Yohansi 20:4-18

⁴Irrora rawlari mere Petrus mutwualli nala' ulga Petrus la hoi-kietar de.

⁵Mutwualli de nla' noka nru' pua namkek la lien de, de namkek nan to'a kok lawna wawahra nayadera mere e edonna nler la rialma.

⁶Simon Petrus ntawli'ir pa nlernohora, noma nodi liarni la lien de ralamni. La' noma namkek nana kok lawan de nayadera.

⁷Mere namkek nana kokanan maka ra rwatiehra Yesus o'tani edonna nden wut lia' kok lawan de, mere napniopan la geni id to'a.

⁸Nhor nioma Petrus mutwualli mak kala' ul die, nler walia lien de ralamni. La'pa namkek nan tutga, na'nama npesiaya de Yesus Nmori owa'ana.

⁹Yoma la' pa emkameni ho'mana la' Puka ralamni de ha rakot targa de hota Yesus Nmori owa'an la matmiati ralamni, de la'pa la' lera-mela ri ho'mana maklernohor reri Yesus re edonna rna'erit nan ma'ta lir de nnia'eratni.

¹⁰La'pa nhorwua noma irrora rla'awa ir romni.

¹¹Mere Maria Magdalena ntutrier niek la liena onni pa nahe'i kniakru. La'pa nkakakur reri de nru' pua natot la lien de ralamni.

¹²Noma namkek nana Uplerlawna hopopanni woru rlipa-rka'ma nohora naniayarni pa ramtatan la gen miaka rkenia Yesus inonni la. Rrora ramtatna de ida nden la gen die o'tani me ida nden la lakni.

¹³Noma hopopna re ratiana riwra: “Hya'a nariei pia omkakru ine?” Noma Maria nakot la niwra: “Ra' oleka a Matro'mu inonni, pede a'g e uhaka.”

¹⁴La'pa nakot emkade dewade namkek la to'orni de Yesus e Ntutrieri, mere naplinga de Yesus inhatta.

¹⁵Noma Yesus Natiana Niwra: “Nihya'pa omkakru ine? Ne omuhaka he'a?” Mere Maria nhoi hade la ora nhyi' de pede nakot la: “Ame, yanpa o' e mpuatitnia Ha genni mai handi, de mtiulan pa mukot mai a'u totpena a lia gala.”

¹⁶Noma Yesus Nakot la Niwra: “Maria!” Noma Maria napal lia Yesus pa niwra: “Rabuni!” de nnairia yawala Ibrani nnia'eratni de tungkurga.

¹⁷Mere Yesus Niwra: “Yana mtieman la A'u ina, yoma A'g edonna gha'at ma't la heyanan la' A'mu de. Mere mlia' pa mukota la A A'mu-hya'lu rora A i'nu-na'ru, muiwra A'g e giwra gha'at la heyanan pa lia A'mu mak miy Ammi wali die, me A Uplerlawnu, me miy Uplerlawanmi wal die.

¹⁸Dewade Maria nla' pa nod kiota la maklernohor reria Yesus re niwra: “Ee! A ma'tu mak kamkek memna Yesus!” Dewade nakot nohora Itmatromlawanni Yesus nnio'oni la ira.