Yohanis 6:6-21

⁶Memak Yesus bubuluk so Ana tao leobee. Tehuu Ana kokolak leondiak fo sangga uku sudi Filipus.

⁷Boe ma Filipus nataa nae, “Aweꞌe! Mae tukan esa tao ues faik natun dua boe oo, tehuu nggadin bei ta dai hasa loti fee sila basa sala! Mae kada hataholi esa hambu loti fa anak boe oo, ndia taa dai!”

⁸Boe ma Yesus ana mana tunggan esa bali nade Anderias, fo Simon Petrus fadin, nafada Yesus nae,

⁹“Ama aa! Kakanak esa nai ia neni loti lima, ma iꞌak boak dua. Tehuu ndia taa dai fee hataholi noꞌu kala ia laꞌa!”

¹⁰Nai ndia hambu naꞌu noꞌuk. Boe ma Yesus nadenu Ndia ana mana tungga nala nae, “Heti fo basa sala langgatuuk.” Boe ma langgatuuk. Faik ndia, hataholi noꞌun ana seli! Kada tou kala, meda lifun lima.

¹¹Boe ma Yesus haꞌi nala loti la, de Ana noke makasi neu Lamatuak. Ana baꞌe fee Ndia ana mana tungga nala. De ala leu babaꞌe fee hataholi makadoto kala. Ana tao iꞌak leondiak boe. Basa sala laꞌa losa lakabete.

¹²Ledoeik basa sala laꞌa losa lakabete, boe ma Yesus nadenu Ndia ana mana tungga nala nae, “Makabubua mala nanaꞌa ela kala, suek boso hambu nana nggali henik no sosoan taa.”

¹³Basa de ala lakabubua lala nanaꞌa ela kala leme loti kalima kala sila, ma iꞌa kala sila, losa henu lembeneu sanahulu dua.

¹⁴Ledoeik hataholi noꞌu kala lita tanda heran fo Yesus taok ndia, de lae, “Awii! Ndia ia, neu ko Mana kokolak fo Lamatuak heluk ndia so, fo sangga haituan mai.”

¹⁵Yesus bubuluk nae, hataholi noꞌu kala sila lakaseti Ndia fo dadik manek. Basa de Ana foꞌa laꞌo neu ndaꞌe neni lete anak esa neu, suek Ndia mesa kana bisa nai ndia.

¹⁶Ledoeik ledo bei fo tesa, Yesus ana mana tungga nala loe leni tasik leu.

¹⁷Yesus bei ta mai nakabubua no sala. Boe ma ala hene leni ofa baluk esa lain leu, de ala mulai sefe leni kota Kapernaum leu fo nai tasik selik. Ledoeik ala mulai sefe, te fai makiuk so.

¹⁸Boe ma tasik liin mulai foꞌa, huu ani sanggu nafumbu nalan seli.

¹⁹Ledoeik Yesus ana mana tungga nala lasefek meda losa kilo lima, boe ma litan Yesus laꞌok nai oe bafon. Ana mai deka-deka no sila ofa balun, boe ma ala bii lalan seli.

²⁰Tehuu Yesus nafada sala nae, “Wei! Boso bii! Huu Au ndia ia.”

²¹Huu ndia de tala bii so bali. Tehuu ala nau fo Ana hene neni ofa baluk dale neu, fo sama-sama lon. Taa bubuluk, naa te ofa baluk ndia losa neu namo seseek so.