Yon 6:35-61

³⁵Ne Yisas qamar: “Mani parau nub igomot igamau eng Ye gari. Munon ger yet oabig yariner eng me minemb ne gor yat me ebeinerei.

³⁶An ye qo yegaman end yet oabigomanei qamb animbagaum eng ue eng.

³⁷Tain munon yamangar yet qereiamor eng yet yarubour. Yarari ye wuri me qarausinei.

³⁸Ye Qenu ginam wogub derem eng munon wonou yiimurima derem eng wonou misir eng qas toat ebeibam, yonou misir end me ebeinei.

³⁹Munon ye yiimuriamor eng wo ye mi eb qamb qenunget igo eng ete: Wonou munon yurau yet imuriamor eng ye wuri me qarausinei, ue. Qen sindomund end bo wurimenimba.

⁴⁰Ger ete: Munon gugum wau eng gab wot oabigunor eng bebereg igamari qen sindomund end ye wurimenimbam,” ende qamarei.

⁴¹Yisas qob eng qamar eng: “Mani parau Qenu ginam wogub derer eng Ye gari.” Eng qamara ne Yuda wuri misiringet nob agunub qamb etemirei.

⁴²Ende at ne wuri der qamamir: “Munon eng Yosep wonou wau. In gugum wonou ur Yosep ne unor Maria eng in qoyam. Ego wo bo der: ‘Ye Qenu ginamt igo deremei’, qura a?”

⁴³Ende qamb abari wo bo der taui qamar: “Meimet qamb aninou-aninou bo agunub igoumon?

⁴⁴Munon ger wonou uyes yet me yarinerei. Tain yiimurima derem eng wonou munon yet imurima yara ne ye qen sindomund end menimine igomot der bugemba.

⁴⁵Qenu qob gigit qamara munon gumatemir eng ete: ‘Qenu munon gugum wuriimbigiba’. Ende aba munon gugum wot qoyam imbig ne yet yar igour.

⁴⁶Qob eng qanam eng ete: Munangit ger Tain me geau, munon Qenu nob igo derer eng gari wonou Ur qoyam.”

⁴⁷Ende qamb qamar: “Segagam aninob quraum, an yet oabig eng qenen bebereg igoruboumon.

⁴⁸Munon bebereg igorub qamb mani nub igour eng ye gari.

⁴⁹Aninou tonoanb mani parau (mana) seger ai end qib nub qib igour eng umb uburemirei.

⁵⁰Ego mani parau see Qenu ginamt derer eng munon nub eng ger me uminerei.

⁵¹Mani nub igomot igamau eng ye gari, Qenu ginam wogub deremei. Munon ger mani eng niner eng bebereg igoriba. Mani ye see werisibam eng yonou min. Ye ende wurisine nub eng munon ai qent gugum igomot igorubour.”

⁵²Ende qamara Yuda munon misiringet wurinou agunub qamamir: “Wa, munon eng maigas at wonou min eng indara in nuboun?”

⁵³Ne Yisas bo wurinob qamar: “Segagam aninob quraum, an yonou min nob yonou qeru nob me nub eng an igom me igurunanei.

⁵⁴Your yonou min qeru nob niner eng igomot igama qen sindomund end ye bo menimine der bugemba.

⁵⁵Yonou min eng mani apand ne yonou qeru eng ya apand.

⁵⁶Munon ger yonou min ne qeru nob nub eng wo ye yenob igama ne ye gor wo nob igoribam.

⁵⁷Tain igom igo eng yiimurima derem end ye wot bebereg igoum. End ne munon ger ye min eng nub eng yet wo bebereg igoriba.

⁵⁸End ne mani parau Qenu ginamt derer eng mani parau qoan dara tonoanb nub qib igour gas ende ue. Wuri mani parau eng numir eng ger bebereg et igamari me ibagaun, ue. A munon ger ye mani parau see quraum eng nub eng qenen igomot igoriba.”

⁵⁹Yisas qob eng wurinob qamb igoar eng Kaperneam inorou munai mor end.

⁶⁰Yisas qob eng ende wurinob qamara wonou munon yurau wo qob igub taut qib igour eng irou der wurinou misirt qamamir: “Ne qob eng at quran eng qob soagen ur, your ger qob eng igub io me qemerinerei.”

⁶¹Ende misir igub abari Yisas wuriimbig ne wuri nob qamar: “Qob e quraum end an yesiningot wogub qamb misir igoumon?