Yon 9:12-22

¹²Duxusunga ba, “Lipua ba kabila?” Harua ba, “Ngaxabia te.”

¹³Tauna, daxap lipua muga maxandi dahaxatu ba ma rangua Parisidi.

¹⁴Ne xaidaba Yesu xaningxaning bangaba saing xaxa lipua ba maxandi bing Xaidap Yaguangama.

¹⁵Binabu Parisidi duxusunga xauna ba, “Maxam disok xai baru?” Haxuya ba, “Ta bangaba maxagia, saing ngasugu, baing ina naga hatata ngabagu dup.”

¹⁶Parisi teladi daharua ba, “Lipua ba ma rangua Urana te, namua na su mana Xaidap Yaguangam hanaunaunganoa te.” Ne teladi duxusunga ba, “Ne lipu kubolu dianama sanga ba libu axamang haringindi bila ba baru?” Binabu dahata ding.

¹⁷Baing ina naga, duxugia mala rangua lipua muga maxandi dahaxatu, saing duxusunga muli ba, “Uharua baru mana lipua ba? Namua na xaxa maxamdi.” Baing haxuya ba, “Ina Urana lipuxing suxunguxunguam tela.”

¹⁸Yudadi yanamidingdi dahatum haringina teguyu ba muga maxandi dahaxatu saing kimuya daxaxa, laing duwagi baungtibundi dima.

¹⁹Duxusunga dingtang ba, “Lipua li garaima? Lipua li tang gaharua ba bauna hayau maxandi dahaxatu? Ne hatata bagu baru?”

²⁰Baing baungtibundi dahaxuya ba, “Tam gaxabia ba tam garamama, saing tam gaxabia ba bauna hayau maxandi dahaxatu.

²¹Ning hatata bagu baru, kimbo gaxarea xaxa maxandi, tam gaxabia te. Axusunga. Ina lipu sabanga, binabu sanga ba ing sibuna baxangaina.”

²²Baungtibundi daharua bila ba namua na dimaxuwa Yudadi yanamidingdi, namua na yanamidingdi dahau hatumingua masup ba lipu gaxarea dibaxanga ba Yesu ina Urana Lipuxing Mogunganama bagula dibilidi mana dila digugunia Yudadi sabungading numania.