Yohanis 8:3-29

³Faik ndia, hambu inak esa nana humu nalak neu ledoeik ana hohongge. Boe ma mese anggama hida, ma hataholi Farisi hida hela lon neni Yesus neu. Ala lakaseti inak ndia nambadeik neu sila basa sala matan.

⁴Boe ma lafada Yesus lae, “Ama Mesen. Ala humu lala inak ia, neu ledoeik ana hohongge.

⁵Tungga baꞌi Musa heti-heu nala, na, hambu palenda nae, ‘Hataholi mana hohongge, na huhukun ndia, musi mbian losa maten.’ Tungga Lamatuak, na, leobee?”

⁶Ala sangga soba ika Ndia, fo bisa soli salak te sangga tao latuda Ndia. Yesus taa nataa nakandoon, tehuu Ana nakatele de sulak neu dae, nenik Ndia lima kuꞌun.

⁷Ala latane Ndia lakandondoo henin. Boe ma Ana nambadeik, de nafada sala nae, “Leoiak. Mete ma hambu neme ei mai taa tao nitak salak, na, ndia ndia mbia batu kaesan, fo huku inak ia.”

⁸Boe ma Ana nakatele seluk bali, de sulak nakadaik neu dae.

⁹Ledoeik lamanene Ndia kokolan ndia, de ala mae. Huu nai sila dale nala, ala bubuluk lae, sila boe tao litak salak. Basa de ala latanggelak esa-esa, mulai neme lasik losa mulik. Doo-doo boe ma ela kada Yesus no inak ndia mesa kasa lai mamanak ndia.

¹⁰Boe ma Yesus nambadeik bali, de natane nae, “Heeh? Ala lai bee? Taa hambu hataholi feꞌek nai ia, sangga soli salak fo huku o do?”

¹¹Boe ma ana nataa nae, “Taa Ama.” Basa de Yesus nafadan nae, “Au boe oo taa nau huku o. De, fali leo. Tehuu masanenedak. Boso tao salak bali!”

¹²Boe ma Yesus kokolak bali no hataholi noꞌu kala sila nae, “Au ia, sama leo manggaledok neu hataholi daebafok ia. Hataholi mana tungga Au, taa nasoda nai makiuk, tehuu ana leo nai manggaledok fo maneni soda ndoos.”

¹³Hambu hataholi Farisi luma sapa lae, “Wei! O nau dadik sakasii laꞌeneu o aoina hehelim do? Taa bisa! Huu tungga ai heti-heun, na, musi hataholi feꞌek dadik sakasii neu hataholi esa, tehuu, hataholi ndia taa mesa kana. De ai taa nau simbok, ma taa nau mamahele.”

¹⁴Yesus nataa nae, “Leoiak. Ela Au dadik sakasii neu Au aoina heheling, tehuu Au kokolang ndia, tetebes. Huu Au mesa nggau bubuluk ma no teteben, Au uma bee mai, ma sangga bee uu. Ei boe oo taa bubuluk Au uma bee mai, ma taa bubuluk dei fo Au sangga uni bee uu.

¹⁵Ei timba-tai hataholi tungga dae-bafok uꞌukun. Tehuu Au taa pake dae-bafok uꞌukun fo timba-tai hataholi esa boe.

¹⁶Mete ma Au timba-tai hataholi, na, Au uꞌukung ndia tetebes. Huu Au taa mesa nggau timba-tai, tehuu Au tao basan sama-sama ua Au Amang mana madenu Au.

¹⁷Boso lilii henin. Huu nana sulak nai ei heti-heu anggamam, nae, ‘Mete ma hambu hataholi dua sakasii fo kokola nala sama, na, dedeꞌak ndia tetebes.’

¹⁸De taa kada Au mesa nggau fo dadik sakasii laꞌeneu Au aoina heheling. Huu Au Amang fo nadenu Au boe dadik neu sakasii fo kokolak laꞌeneu Au.”

¹⁹Ala latane lae, “Te O Amam ndia, nai bee?” Boe ma Yesus nataa nae, “Ei taa malelak tetebes neu Au. Ei boe oo taa malelak Au Amang. Huu mete ma ei malelak tebe-tebe Au, na, neu ko ei boe malelak Ndia.”

²⁰Basa ia, Yesus nafada neu faik Ana nanoli neme Uma Ina Huhule-haladoik, dekak no mamanak fo ala paken fo nakaduduluk kolete. Taa hambu humu Ndia, huu ndia fain bei taa nandaa.

²¹Yesus kokolak nakadaik neu sala, nae, “Dei fo Au laꞌo ela ei, fo uni mamanak feꞌek uu. Dei fo ei masanggak Au, tehuu taa hambu Au. Huu ei taa maena haak mini mamanak ndia miu. Boe ma dei fo ei mate, na, ei bei lemba mahele ei sala mala.”

²²Basa de, hataholi Yahudi la malangga nala latatane aok esa no esa lae, “Ana kokolak hata ia? Ana sangga hala aon do? Huu Ana nae, ‘Ei taa bisa mini mamanak ndia miu.’ ”

²³Boe ma Yesus nafada sala nae, “Ei mima daebafok mai. Tehuu Au uma lalai mai. Ei, fo hataholi maneme daebafok ia mai. Tehuu Au taa uma daebafok ia mai.

²⁴Huu ndia de isinaak Au afada ae, dei fo mete ma ei mate, na, ei bei lelembak ei sala mala. Huu mete ma ei taa mamahele mae, Au ia, ndia Karistus, fo Lamatuak haituan mai so, dei fo mete ma ei mate, na, neu ko ei bei lelembak ei sala-singgo mala.”

²⁵Boe ma ala latane lae, “Wei! Tehuu, O ia see?” Yesus nataa nae, “Au afada memak neme makasososan mai so.

²⁶Hambu dedeꞌak noꞌuk, fo Au bisa afada laꞌeneu ei. Ei sala mala boe noꞌuk. Tehuu Au taa atudu dedeꞌa kala sila. Mana madenu Au uni mamanak ia mai, mete ma Ana kokolak, na, kada Ana kokolak ndoos. Ma Au kada afada hataholi daebafok ia, dedeꞌa kala fo Au amanene neme Ndia mai so.”

²⁷(Ndia maksud, Ndia Aman nai nusa-sodak. Tehuu ala taa lalelak Ndia maksud.)

²⁸Boe ma Yesus kokolak nakadaik nae, “Dei fo mete ma ei londa heni Au Hataholi Isi-isik ia, nai ai ngganggek lain, bei fo ei bubuluk, mae, Au ia, ndia Karistus. Ma Au taa tao hata-hata neme Au mesa nggau mai, tehuu kada Au anoli dedeꞌa kala fo Amak manai nusa-sodak nanoli Au so.

²⁹Mana madenu Au boe oo, sama-sama no au nakandondoo henin. Ana taa mboꞌi nitak Au mesa nggau, huu Au tao tungga Ndia hihii-nanaun taa-taa.”