Yon 6:53-63

⁵³Irkeb Yesu beleŋ yinyiŋ. “Fudinde wor po dineŋ hime, ne Al Urmiŋ gate gasoŋneya darineya ma nenayiŋbe Al Kuruŋya hugiŋeŋ heŋ heŋ gobe epte ma dende hiyyeŋ.

⁵⁴Munaŋ al kura gasoŋneya darineya niyyeŋ al gobe Al Kuruŋya hugiŋeŋ heŋ heŋ gobe yende hiyyeŋ. Irkeb nalu funaŋdeb al gobe isaŋ heweŋ.

⁵⁵Gasoŋnebe nene Al Kuruŋya hugiŋeŋ hitek biŋge wor po, irdeb darine wor nene Al Kuruŋya hugiŋeŋ hitek fe wor po go goyen.

⁵⁶Niŋgeb al kura gasoŋneya darineya niyyeŋ al gobe neya hireŋ. Irkeb ne wor yeŋya hireŋ.

⁵⁷Adone gwahader hitiŋ al gore nad nerke megen gar katmiriŋ. Irde yende saŋiŋde ne wor hugiŋeŋ heŋ heŋ tareŋnem yaŋ hime. Niŋgeb al kura gasoŋne niyyeŋ al gobe tareŋner Al Kuruŋya hugiŋeŋ hiriryeŋ.

⁵⁸Nebe biŋge Al Kuruŋ hitte mat kattiŋ go goyen. Asetiŋ yagobe biŋge ‘mana’ ineŋ haŋyen goyen nene hinhan gega, kuŋ kuŋbe kamamiŋ. Goyenbe al kura ne biŋge yeŋ hime gayen niyyeŋ al gobe Al Kuruŋya hugiŋeŋ hiriryeŋ,” yinyiŋ.

⁵⁹Be, mere gabe Kapeneam taun bana Yuda marte gabu yare al saba yirde heŋya tiyyiŋ.

⁶⁰Be, sabamiŋ go nurdeb Yesuyen komatmiŋ yago kura beleŋ, “Saba gabe epte ma bebak titek, meteŋeŋ wor po. Ganuŋ beleŋ epte nurde gama iryeŋ?” yamiŋ.

⁶¹Irkeb Yesu go komatmiŋ yago goyen yiŋgeŋ uliŋ mere goke ŋagak yeŋ hike nurdeb, “Merene gare dufaytiŋ haga ira?

⁶²Gwahade kenem kame ne Al Urmiŋ gayen bikkeŋ hinhemde mulgaŋ heŋ hurkumeke neneŋbe dahade nurnayiŋ?

⁶³Al Kuruŋ diliŋde al gergeŋ ird ird gobe Holi Spirit beleŋ po ga iryeŋ. Megen niŋ marte saŋiŋde epte ma gwaha irnayiŋ. Merene gayen al kura beleŋ fudinde yeŋ nuryeŋbe Holi Spirit beleŋ al goyen Al Kuruŋ diliŋde gergeŋ wor po iryeŋ.