Yontu 132:6-16

⁶Tə nɩɩwɑ pɑ yɔɣɔtɑ Ɩsɔ ɑtɑkɑɑ tɔm kɛ Ɩfəlɑtɑ tɛtʋ tɑɑ. Tə mɑɣɑnɑ-ɩ Yɑɑɑ tɛtʋ hɔɣɔlʋɣʋ tɑɑ.

⁷Tə́ polo Tɑcɑɑ təcɑɣɑlɛ. Tə́ luŋ ɩ nɔɔhɛɛ təsɩɩlɛ.

⁸Tɑcɑɑ kʋlɩ nɑ ń kɔɔ nyɑ́ təhɛɛsəlɛ. Nyɑnɑ nyɑ́ teeli ɑtɑkɑɑ.

⁹Nyɑ́ kɔtəlɑɑ ɩ́ suu nyʋɣʋ yɑpʋ ɩsɩɩ wontu nɑ nyɑ́ tɑmpɑnɑ təŋlɑɑ wilitinɑ lɑŋhʋlʋmlɛ.

¹⁰Nyɑ́ təmlɛ tʋ Tɑfiiti tɔɔ, tɑɑ lɔ wei n ləsɑɑ tɔ.

¹¹Tɑcɑɑ tɛmɑ Tɑfiiti kɛ heeluɣu nɑ tuunɑʋ. Ɩ kɑɑ məlɩ wɑɑlɩ. Ɩ tɔmɑ sɩ: Nyɑ́ tɑpʋɣʋ tɛɛ pəyɑɣɑ kɛ mɑɑ sɩɩ nyɑ́ kɑwulɑɣɑ kumte tɔɔ.

¹²Sɩ ye nyɑ́ pəyɑlɑɑ tɔkɑ mɑ nɔɣɔ pɛɛlʋɣʋ nɑ kʋsəsɩɩtʋ nti mɑ sɛɣɛsəɣɩ-wɛ tɔ, pɑ pəyɑlɑɑ kɑ́ lɛɛtəɣənɑ pɑ kɑwulɑɣɑ kumte tɔɔ kɛ́ tɑm tɔɔ.

¹³Tɑcɑɑ sɔɔlənɑ nɑ ɩ́ ləsɩ Siyɔŋ sɩ ɩ lɑkɩ ɩ təcɑɣɑlɛ.

¹⁴Nɑ ɩ́ tɔ sɩ: Mɑ təhɛɛsəlɛ ntɛ́ tɑm tɔɔ. Mɑɑ cɑɣɑ tə tɑɑ. Mpi tɔ, mɑ sɔɔlɑ-tɛɣɛ.

¹⁵Mɑɑ lɑ kʋpɑntʋ kɛ Siyɔŋ nɑ mɑ́ cɛlɛ-ɩ mpi pɩɩ hɑ-ɩ weesuɣu tɔ. Nɑ mɑ́ hɑ ɩ kʋnyɔntʋnɑɑ kɛ tɔɣɔnɑɣɑ ŋkɑ pɑɑ nyɩɩlɩ tɔ.

¹⁶Mɑɑ kooli kʋpɑntʋ kɛ mɑ kɔtəlɑɑ. Nɑ mɑ tɑmpɑnɑ təŋlɑɑ nɑ́ɑ́ wilitinɑ lɑŋhʋlʋmlɛ.