Yontu 135:4-16

⁴Yɑkɔpʋ kɛ Tɑcɑɑ ləsɑɑ. Ɩsɛɣɛlɩ kɛ ɩ pəsɑ ɩ nyəm.

⁵Mɑ nyəmɑ́ sɩ tɑ́ Ɩsɔ Tɑcɑɑ n kɛ́ sɔsɔ, n kəlɑ tɩɩŋ tənɑ.

⁶Pɑɑ mpiɣi n cɑɑkɩ, n lɑkɩ-wəɣɩ. Pɑɑ ɩsɔtɑɑ nɑ ɑtɛ. Pɑɑ teŋkunɑɑ tɑɑ, pɑɑ lumɑŋ sɔsɔɔŋ tənɑ tɑɑ.

⁷Nyɑ́ kpɑɑsəɣənɑ ɩsɔŋmʋntʋ kɛ tɛtʋ tɔɔ, nɑ ń tisiɣi cɑlɑnɑɑ nɑ tɛʋ, nɑ ń ləsəɣɩ heelim kɛ pə təsɩɩlɛ tɑɑ.

⁸Nyɑ́ kʋnɑ Icipiti kɑncɑɑlɑɣɑ ɑpɑlʋpiyɑ. Pɑɑ yəlɑɑ nyənsɩ, pɑɑ tɔlɑ nyənsɩ.

⁹Nɑ ń lɑ́ kɔkɔlɔ nyəmnɑɑ nɑ piti təmɑ kɛ Icipiti tɑɑ, sɩ pə́ sɛɣɛsɩ Icipiti wulɑʋ nɑ ɩ nyə́mɑ.

¹⁰N yoonɑ piitimnɑɑ pɑɣɑlɛ, nɑ ń kʋ ɑwulɑɑ toŋtʋnɑɑ.

¹¹Ɩsɩɩ Amolii nyə́mɑ wulɑʋ Sihoŋ, nɑ Pɑsɑŋ nyə́mɑ nyəŋ Hoki, nɑ Kɑnɑɑŋ ɑwulɑɑ tənɑ.

¹²Ɩlɛnɑ ń hɑ́ pɑ tɛtʋnɑɑ kɛ Ɩsɛɣɛlɩ nyə́mɑ nɑ tə́ pəsɩ pɑ nyəntʋ.

¹³Tɑcɑɑ nyɑ́ hətɛ yɑɑkɩ tɑm tɔɔ kɛ́. Lʋlʋŋ lʋlʋŋ kɑ tɔɔsəɣɩ nyɑ́ tɔɔ.

¹⁴Mpi tɔ, Tɑcɑɑ n kɑ́ hʋʋnɑ nyɑ́ yəlɑɑ kɛ́. N kɑ wɛɛnɑ nyɑ́ təmlɛ nyə́mɑ pətɔɔtəlɛ.

¹⁵Piitimnɑɑ tɩɩŋ ntɛ́ liɣitee nɑ wʋlɑ. Yəlɑɑ lupənɑ-ɩ nɑ pɑ niŋ.

¹⁶Tɩɩŋ ɩnɩ ɩ wɛnɑ nɔɔsɩ, ɩɩ yɔɣɔtəɣɩ. Ɩ wɛnɑ ɩsɛ ɩɩ nɑɑkɩ.