Yohansi 6:44-67

⁴⁴Riy id mana hota edonna nmai A' die la'pa A A'mu mak khopna Amuai edonna Nottiar hadella mai A'u. Ne la'pa he' ed mak kmai die hota A'g ed mak kamoria hadella' lera noha niatni.

⁴⁵Etla la Puka makwohorulu-ktatrulu lirni de e niwra: “Uplerlawna hota Nwatutu-nwaye'a ir honona.” Ne riy honona maka A A'mu Nwatutu-nwaye'a me iratlina-ratailla E lirni de hota rmai wiali A' die.

⁴⁶Mere wniatut die edonna ntutga riy de namkek oleka Uplerlawna. Eneknek to'ama A'u mak kwatiawu Uplerlawan de ed mak kamkek oleka A A'mu de wa.

⁴⁷Mpiesiayo! Riy makpesiay A' die ed mak klernana mormiori plalahwa pa nodi liarni.

⁴⁸A' di de Yamanan mak kodia mormiori.

⁴⁹Miy upmi-tgarmi ra'ana yamanna maka rweta la “manna” la'a wo'orletna-kawurloini, mere emkade ho'mana rmat wiali.

⁵⁰Mere la' miy gaimi ralamni de Yamanan mak kwatiawua Ilyamou-Watyatoha inhatta eda di, ne he' na'ana hade de hota edonna nmati.

⁵¹A' di de Yamanan maka kwatiawua Ilyamou-Watyatoha, Yamanan mak kodia mormiori inhatta. Riy meni mak ka'an nana Yamanan di, de hota nmormiori plalahwa pa nodi liarni. Yamanan mak A'ukota di de A ih'u-ra'ru inhatti, mak hota Agala la rimormiori nohkeran di rerieini totpa hota rlernana mormiori-dardiari.”

⁵²La'pa ratlin tutga lir de, dewade riy Yahudi re idma nahuri-nawo'or la id wa. Pa idma nakot la ida riwra: “Hota emkameni la riy di Nala ihini-rarni de pa ita'ana?”

⁵³Noma Yesus Niwra: “Pena mpiesiayo, la'pa miy edonna mi'ina Rimormiori A'na A' die A ih'u, ne miemn A ra'ru, de hota miy edonna mliernana mormiori plalahwa.

⁵⁴Riy mak ka'ana A ih'u me kemnia A ra'ru de hota nlernan mormiori plalahwa, ne A'g ed mak kamoria la'a lera noha niatni.

⁵⁵Yoma a ih'ru-ra'ru de ya'ana-yemnu toto' memna.

⁵⁶Riy mak ka'ana A ih'u me kemni A ra'ru, de hota nor A die ihru ida-ralm ida.

⁵⁷A A'mu mak mormiori onni-ga'arni inhatta, hade ed mak khopna A'u, ne A' muana Amuori onnila E'a. Emkade wal lia riy mak ka'ana A ih'u me kemni A ra'ru, de hota Agala mormiori-dardiari plalahwa la ira.

⁵⁸A' die, de ed makla' Yamanan mak kwatiawua Ilyamou-Watyatoha, mak ematia'a yamanan “manna” maka upmi-tgarmi ha ra'ana re. Yoma la'pa ra'an nana ir yamananni de ho'mana, rmat wiali. Mere riy mak ka'an Yamanan di de hota nmormior plalahwa pa nodi liarni.”

⁵⁹Hare honona de Yesus Nwatutu-nwaye'a momuoga, la'a gen miaka Yahudi re rhi' kreini-iskolli la' leta Kapernaum.

⁶⁰La'pa ratlin nana Yesus lirni-tunnu re noma mak klernohor reri Yesus re harahu idma nakot la ida riwra: “Wniatutu-wniaye' di werat rehia! Hota he' ed maka kreiniana wniatutu rina?”

⁶¹Yesus Nmeh'a Nat niohora maklernohor reri harahu re idma e kukunu-mamatia la ida. Noma Nakot la: “Yanpa hya' maka A'ukota ri narieiniande miwenan mai A'u?

⁶²La'pa A'ukot emkade nek de miwenna, de hota emkameni owa'ana la'pa mimkek reria Rimormior A'nani A' die gha'at owa'an la gen tiutullu?

⁶³Mak khi'a rimormiori pa rmori, de Uplerlawna Nhiwni. Rimormiori rurni-laini die nakleha perkuna pa nodi mormiori-dardiari plalahwa de. Ne lira-tunu maka A'g e ukota tiy miy ri, de Uplerlawna Nhiwni lirni-tunnu ne lira re er mak kodia mormiori-dardiari.

⁶⁴Mere, miy mutwualmi dom nek de edonna rpesiaya.” Yesus Nakot emkade yoma la'a mulaliaini de Yesus Natga de hameni mak edonna kpesiaya me hameni mak hota ka'olga E'a.

⁶⁵Noma Yesus Nakot owa'ana: “La hade pede A'ukot oleka tiy miy giwra, hota riy id mana edonna nwakriani A'u, atiaru me A A'mu ed mak ktulan la ir pa rmai.”

⁶⁶La'pa Yesus Nakot emkade dewade maklernohor reri harahu re rhoitio'or doin Yesus wa.

⁶⁷Noma Yesus Natiana maka ha Nwatutu-nwaye'a termida wehrani woru re Niwra: “Yanpa miy miana e miwra mhioitio'or wal lia mai A'u?”