¹⁵Nyɑɣɑ yəlɑɑ tənɑ tekiɣi nɑ ń hɑɑkɩ-wɛɣɛ tɔɣɔnɑɣɑ kɛ pə wɑɑtʋ.

¹⁶Nyɑ́ kuliɣinɑ nyɑ́ niŋ, nɑ ń cɛləɣɩ weesiŋ nyə́mɑ kɛ pɑ kʋnyɩɩləm.

¹⁷Tɑcɑɑ n siɣisɑ nyɑ́ kʋlɑpəlɛ tənɑ tɑɑ kɛ́, nɑ ń kɛ́ pɛɛlɛɛ tʋ kɛ nyɑ́ təmɑ tənɑ tɑɑ.

¹⁸Tɑcɑɑ n wɛ mpɑ pɑ yɑɑkɩ-ŋ nɑ ɩsəlɛ kʋsɛɛmlɛ tɔ pɑ kiŋ kɛ́.

¹⁹Nɑ ń lɑkɩ mpɑ pɑ nyɑŋnɑ-ŋ tɔ pɑ kʋsɔɔləm. N nɩɩkɩ pɑ wulɑ kɛ́, nɑ ń yɑkɩ-wɛ.

²⁰Tɑcɑɑ n pɑɑsəɣənɑ mpɑ pɑ sɔɔlɑ-ŋ tɔɣɔ, nɑ n wɑkələɣɩ ɑsɑɣɑɑ tənɑ.

²¹Mɑ nɔɣɔ ɩ́ yoo Tɑcɑɑ nyɑ́ sɑmtʋ tɔm nɑ pɑɑ yʋlʋ wei ɩ́ sɑŋ nyɑ́ hətɛ nɑŋŋ nyəntɛ kɛ pɑɑ kʋyɑkʋ ŋkuɣu tɑm tɔɔ.