Yohansi 19:20-33

²⁰Riy Yahudi harahu rpaikia maka ha rhorat tar die. Yoma gen miaka ha rkenia Yesus auwlakarni de edonna olieta la letlawna onni. Ne mak ha rhorta re de rnairia yawala Ibrani, yawala Latin me yawala Yunani.

²¹Noma imam re o'tani-matni re rakot la Pilatus riwra: “Yana mhuorta emkade. Mere mhuorat neka miwra: Riy di Niwra A' di de Yahudi Rayni A'u.”

²²Mere Pilatus nakot la niwra: “Maka ghorat taru de yana riy rhap dioinia la. Ndella pa hota emkade nek wa!”

²³La'pa makodi keki-rautu re rkenia Yesus la' auwlakra, dewade ra'ala Yesus naniayarni pa rhakra la nhiakra wogata totpena rima-rima gahani. Ira ra' wal lia koka plalahwani, mak emeka nhiekru yoma edonna rhor nana.

²⁴Noma makodi keki-rautu re idma nakot la ida riwra: “Yana iteti-tlaiya raini plalahwa di. Mai pia tsedu patui niohora totpena he' ed maka klernana.” La' hade de totpa hota ntu'tu la Puka lirni niwra: “Hota ir er maka khakre'era A naniai'ru, ne rhed patui la A rainu.” Pede makodi keki-rautu re rhi' emkade.

²⁵La'pa rhi' hare de Yesus inni nor walia elli, me Maria, Eklopsa patke'eni, me Maria Magdalena e rtutrieri la'a auwlakra onni.

²⁶La'pa Yesus matni nki'ir nana riy id maklernohor reri E'a maka Ensaynia de nora Yesus inni rtutrier lia' hande noma Yesus Npol lia inni niwra: “Ina, hota a'namu eda di!”

²⁷Nhor nioma Yesus nakot la riy de niwra: “Hyalia, hota o inmu hade.” La' dodo'on de meman pa riy de na'ala Yesus inni pa nora rhol wiutu.

²⁸Yesus Natga de hare honona maka Uplerlawna Nhopna Enhi' de Enhi' pa nhorwua la dodo'ondi wa, ne totpena hya' maka Puka ralamni ha nakot taru re de honona ntutu-nte'ewa, pede Niwra: “Atie'ru kerna.”

²⁹La hande de lari ida npenpuen lia anggur turu mak milmilu, noma ra'ala kuliai id na'nama rto'a la anggur tur milmil die na'nama rhoinia la ora id maka ha rweta la hisop pa rtapla la Yesus nurnu.

³⁰Noma Yesus Ndihmia anggur tur milmil die nhor nioma Nhar lirni Niwra: “A tulla-knia'ru ntutu-nte' olek wa.” Dewade Yesus o'tani nariu'u wua ne Nwaran doin aranni.

³¹La' ler de, de reparni de la' Sabat lerni. Ne rerehnian de Sabat de ho'mana ntuin taru lia'a Yahudi lerlalawanni Paska. Mak kodi plolli la riy Yahudi re rahmen pa mak kmat lia auwlakra hananni re rawniair nek la auwlakra hananni la'a Sabat lerni maka ha rwei-rnara. La' hade pede riy Yahudi rwak la Pilatus totpena nwayow pa rtewar watwiat riy mak kden la auwlakra lakni totpena plet pa rmati nanpena ralernia.

³²Pede makodi keki-rautu re rla' pa rtewar wat ulga riy maroro'a maka kletgar reria Yesus re, lakni.

³³Mere la'pa rwakriania Yesus, pa riwra rtewar lakni, mere rla' de ramkek de Nmati olekwa, de edonna rtewar Yesus lakni.