Yon 20:7-28

⁷xaung imang kimangingam disaku Yesu toxonoa. Ne imangga ba wa rangua imang teladi te. Lukinaʼm tabu halianga mana long tela.

⁸Baing ina naga, Yesu lipuxing tela naxu mana, lipua sok guhia gobagobia muga ba, ina xauna luxu. Bagu saing hatum haringina.

⁹(Urana Xuanoa harua ba Yesu bing mesa muli mana matianoa, ne daxabia rangrang teguyu.)

¹⁰Baing lipuxindi dinaxu mana tang digoxoya mala numia,

¹¹ne Maria li guhia gobagobia sabasabia, tang. Tang mua, saing nenia maluxu guhia gobagobia

¹²saing bagu Urana uleginam luwa imangiding dusa. Dirung mua mana longga Yesu sangganoa muga wa mana ba, tela wa toxong yabania, ne tela wa king yabania.

¹³Tang duxusunga ba, “Haing, baruta utang?” Harua nadi ba, “Daxap Toxoratamona ngayua sangganoa mala, saing ngaxabia longga dita mana te.”

¹⁴Harua laing sup, baing xugia mala ubunia saing bagu Yesu li la ba, ne xabia ba Yesu te.

¹⁵Baing Yesu xusunga ba, “Haing, baruta utang? Usai mana gaxarea?” Hagaxa ba lipu umanga wasanganama, binabu harua na ba, “Lipu Sabanga, nabu oxop mala, bing ubaxanga longga uta mana ba, saing bagula ngala ngaxap.”

¹⁶Yesu harua na ba, “Maria.” Xugia ma rangua saing harua Erimeak xuania ba, “Raboni!” (Namuxinoa bing Lipu Tubatubaingam.)

¹⁷Yesu harua na ba, “Labu utuxu ngau tai, namua na ngahaing mala rangua Tibugu teguyu. Ning ula rangua riagudi saing ubaladi ba, ‘Ngahaing ngagoxoya mala muli rangua Tibugu xaung Tibuim, rangua Urana ngayua xaung Urana angia.’ ”

¹⁸Baing ina naga, Maria Magdalam ila rangua lipuxindi dinaxu mana saing baxanga nadi ba: “Ngabagu Toxoratamona ba!” Baing baladi mana axadi harua na manadi ba.

¹⁹Sande yambong lipuxindi dinaxu mana digugunia. Diribauti xaludi namua na dimaxuwa mana Yudadi yanamidingdi. Duwa bila ba, baing Yesu ma li liwe manadi saing baladi ba, “Gamoimdi duwa mosiu!”

²⁰Harua laing sup, baing hatanga rimandi xaung ulenoa nadi. Lipuxindi dinaxu mana gamodingdi diyaha sibuna mana dibagu Toxoratamona.

²¹Baing Yesu harua nadi muli ba, “Gamoimdi duwa mosiu! Tibugu soxi nga ma, saing bila balau ngasoxiang mala.”

²²Harua laing sup, baing yubua yanginoa manadi saing harua ba, “Axap Urana Aningonoa.

²³Lipu gaxarea ayunga kuboluding diandi, bing Urana yungadi. Nabu ayungadi te, bing Urana yungadi te.”

²⁴Tomas (yan tela Didimas), ina tela mana Lipu 12, wa rangua Yesu lipuxindi dinaxu mana bungina owa masok ranguadi ba te.

²⁵Binabu lipuxindi dinaxu mana dibala ba, “Am gabagu Toxoratamona baing!” Ning harua nadi ba, “Nabu ngabagu waxu babundi wa mana rimandi xaung ngata rimagu uxuna maluxu mana longga duwa mana te, xaung ngata rimagu maluxu ulenia te, bing sanga ba ngahatum haringin te.”

²⁶Xaidap 7 disup, baing Yesu lipuxindi dinaxu mana duwa numia muli, saing Tomas wa ranguadi. Diribauti xaludi, ne Yesu ma li liwe manadi saing harua ba, “Gamoimdi duwa mosiu!”

²⁷Baing harua na Tomas ba, “Uta rimam uxuna la li. Ubagu rimagudi. Uraria rimama uta maluxu ulegia. Labu hatumingam luwau tai. Ning uhatum haringina.”

²⁸Baing Tomas harua na ba, “Ung Toxoratamona ngayua xaung Urana ngayua!”