Yon 3:4-23

⁴Nikkoddimas asik bakodaw, “kuina! Yakno yakno kinim fasel aka asiki man unak keidokaba? Ade kinim fasel aka ken yak akun madom tem una alo sawil daudomune?” Akane,

⁵Yesus asik fakadu bakodaw, “naka atin afan dam weng bakakabi. Kale bakan dim kinim aka wok kumun tem so Sinik Abem ami tem so kal man unak kei nadano beta yak Got ami kasák gu unokaba.

⁶Kale kinim ika dam kinim kayo dam man fukanábiw, kata Got aka Sinik Abem kayo sinik dauyamába.

⁷Kale kaba beso kuwo kalin bá, nam bakabi be, ‘kaba asiki man unak kei nadawo kala.’

⁸Kale gedul aka eibán kal unba kal unba kei bada weng bude kidiyábaw, kata kaba am uneba so tadeba so mit uyo kam kal banim. Kale kinim kan ata Sinik Abem tabe alokso kinim kei dawkanba, be gedul kanamala ulutaw.” Akane,

⁹Nikkoddimas asik bakodaw, “be yakno yakno bi yone?” Akane,

¹⁰Yesus ayo bakodaw, “kaba Yu kayak kukumin kinim, kata nam weng bakakabi uyo kam kal banime?

¹¹Naka atin afan weng dam bakokami. Kale nuka ufek ufek nulum kal keisuw sung uta ade nulum ufek ufek atam kin wala bakodoluw, kata kiba num kin walamin weng uyo kidilodiw banim.

¹²Naka bakan dim kadák umi ufek ufek kanabu sung bakabi, kata kaba afan kalongin banim. Kale naka alo abid tikin umi ufek ufek kanabu umi sung uyo bakokamon, kalokabi, be kaba yakno yakno nadawo kal kei aket kunamodáwe?

¹³Bakan dim kinim bidiw ika mak tam abid tikin mak unongin banim, kata abido Got ami Kinim abid tikino tase ata kuw abid tikin kayak kale ata kuw alam kal.

¹⁴Kale Mosus aka anang iwán sed gisa bakan kal faimkun kiksidin taw as gang dim daw tam gida atam nadiwo wanang kinim im asanin uyo banimámsu, alataw Got ami Kinim ayo dafo dew tam as dim dawtidiwo ika ataman bom nadiwo sun biyámin uyo kudamokabiw kala.

¹⁵Kaleyo be kinim adikum kan ata atam nadane aket kudawokaba ata sun biyámokaba ko.

¹⁶Kale Got ayo bakan kayak aket fikale nadano kayo alam Min yánmák makuw ayo dabadála madák tase. Kale kan kinim ata aket kudawa namti, aka daw mafak dádoma banim, kata aka sun biyámin uyo kudulokaba ko.

¹⁷Kata Got ayo alam Min dabadála madák bakan tase, be kinim im mafak dádono, kale nadano tase bá. Kata aka tad kail bá takeikuyamono, kale tase.

¹⁸Kale kan ata Got Min ayo aket kudawa namti, aka daw mafak dádoma bá, kata kan ata Got Min ayo aket kudawongin banim namti, beta aka daw mafak dádokaba ka. Watawo kaleyo bá, aka Got ami Min yánmák makuw ayo aket kudawongin banim kayo ko.

¹⁹Kale wanang kinim imi taktaka imkanba umi dam ude bulata ko. Naka Got alamiyo Lánin abid tikin kalo madák bakan tasi, kata wanang kinim iyo Lánin be aket kudawongin banim dako nadiwe midilin ki aket kumamsiw. Be watawo kaleyo bá, ika kukuw mafak seng keimusiw kayo.

²⁰Kale adikum kan ita mafak kuw keimusiw, ika lánin itamomuno, kale adut boyabiw ade ika maek lánin tem tade modiw banim, watawo kaleyo bá, ilim kukuw mafak uyo kuw misun teiyamomu kala kale nadiwo kayo ika fingánábiw. Kale imkanamábiw uyo im misun teida adikum utamokabiw ka.

²¹Kata kan ata afan weng uyo fakusa namti, alam kukuw uyo maek lánin tadokabu. Kale be watawo kaleyo bá, aka kukuw kidel kanamano, kayo Got ta bom dakodawsa, kayo am kukuw uyo kuw misun teidawokaba ka.” Kalesa.

²²Kale nadanade Yesus so alam weng kidimin kinim so iyo yak Yuddia bakan kal iso bom nadane wok ban bomin boyamsa.

²³Kale Yon aka alaso bakan Einon mewso Salim abiw kal bom nadano wok ban boyamin boyamsa. Kale bakan kawák ayo wok seng seng kayo kinim seng tademin kuw kei bidiwo, wok ban boyamin boyamsa.