Yon 9:26-39

²⁶Baing duxusunga muli ba, “Raxata maung? Xaxa maxamdi baru?”

²⁷Haxuya nadi ba, “Ngabalang masup saing alungu te. Abo ba alungu muli baru? Bola ang gabo ba asok lipuxindi dinaxu mana ba xauna?”

²⁸Saking didaudau ba, “Ung ba lipua unaxu mana! Am ba am Moses lipuxindi am ganaxu mana!

²⁹Am gaxabia ba Urana harua na Moses, ne lipua ba, am gaxabia longga ma mana te.”

³⁰Baing lipua haxuya ba, “Si! Ngahixi sibuna mana haruangaima baing! Ang gaxabia longga ma mana te, ne xaxa maxagudi.

³¹Taxabia ba Urana lungu lipu kubolu dianamdi te. Tegu. Lungu lipu gaxarea duwa hawa mana xaung disu mana murunganoa.

³²Mugamugau sibuna ma, talungu ba lipu tela xaxa lipu maxandi dahaxatu bungina hayauxinganoa te.

³³Nabu lipua ba ma rangua Urana te, bing sanga ba libu axamang tela te.”

³⁴Dahaxuya na ba, “Baruta? Kubolu diandi dibaxagi maung mana bungina hayauxingama! Baing ubo ba utubatubam?” Baing duxu masok mala.

³⁵Yesu lungu ba duxu mala, baing ila sok mana saing harua ba, “Uhatum haringina mana Lipua Ma Rangua Urana?”

³⁶Baing lipua xusunga ba, “Lipu sabanga, ina gaxarea? Ubaxanga nanga bu sanga ba ngahatum haringina mana.”

³⁷Baing Yesu harua na ba, “Ubagu ba. Ina naga harua ranguaung.”

³⁸Baing lipua harua ba, “Toxoratamona, ngahatum haringina.” Saking sabu mana.

³⁹Baing Yesu harua ba, “Ngari ma titia li bu ngasuxuya lipudi. Bila balau, binabu lipu maxa haxatiandi bagula dibagu, xaung lipudi dibagu bagula maxading dahaxatu.”